ညီတော်အာနန္ဒာ (ခေါ်) အရှင်အာနန္ဒာဝတ္ထု

ဗုဒ္ဓနှင့် ဗုဒ္ဓဘာသာသည် ခွဲခြမ်းမရနိုင်အောင် ဆက်စပ်နေသကဲ့သို့ ဗုဒ္ဓဘာသာနှင့် အရှင်အာနန္ဒာလည်း ခွဲခြမ်းမရနိုင်အောင် ဆက်စပ်နေပါသည်၊ ဗုဒ္ဓကို သရုပ်ဖော်လျှင် ဗုဒ္ဓဝါဒ၊ ဗုဒ္ဓဘာသာသည် အလိုလိုပါလာရသကဲ့သို့ အရှင်အာနန္ဒာကို သရုပ်ဖော်သဖြင့် ဗုဒ္ဓလည်း အလိုလို သရုပ်ပေါ်လျှက် ရှိပါသည်။

ထို့ကြောင့် ဤအရှင်အာနန္ဒာဝတ္ထုတွင် အရင်းခံအရှင်အာနန္ဒာ၏ အကြောင်းအရာ အဖြစ်သနစ်များသာမက ဗုဒ္ဓ၏သာသနာပြုလုပ်ငန်း၊ ဗုဒ္ဓ၏အနေအထိုင် ၊ အပြုအမူ၊ အပြောအဆို ၊ မိန့်ခွန်းတော်များ၊ ဟောပြောချက်များ၊ သဘာဝဖြစ်စဉ်များလည်း ပါဝင်လျက် ရှိကြပါသည်။ ဗုဒ္ဓဘာသာဝင် ဥပါသကာ ဥပါသိကာများ ဖြစ်ကြသော ဗိမ္မိသရမင်း၊ ကောသလမင်း၊ ဥတေနမင်း၊ ဝိသာခါ၊ အနာထပိတ်၊ စိတ္တသူကြွယ်၊ သာမာဝတီ၊ ဗုဒ္ဓ၏ ဆန့်ကျင်ဘက် ရန်သူများဖြစ်ကြသော ဒေဝဒတ်၊ မာဂဏ္ဍီ၊ သုန္ဒရပရိဗိုဇ်မ စသည်တို့၏အကြောင်းအရာများလည်း ပါဝင်လျက်ရှိကြပါသည်။

အချုပ်အားဖြင့်ဆိုလျှင် ဗုဒ္ဓ၏ ဗုဒ္ဓအဖြစ်သို့ ရောက်ရှိချိန်မှစ၍ ပရိနိဗ္ဗာန် စံလွန်တော်မူသည်အထိ အဖြစ်သနစ်များနှင့် ဗုဒ္ဓဘာသာ စတင်ပေါ်ပေါက်သည့် အချိန်မှစ၍ ပထမသင်္ဂါယနာ တင်ပြီးသည့် အချိန်အထိ ဗုဒ္ဓဘာသာ၏ အကြောင်းအရာများ ပါရှိနေကြပါသည်။

တစ်နည်းအားဖြင့်ဆိုလျှင် ဤ ” ဓမ္မဏ္ဍာဂါရိက အရှင်အာနန္ဒာ” ဝတ္ထုသည် ဗုဒ္ဓဘာသာရုပ်လုံးဖော် ဝတ္ထုတစ်ပုဒ်ပင် ဖြစ်ပါသည်။ ထို့ကြောင့် ဤဝတ္ထုသည် ဗုဒ္ဓဝါဒနှင့် ဗုဒ္ဓယဉ်ကျေးမှုများ ထွန်းကား၍ အရည်တည်တံ့ရေးကို အထောက်အကူ ပြုနိုင်လိမ့်မယ်ဟု ယုံကြည်မျှော်လင့်ပါသည်။