ရန်ကုန်မြစ်၏ တစ်နေရာ

ရန်ကုန်မြစ်၏ တစ်နေရာ အား ဝေဖန်သုံးသပ်မှု 2 ရှိပါသည်။

1. 

   Rated 5 out of 5

   Pyae Ar Kar – June 17, 2022

   ကျွန်တော့်အိမ်က လှမ်းကြည့်လိုက်ရင် သီလဝါ ဆိပ်ကမ်းမှာ ကုန်တင်ကုန်ချ လုပ်နေတဲ့ သ‌ေင်္ဘာကြီးတွေ ၊ ရေလယ်မှာ ကျောက်ချထားတဲ့ သ‌ေင်္ဘာကြီးတွေကို တွေ့ရတယ် .. အရင်တုန်းက ဒီမြင်ကွင်းကို မျက်စိပသာဒအဖြစ်နဲ့သာ ကြည့်ရှုခဲ့ပေမယ့် ဒီစာအုပ်ဖတ်ပြီးတော့ အတွေးတွေက‌ ဒီမြင်ကွင်းရဲ့နောက်မှာ လိုက်ပါလာခဲ့တော့တယ် ..

   ရန်ကုန်မြစ်၏တစ်နေရာဆိုတဲ့ ဒီစာအုပ်ထဲက ဇာတ်လမ်းလေးတစ်ပုဒ်မှာပေါ့ .. ရန်ကုန်မြစ်ကြီး ဘေးနားမှာရှိတဲ့ ရွာလေးတစ်ရွာက သားအဖနှစ်ယောက်ဟာ ရေလယ်မှာ ကျောက်ချထားတဲ့ ဆီတွဲ‌ေသင်္ဘာကြီးတွေ‌ဆီ ပဲ့ထောင်လေးနဲ့ ဈေးရောင်းထွက်လာကြတယ် ..

   ငါးပိုက်ဆွဲပီး လက်ပေါက် ၊ ကျောပူ အခြေအနေမျိုးထက် ကျောက်ချထားတဲ့ သ‌ေင်္ဘာ‌တွေဆီသွားပြီး အားညောင်းခံကာ ကုန်ပစ္စည်းလေး ရောင်းတဲ့အလုပ်က သူတို့တွေအတွက် ပိုသက်သာတယ်လေ ..

   ဟိုရောက်တော့ သူတို့မှာရှိတဲ့ ကုန်ပစ္စည်းတွေကို ကောင်မလေးက ရောင်းချတယ် .. သင်္ဘောပေါ်က လူတွေရဲ့ မိန်းကလေးတစ်ယောက်ကို ပြုမှုလိုက်တဲ့ လုပ်ရက်ကိုကြည့်ပီး သူ့ဘေးက အဖေအစား စာဖတ်နေရင်း ဒေါသတွေတောင် ထောင်းခနဲ ထွက်မိသွားတယ် ..

   အော် ဒီလိုအဖြစ်မျိုးတွေ ဘယ်လောက်တောင်များနေပီလဲ .. ကိုယ်မသိလိုက်တဲ့ ဒီထက်ဆိုးတဲ့ ကိစ္စတွေကော ဘယ်လောက်များများ ဖြစ်နေသလဲဆိုတာကို ဒီစာအုပ်လေးဖတ်ပြီးတဲ့နောက် ရန်ကုန်မြစ်၀ကိုငေးတိုင်း ကျွန်တော်ကတော့ အတွေးနယ်ချဲ့ နေမိတော့တာပါပဲ ..
   ( spoiler ဖြစ်သွားရင် ဆောရီးပါလို့ ၊ ဒီထဲက ၀တ္ထုတိုလေးတစ်ပုဒ်ဆိုပေမယ့် ခံစားချက် တစ်စုံတစ်ရာ ကြီးကြီးမားမား ကျန်ခဲ့လို့ပါ )

