နန်းကျဘုရင်

နန်းကျဘုရင် အား ဝေဖန်သုံးသပ်မှု 3 ရှိပါသည်။

1. 

   Rated 5 out of 5

   Wuthmone Phyu – November 26, 2020

   ဒီနှစ်ထဲမှာ ကုန်းဘောင်နောက်ဆုံးမင်းဆက် အကြောင်းဖတ်တဲ့ စာအုပ် ဒါနဲ့ဆို နှစ်အုပ်ရှိပါပြီ။ ဒီစာအုပ်ကတော့ “သီပေါဘုရင်နဲ့ ပတ်သက်သည့်စာအုပ်များထဲတွင် အပြည့်စုံဆုံးနှင့် မှန်ကန်မှု အရှိဆုံးစာအုပ်တစ်အုပ် အဖြစ် နိုင်ငံတကာကစံထားလေ့လာရသည့် စာအုပ်တစ်အုပ် ” ဆိုပြီး သတ်မှတ်ထားပါတယ်။တကယ်လည်း စုံစုံလင်လင်ဖတ်လိုက်ရပါတယ်။

   သက်ဦးဆံပိုင် ဘုရင်တပါး ၊ ခမ်းနားကြီးကျယ်စွာ စံမြန်းခဲ့ရတဲ့ မာနကြီးတဲ့ မိဖုရားတပါး ရဲ့နောက်ဆုံးနေဝင်ချိန်တွေကို သံဝေဂရဖွယ် ဖတ်ရှုရမယ့် စာအုပ်တစ်အုပ်ပါ။ ရွှေနန်းတော်ကြီးရဲ့ နောက်ဆုံးနေဝင်ချိန် ၊ အဂ်လိပ် အစိုးရရဲ့ ထောက်ပံ့ကြေးကို တိုးမြှင့်ပြီးရဖို့အတွက် အထပ်ထပ်အခါခါ ကြိုးစားနေကြတဲ့ နန်းကျဘုရင်နဲ့ သူ့ရဲ့အနွယ်တော်တွေရဲ့အကြောင်း ၊ သမီးတော် လေးပါးနဲ့ သူတို့ရဲ့ သားစဉ်မြေးဆက် အကြောင်းများကို ဝေဝေဆာဆာ ဖတ်ခွင့်ရတာမို့ အတော်လည်း ဗဟုသုတ ရတဲ့ စာအုပ်တစ်အုပ်ပါ။

   တွေးစရာတွေကို လည်း အများကြီးပေးပါတယ်။ “မဟာဆီ မဟာသွေး ” ကို ထိန်းသိမ်းခြင်းမရှိတဲ့အပြင် လက်မထပ်သင့် သူကို လက်ထပ် မိလို့ မွေးဖွားလာတဲ့ အနွယ်တော်တွေပါ ဒုက္ခတွေ့ရတဲ့ ပထမသမီးတော်ရဲ့အကြောင်းကတော့ စိတ်မကောင်းဖြစ်စရာအကောင်းဆုံး လို့ ထင်မိပါတယ်။ ထက်မြက်လွန်းတဲ့ စတုတ္ထသမီးတော်အကြောင်းကတော့ ဂုဏ်ယူစရာပါ။

   ဆရာဦးသန်းဆွေ (ယခင် ယဉ်ကျေးမှုဝန်ကြီးဌာန ၊ ဒုတိယဝန်ကြီး ) ရဲ့အမှာစာအရ ဒီစာအုပ်ဖြစ်လာဖို့ စာရေးသူဆူဒါးရှား က အတော်အားစိုက်ထားတယ် ဆိုတာ သိရတာမို့ အလွန်လေးလေးစားစားနဲ့ ဖတ်မိပါတယ်။ ပေးရတဲ့အချိန်ကို တန်တယ်လို့လည်း ခံစားမိတယ်။ စာရေးသူက ” ဆရာဦးသန်းဆွေက မည်သို့ပြောပါသည် မည်သို့ယူဆပါသည် ” ဆိုပြီး စာအုပ်နေရာပေါင်းများစွာမှာရေးထားလို့ ဆရာ ဦးဝင်းငြိမ်းကို ဘာသာပြန်ဖို့ ညှိပေးခဲ့တာပါ..တဲ့ ။ ထီးသုံးနန်းသုံးအချို့စကားတွေကို ဆရာ ဦးသန်းဆွေဆီက အကြံဉာဏ်တွေယူခဲ့ပါတယ် ..တဲ့ ။

   ဆရာ ဝင်းငြိမ်း ရဲ့ ဘာသာပြန် အရေးအသားကတော့ တခါဖတ်ဖူးတဲ့ ဗမာ့ဟယ်လင် စာအုပ်မှာကတည်းက အလွန်သဘောကျမိပြီးသားပါ။ ဝတ္ထုပုံစံမဟုတ်ပဲ “နန်းကျဘုရင်တပါးရဲ့ အဖြစ်အပျက်တွေကို မူရင်းရေးသူကလည်း စိတ်ဝင်စားဖွယ် အချက်အလက်ပြည့်ပြည့်စုံစုံရေးသလို ဘာသာပြန်သူကလည်း ပြေပြေပြစ်ပြစ် ထိထိမိမိ ဘာသာပြန်ထားတာပါလား ” လို့ ခံစားမိစေပါတယ်။ လက်တွေ့အဖြစ်အပျက်တွေက ဝတ္ထုတွေ ထက် ဆန်းကြယ်ပါလား လို့လည်း တွေးမိပါတယ်။ဆရာကြီး သခင်ကိုယ်တော်မှိုင်း နဲ့ တော်ဝင်မိသားစုတွေရဲ့ ဆက်ဆံရေး အချို့ကိုလည်းဖတ်ရှုရမှာပါ။

   သမိုင်းနဲ့ပတ်သက်လို့ ဖတ်သင့်တဲ့ စာအုပ်ကောင်းတစ်အုပ်ပါ။

2. 

   Rated 5 out of 5

   Myat Zin Phyo (verified owner) – May 8, 2021

   ဒီစာအုပ်ဖတ်ပြီးတော့ မြန်မာ့သမိုင်းအကြောင်းတောင် စိတ်ဝင်စားသွားတယ်။ ဖတ်ရတာ နောက်ဆုံးအထိကို စိတ်ဝင်စားဖို့ကောင်းပါတယ်။ ထပ်ပြီးတော့တောင် လေ့လာမိပါတယ် အနွယ်တော်တွေအကြောင်း။ သမိုင်းကြောင်း ကောင်းခဲ့သည်ဖြစ်စေ၊ ဆိုးခဲ့သည်ဖြစ်စေ မြန်မာနိုင်ငံသားတစ်ယောက်ဆိုရင်တော့ ကိုယ့်ဘုရင်နောက်ဆုံးမင်းဆက်ကို လေ့လာသင့်ပါတယ်။

3. 

   Rated 5 out of 5

   ကွမ်းမော် – July 5, 2021

   စဖတ်ကတည်းက လက်ကမချနိုင်အောင်ကောင်းတဲ့စာအုပ်ပါ။ အရမ်းကြိုက်တယ် ။