ယူကရိန်းသမိုင်း

1991 ခုနှစ်၊ ဒီဇင်ဘာလ၌ ဆိုဗီယက်ယူနီယံ၏ အဖိနှိပ်ခံဘဝမှ သီးခြားလွတ်လပ်သော နိုင်ငံတစ်ခုအဖြစ် ခွဲထွက်ရန် ယူကရိန်းပြည်သူလူထုတစ်ရပ်လုံးက ထောက်ခံမဲပေးခဲ့ကြသည်။ ဆိုဗီယက်ယူနီယံမှ ယူကရိန်းနိုင်ငံသည် သီးခြားလွတ်လပ်သော ယူကရိန်းနိုင်ငံအဖြစ်ခွဲထွက်ပြီး ရက်သတ္တပတ်တစ်ပတ်အကြာတွင် ဆိုဗီယက်ယူနီယံကြီးလည်း ပြိုကွဲပျက်စီးချုပ်ငြိမ်းခဲ့ရလေတော့သည်။

ယခုစာအုပ်ထဲတွင် “ဟီရိုဒိုတပ်(စ်) (Herodotus) ၏ ခေတ်မှ (USSR) ဟုခေါ်ဆိုသည့် ယူနီယံကျဆုံးချိန်အထိ အသေးစိတ်ဖော်ပြထားသည်။ ယခုဖြစ်ပေါ်နေသော ရုရှား- ယူကရိန်းပြဿနာကိုလည်း ဖော်ပြထားပါသည်။ ခေတ်သစ်ယူကရိန်းနိုင်ငံကို တည်ထောင်သူ “မီခေးလို ဟူညက်စကီး” (Mykhailo – Hrushesky) အကြောင်းလည်း ဖော်ပြထားသည်။ သူ့ကို 1866 ခုနှစ်တွင် မွေးဖွားပြီး ၁၉၃၄ ခုနှစ်တွင် ကွယ်လွန်ခဲ့သည်။

ယူကရိန်းသမိုင်းသည် ဥရောကသမိုင်း၌ အရေးပါသော အခန်းကဏ္ဍမှ ပါဝင်နေသည်။ အရှေ့တိုင်းမှ ဥရောပသို့ ကျူးကျော်ရန် လာကြသူများသည် ယူကရိန်းဂိတ်မှတစ်ဆင့် ဥရောပထဲသို့ ဝင်ရောက်လာကြသည်။ ဥရောပနယ်ချဲ့သမားတွေက အရှေ့တိုင်းကို ကျူးကျော်နယ်ချဲ့ကြသောအခါတွင်လည်း “ယူကရိန်းဂိတ်” မှထွက်၍ နယ်ချဲ့ကြသည်။ ရောမအင်ပါယာ၏ စစ်တပ်များသည် “ယူကရိန်းဂိတ်” မှ ထွက်ပြီး နယ်ချဲ့ကြသည်။ အော်တိုမင်အင်ပါယာတပ်များသည်လည်း “ယူကရိန်းဂိတ်” မှပင် ဥရောပထဲဝင်ရောက်လာကြပြီး နယ်ချဲ့ကြသည်။

အေဒီ (၈)ရာစုတွင် ယူကရိန်းကို “စိန့်ပီတာစဘတ်” (St.Petersburg) ရှိ ရုရှားဘုရင်တို့က အုပ်စိုးကြသလို “ဗီယာနာ” (Vienna) မှလည်း အုပ်စိုးထားကြသည်။ ထို့နောက် ဝါဆော (Warsaw) နှင့် အီစတန်ဘူလ် (Istanbul) မှ အုပ်ချုပ်ကြပြန်သည်။

အေဒီ (၁၉)ရာစုတွင်  “စိန့်ပီတာစဘတ်” နှင့် “ဗီယာနာ” မှ ပြန်လည်အုပ်ချုပ်သည်။ ရောမခေတ်တွင် အရှေ့ရောမအင်ပါယာနှင့် အနောက်ရောမအင်ပါယာနှစ်ခုစလုံး၏ လွှမ်းမိုးခြင်းကိုခံခဲ့ရသည်။ ရောမမှ အနောက်တိုင်းယဉ်ကျေးမှုဓလေ့ထုံးစံများ လွှမ်းမိုးခဲ့သလို အရှေ့ရောမအင်ပါယာ “ကွန်စတန်တင်နိုပယ်” မှ အရှေ့တိုင်းယူကရိန်းတွင် လွှမ်းမိုးနေသည်။ ယူကရိန်းတွင် အရှေ့ပိုင်း၌ အစ္စလာမ်သာသနာထွန်းကားခဲ့ပြီး အနောက်ပိုင်းတွင် ခရစ်ယာန်သာသနာ ထွန်းကားသည်။

သမိုင်းတစ်လျှောက်၌ အုပ်စိုးသူများစွာ၏ အုပ်စိုးခြင်းကို ခံခဲ့ရသည်။ အုပ်စိုးသူအမျိုးမျိုး၏ လွှမ်းမိုးသူများကြောင့် ပြည်သူလူထုအတွင်း ကွဲပြားမှုများ ဖြစ်ပေါ်လာခဲ့သော် 1999ခုနှစ်၊ လွတ်လပ်ရေးရသောအခါ မတူကွဲပြားမှုများအားလုံးမှာ “ယူကရိန်းနိုင်ငံသား” (Citizen Of Ukrainian) များအဖြစ် အားလုံးတူညီလာခဲ့ကြသည်။