   ဒီစာအုပ်လေးဟာ ဆရာမိုးကျော်ဇင်ရဲ့ ပထမဦးဆုံး စာအုပ်လေးဖြစ်ပီး ပန်းဆက်လမ်းစာပေက ပန်းချီမုတ်သုန် မျက်နှာဖုံးနဲ့ ဒုတိယအကြိမ် ပြန်လည်ထုတ်ဝေထားခြင်းဖြစ်တယ် .. ၂၀၁၈ ခုနှစ်ရဲ့ သဟာယစာပေဆုကို ရရှိခဲ့လို့ စာအုပ်ကောင်းလေးတစ်အုပ် ဖြစ်ပါတယ်ဆိုတဲ့ အကြောင်းကို အထူးတလည် ရှင်းပြနေစရာတော့ မလိုတော့ဘူး ထင်ပါရဲ့နော် ..

   ဆရာမျိုးမြင့်ညိမ်းက ” ၀တ္ထုရေးဆရာတွေက တစ်ယောက်နဲ့တစ်ယောက် အယူအဆ မတူတတ်ပါဘူး ။ ဒါပေမဲ့ ဆရာမိုးကျော်ဇင်ကတော့ သူရေးချင်ရာကို ရအောင် ရေးသွားတာပါပဲ ။ သူ့ကို ဇာတ်လမ်းက ဆွဲခေါ်သွားတာလား ၊ ဇာတ်လမ်းကို သူက ဆွဲခေါ်တာလား ဆိုတာကိုတော့ စာဖတ်သူကိုယ်တိုင် သုံးသပ်ကြည့်စေချင်ပါတယ် ” လို့ ဆိုထားသလို ဆရာဇူးကျော်ကလည်း ” သူ့မှာ ၀မ်းစာရှိသည် ။ လတ်ဆတ်သော ခေတ်ပြိုင်အတွေး ရှိသည် ။ ခံစားမှု ဖွံ့ဖြိုးသည် ။ ရေးဖွဲ့တတ်သော အတတ်ပညာရှိသည် ။ ၀တ္ထုရေးသူတစ်ယောက်အတွက် မရှိမဖြစ် လိုအပ်သော အချက်များပင် ” လို့ မှတ်ချက်ပြုထားပါတယ် ..

   ဒီစာအုပ်ထဲမှာ ၀တ္ထုတို ၁၅ ပုဒ်ပါ၀င်ပြီး ၁၅ ပုဒ်စလုံးဟာ ဆရာ မိုးကျော်ဇင် စာပေလောကကို ၁၁ နှစ်ကျော် ဖြတ်သန်းပြီး ရေးသားခဲ့သမျှ စာတွေထဲက selection ရွေးထုတ်ထားတဲ့ စာတွေဖြစ်တဲ့အတွက် တစ်ပုဒ်ချင်းစီတိုင်းမှာ ခံစားမှု တစ်စုံတစ်ရာ / အတွေးအမြင် တစ်စုံတစ်ရာ ကျန်ရစ်စေမယ့် အကြောင်းအရာတွေကို စိတ်ဝင်စားဖွယ် မြင်တွေ့နိုင်မှာပဲ ဖြစ်ပါတယ် …..

   စာအုပ်အမည် #ရန်ကုန်မြစ်၏တစ်နေရာ မဂ္ဂဇင်းဝတ္ထုတိုများ #သဟာယစာပေဆုရ
   စာရေးသူ #မိုးကျော်ဇင်
   စာအုပ်တိုက် #ပန်းဆက်လမ်း #PannSattLann
   မျက်နှာဖုံး #မုတ်သုန်
   ပုံနှိပ်မှတ်တမ်း – ၂၀၂၂ ခုနှစ် ၊ ဇွန်လ ၊ ဒုတိယအကြိမ် ၊ အုပ်ရေ ၁၀၀၀ ၊ တန်ဖိုး ၄၅၀၀ကျပ်

   #စာညွှန်းအိမ်
   #PyaeArKar

2. 

