ကိုယ့်ရပ်ဌာနေ

အမေရိကန်တောင်ပိုင်းပြည်နယ်တွေအကြောင်း ရိုက်ထားတဲ့ရုပ်ရှင်ကားတွေကြည့်ပြီး တောင်ပိုင်းကို ငယ်စဉ်ကပင် စိတ်ဝင်စားခဲ့ပါသတဲ့။ရှုမဆုံးတော့သည့် စိုက်ခင်းတွေ၊ ကြီးကျယ်ခမ်းနားလှသည့် ယာတောအိမ်ကြီးတွေ၊ နူးညံ့လျှင် သူတို့ပြည်နယ်ထွက် ဝါဂွမ်းတွေလိုနူးညံ့ပြီး ကြမ်းပြီဟေ့ ဆိုလျှင်လည်း မစ္စစ္စပီမြစ်ကြီး အမောက်ထောင်လာသလို ကြောက်မက်ဖွယ်ကောင်းတဲ့ တောင်ပိုင်းသား တောင်ပိုင်းသူတွေ … 🇺🇸 ဆရာကြီးက သူအားကျ နှစ်သက်တဲ့ အမေရိကန်တောင်ပိုင်း အခြေပြု ဇာတ်လမ်းတွေကို ဘာသာပြန်ရေးသားခဲ့ပြီး စာဖတ်ပရိသတ်တို့ကလည်း နှစ်ခြိုက်ခဲ့ကြပါတယ်။ ခုလည်း အမေရိကန် တောင်ပိုင်းပြည်နယ်နောက်ခံ အချစ်ဝတ္ထုလေးတစ်ပုဒ် ဘာသာပြန်လိုက်ပါပြီ။ စာရေးဆရာမ“Deborah Smith ရဲ့ A Place to Call Home” မူရင်းဝတ္ထုဟာ ၁၉၉၇ ခုနှစ်မှာ ထွက်ခဲ့တယ်။ Goodreads မှာ 5 star ပေးကြသူတွေ ရှိတဲ့အထိ လူကြိုက်များသလို Total Rating 4.1 Star အထိ ရေပန်းစားတယ်။ ဦးတင်မောင်မြင့်က ‘ ကိုယ့်ရပ်ဌာနေ ‘ အမည်နဲ့ ဘာသာပြန်တယ်။ Deborah Smith ရေးခဲ့ပြီးတဲ့ စာအုပ်ပေါင်း ၃၅ အုပ်မှာ A Place to Call Home က နာမည်ကြီးစာအုပ်တစ်အုပ်ပဲ။‘ကိုယ့်ရပ်ဌာနေ’ဟာ လူ့အသိုင်းအဝိုင်းရဲ့ အပယ်ခံလူငယ်လေးတစ်ယောက်နဲ့ ဂုဏ်မြင့်လှတဲ့ အိမ်ထောင်စုကြီး ၂ ခုက ဆင်းသက်လာတဲ့ မိန်းမငယ်လေး တို့ရဲ့ အချစ်ဇာတ်လမ်းလေး စာပေ ဝေဖန်အကဲဖြတ်သူတစ်ဦးကတော့ ‘ ဂျော်ဂျီယာပြည်နယ် မြို့ငယ်ကလေး၏ ရိုမီယိုနှင့်ဂျူးလိယက် ဇာတ်လမ်းတစ်ပုဒ်ပါပဲ ‘ တဲ့ .. ။ဘာသာပြန်သူ ဆရာကြီး ဦးတင်မောင်မြင့် က သူနှစ်ခြိုက်လှတဲ့ တောင်ပိုင်းဒေသရဲ့ အချစ်ဝတ္ထုလေးကို ဘယ်လိုများ ခြယ်မှုန်းမလဲ…။