သိုဝှက်ကျီစားအပ်သော ရပ်ဝန်း၌

သိုဝှက်ကျီစားအပ်သော ရပ်ဝန်း၌ အား ဝေဖန်သုံးသပ်မှု 1 ရှိပါသည်။

1. 

   Rated 5 out of 5

   Thet Naing Aung – March 19, 2023

   ဆရာမ ခေတ်ရှေးညို ရဲ့ ” သိုဝှက်ကျီစားအပ်သောရပ်ဝန်း၌ ” စာအုပ်ကိုဖတ်မိတော့ ရင်ထဲမှာ တော်တော်လေးစိတ်မကောင်းဖြစ်မိတာတွေများတယ်လို့ ဦးစွာပြောရမယ်။

   📚 ကျွန်တော်တို့မြန်မာပြည်ရဲ့ အသက်သွေးကြောဖြစ်တဲ့ ဧရာဝတီမြစ်ကြီး ။ အဲ့ဒီမြစ်ကြီးကို မှီခိုရပ်တည်ကြတဲ့ လူတွေဆိုတာ ထောင်သောင်းမက ။ ဒီဧရာဝတီမြစ်ကြီး တိမ်ကောတာပဲဖြစ်ဖြစ် ။ ကမ်းပြိုသောင်ပြိုတာပဲဖြစ်ဖြစ် ။ အဲ့လိုတွေ ဖြစ်လာလို့ ဒုက္ခတွေရောက်ကြပြီဆိုရင် လူဦးရေပေါင်းမြောက်များစွာ ။ အဲ့လူတွေဘာပဲဖြစ်ဖြစ် မိမိနဲ့မဆိုင် စီးပွါးရေးသာအဓိကဆိုပြီး ကိုယ်ကျိူးသာကြည့်တဲ့လူတွေကို ဒီစာအုပ်ထဲမှာ ပီပီပြင်ပြင်ရေးဖွဲ့ထားတာတွေ့ရတယ်။

   📚 ဒီမြစ်ကြီးပေါ်မှာ အစိုးရက ခွင့်ပြုတာထက်ကျော်လွန်ပြီး ရေသဲကျောက်တွေကိုစည်းကမ်းမဲ့စုပ်ယူကြတဲ့အခါ သောင်ပြိုကမ်းပြိုလာတာမို့ မှီခိုနေကြတဲ့လူထုတွေ ဆန္ဒပြကြတဲ့အခါ ဖြေရှင်းဖို့ ဧကရီဆိုတဲ့ အမျိုးသမီးကရောက်လာတယ်။သူဟာ နိုင်ငံခြားနဲ့စာချုပ်ချုပ်ဆိုပြီး ရေသဲကျောက်တွေတူးဖော်ဖို့ရှိတာမို့ ဒီဖြစ်နေတာတွေကို ငွေလမ်းခင်းဖို့ရောက်လာတယ်ပဲဆိုပါစို့။အဲ့ဒေသရောက်တဲ့အခါ သူသိထားသလိုမဟုတ်ပဲ အန္တရာယ်ဖြစ်တဲ့အထိ ခိုးယူနေကာ မျက်ဝါးထင်ထင်တွေ့ရတယ်။ ပိုဆိုးတာက သူနဲ့ရှယ်ယာအတူပါဝင်ထားတဲ့ သဇင်နွယ်ဟာ ဧကရီရဲ့ ရှယ်ယာတွေပါလက်ဝါကြီးအုပ်ချင်နေတာပါပဲ။ ဆရာမခေတ်ရှေးညိုရဲ့ထုံးစံအတိုင်း ဇာတ်ကောင်တွေကို ပိုင်နိုင်စွာနေရာချပြီး လှုပ်ရှားခိုင်းတာမို့ အစဆုံးမပျင်းရတဲ့ ၀တ္တုတစ်အုပ်ပါပဲ။

   📚 ဒီထဲမှာ ဧကရီဟာ အဓိကဇာတ်ကောင်တဦးဖြစ်ပြီး ရန်ကျော် ၊ အောင်ခေတ် ၊ ကိုကို (ဧကရီရဲ့အမျိုးသား ) ၊ အောင်အောင်သန့် တို့ရဲ့ ပတ်သက်ဆက်နွယ်မှူ့တွေဟာ ဇာတ်ကို ရုပ်လုံးပိုကြွစေခဲ့ပါတယ်။

   📚 ပထမဖတ်ရချိန်မှာ ဧကရီ ကို သာမန်သာခံစားရပြီး နောက်ကြောင်းပြန်တဲ့အခန်းတွေမှာ ဧကရီကြုံတွေခဲ့ရတဲ့ အဖြစ်ပျက်တွေဟာ သနားစရာအတိ ။ သနားလာရင်းနဲ့ ဇာတ်အလှည့်အပြောင်းတခုမှာ ဧကရီကို ကျနော် မုန်းမိလာသလိုခံစားရတာတော့အမှန်ပဲ ။ အောင်အောင်သန့်ရဲ့သားဟာ အောင်ခေတ်ဆိုတာသိပြီးနောက်ပိုင်း အောင်ခေတ်အပေါ် ထားတဲ့ ဧကရီရဲ့စိတ်ကို မုန်းမိတယ်။ ဒါပေမယ့် ဧကရီကြုံတွေ့ခဲ့ရတာဟာလည်း အောင်ခေတ်အပေါ် အဲ့လိုစိတ်ဖြစ်သင့်တယ်လို့တော့တွေးမိပါတယ် ။ အဆုံးသတ်မှာ အောင်ခေတ်က ဧကရီကိုစာလေးပေးတော့ အဲ့စာလေးဖတ်ရတဲ့အချိန် ကျတော် တော်တော်လေးရင်ထဲမှာ မကောင်းဖြစ်ရတယ်။ အမှန်ပြောရရင် ဆရာမခေတ်ရှေးညိုကို အဲ့လိုမျိူးကျောခိုင်းစေခဲ့လို့ စိတ်ဆိုးချင်တယ် ။ ဒါဟာလည်း အနုပညာတရပ်ပါပဲလေလို့ဖြေသိမ့်ရတဲ့အထိပါပဲ ဆရာမရေ။

   ” နောက်ဘဝမှာ လူပြန်ဖြစ်ခဲ့ရင် ကျွန်တော်က ကျွန်တော်ပဲ ပြန်ဖြစ်ခွင့်ရချင်ပြီး တစုံတယောက်ကလဲ တစုံတယောက်ပဲ ဖြစ်ခွင့်ရပါစေ။ အဲ့ဒီအခါကျမှ တဝကြီးခေါ်ချင်နေတဲ့ နာမ်စားလေးကို ခေါ်ခွင့်ရမယ် ထင်ပါတယ်။ ဘဝမှာ ရှေ့ဆက်အများကြီးပျော်ရွှင်ပါစေ ….”

   စာကြွင်း ။ ။ အောင်ခေတ်ပေးတဲ့စာကိုဖတ်ပြီး ဧကရီ က ကျောခိုင်းနိုင်ခဲ့ပေမယ့် ကျနော်သာဆို အဲ့နေရာတင် သေချာပေါက်အရုပ်ကျိူးပျက်လဲကျမိမှာ အမှန်ပါပဲ ။ ဧကရီဟာ တကယ့်ကို အသည်းမာတဲ့ မိန်းမ ။ အတ္တကြီးတဲ့မိန်းမ တယောက်ပါပဲ ။