   Rated 0.1 out of 5

   Pyae Sone (verified owner) – November 28, 2022

   ရန်ကုန်မြစ်၏ တစ်နေရာ – မိုးကျော်ဇင်
   ဆရာမိုးကျော်ဇင်ရဲ့ ဝတ္ထုတိုတွေထဲမှာဆိုရင် အရင်ဆုံး ကြွေမိတာကတော့ ဆရာ့ရဲ့ အရေးအသားတွေကိုပါပဲ။မတူညီတဲ့ စကားလုံးအတွဲအဆက်တွေကို အသုံးပြုပြီး ဆိုလိုတဲ့အဓိပ္ပါယ်ကို ပုံဖော်သွားတဲ့ ရေးဟန်ကို ဆရာ့ရဲ့ အရေးအသားပုံစံများစွာထဲက တစ်ခုအဖြစ် စွဲလမ်းမိပါတယ်။ဆရာ့ရဲ့ ဘဝသရုပ်ဖော်အရေးအသားတွေနဲ့ မတူညီတဲ့အတွေးအမြင်ရှု့ထောင့်တွေဟာ ခေတ်ပြိုင်ခံစားမှုဝေဒနာတွေကို ထင်ဟပ်ကိုယ်စားပြုနေတဲ့အထဲမှာ ပါဝင်နေပါတယ်။မလွတ်တမ်း လေ့လာဖတ်ရှု ခံစားရမယ့်စာတွေထဲမှာ ဆရာ့ ရဲ့ဝတ္ထုတိုတွေ၊ ဝတ္ထုရှည်တွေ၊ အက်ဆေးတွေနဲ့ စာပေအနုပညာဝေဖန်ရေးဆောင်းပါးတွေဟာလည်း အပါအဝင်ပါပဲ။ရန်ကုန်မြစ်၏ တစ်နေရာ ဆိုတဲ့ ဒီစာအုပ်လေးဟာလည်း မဂ္ဂဇင်းအသီးသီးမှာ ဖော်ပြပါဝင်ခဲ့တဲ့ ဝတ္ထုတို၁၅ပုဒ်ကို စုစည်းထားတာပဲ ဖြစ်ပါတယ်။
   ပထမဆုံးဝတ္ထုတိုလေးဖြစ်တဲ့ နယ်နိမိတ်မရှိတဲ့နိုင်ငံ ဆိုတဲ့ ဝတ္ထုလေးမှာဆိုရင် အမေနဲ့သားကြားမှာ တည်ရှိနေတဲ့ မေတ္တာတရားကို လှစ်ဟဖော်ပြထားတာကို ဖတ်ရှုရမှာပါ။အဲ့ဒီ့ဝတ္ထုတိုလေးကအစပြုပြီး ဆွဲဆောင်မှုကိုယ်စီနဲ့ မတူညီတဲ့ ခံစားမှုတွေကိုပေးနေတဲ့ ဝတ္ထုတွေကို ဆက်တိုက်တွေ့ရှိရမှာပဲဖြစ်ပါတယ်။ဆရာ့ရဲ့ ဝတ္ထုတိုတွေထဲမှာ သတိပြုမိတာတစ်ခုက ဇတ်လမ်းရဲ့နောက်ခံအခင်းအကျင်းကို စာဖတ်သူကို မြင်ယောင်လာအောင် ရေးဖွဲ့ထားတာကိုပါပဲ။ဥပမာပြောရရင် ဒီနေ့ပြဇာတ်နဲ့ စျေးကြီးတဲ့ဖိနပ်တစ်ရံ ဝတ္ထုတိုလေးတွေပဲ ဖြစ်ပါတယ်။ဒီနေ့ပြဇတ်မှာဆိုရင် နယ်မြို့တစ်မြို့မှာ တည်ရှိနေတဲ့ ဘူတာရုံလေးတစ်ခုရဲ့ အခင်းအကျင်းလေးတွေကို မျက်လုံးထဲမြင်ယောင်လာရသလို စျေးကြီးတဲ့ဖိနပ်တစ်ရံဝတ္ထုလေးမှာဆိုရင်လည်း ကြီးမားကျယ်ပြန့်လှတဲ့ သင်္ဘောကျင်းကြီးရဲ့ လုပ်ငန်းခွင်တွေထဲကို ကိုယ်တိုင်ရောက်ရှိသွားသလို ခံစားလိုက်ရမှာပါ။
   စွန်လွှတ်သူနဲ့ မျှားသူ ဝတ္ထုနှစ်ပုဒ်ကတော့ ချစ်မေတ္တာဖွဲ့ဝတ္ထုတွေပဲဖြစ်ပါတယ်။စွန်လွှတ်တာကို ဝါသနာပါတဲ့ကောင်မလေးရဲ့အနားကနေ ကြိုးပြတ်သွားတဲ့စွန်လေးတစ်ခုလို ပျောက်ကွယ်သွားတဲ့ကောင်လေးတစ်ယောက်အကြောင်းကို စွန်လွှန်သူဆိုတဲ့ ဝတ္ထုထဲမှာ ရေးဖွဲ့ထားပါတယ်။မျှားသူဝတ္ထုမှာတော့ ငါးလေးတွေမျှားပြီး မိရင် ရေကန်ထဲကို ပြန်လွှတ်ပေးလေ့ရှိတဲ့ ကောင်မလေးရဲ့ ငါးမျှားချိတ်မှာ ချိတ်ပါသွားခဲ့ရတဲ့ နှလုံးသားတစ်ခုကို တွေ့ရှိရမှာပဲဖြစ်ပါတယ်။ဝတ္ထု၂ပုဒ်လုံးက ခပ်ဆင်ဆင်ဖြစ်မလိုလိုနဲ့ ဇာတ်ရဲ့ကျောရိုးကအစ တင်ပြပုံအဆုံး မတူညီတဲ့ ခံစားချက်တွေနဲ့ ရေးဖွဲ့ထားတာပါ။ရန်ကုန်မြစ်ရဲ့တစ်နေရာ ဝတ္ထုလေးမှာလည်း မြစ်လယ်မှာ ကျောက်ချရပ်နားထားတဲ့ ဆီသင်္ဘောကြီးတွေဆီကို ပဲ့ချိတ်လှေလေးနဲ့ စျေးသွားရောင်းရတဲ့ သမီးနဲ့အဖေ့(သားအဖ၂ဦး)ဟာ သင်္ဘောပေါ်ကလူတစ်စုကြောင့် အရှက်နဲ့ဂုဏ်သိက္ခာထိပါးခံခဲ့ရပုံကို မချိတင်ကဲဖတ်ရှုလိုက်ရပါတယ်။
   ဆရာရဲ့ဝတ္ထုတွေထဲမှာ ဗီဇာရဖို့အတွက် သံရုံးတွေမှာ တစ်နေကုန်အောင် တန်းစီစောင့်ဆိုင်းနေရတဲ့ဘဝတွေ၊ နိုင်ငံရပ်ခြားက မြို့ကြီးတစ်မြို့မှာ မြန်မာတွေရဲ့ တစ်ဦးနဲ့တစ်ဦးအပြန်အလှန် ကူညီရိုင်းပင်းတဲ့ဓလေ့အပေါ်မှာ အံ့သြသွားစေတဲ့အဖြစ်တွေ၊သင်္ဘောတက်ဖို့အတွက် ဂုဏ်သိက္ခာကို ချနင်းခံရတဲ့အဖြစ်တွေကိုလည်း ဖတ်ရှခံစားရပါတယ်။တချို့ဝတ္ထုတွေကျတော့လည်း ခေါင်းစဥ်ကို မြင်လိုက်ကတည်းက ဆွဲဆောင်မှုအပြည့်ရှိနေတာမျိုးပါ။အနက်ရောင်လက်ဆွဲသေတ္တာထဲကလူတို့ ကျွန်မစောင့်နေတာဘက်စ်ကားတစ်စီးမဟုတ်ဘူး တို့လိုပေါ့။ဘာပဲဖြစ်ဖြစ် ဆရာ့ရဲ့ ဖြတ်သန်းလာခဲ့ရတဲ့ ဘဝအတွေ့အကြုံတွေနဲ့ အတွေးအခေါ်တွေကနေ မြစ်ဖျားခံလာတဲ့ ဝတ္ထုတိုတွေကို စာဖတ်သူတွေ ကြိုက်နှစ်သက်ကြလိမ့်မယ်လို့ ယုံကြည်မိပါတယ်။