နွမ်းလျငှက်ငယ်

” ကျွန်မနာမည် ဟန်နာဘိတ်ကာပါ။
ဒီတိတ်ခွေကို ရှင်နားထောင်နေတယ်ဆိုရင်
ရှင်ဟာလည်း ကျွန်မဘဝကို အဆုံးသတ်စေခဲ့တဲ့
တစ်စိတ်တစ်ပိုင်း ဖြစ်ပါတယ်။
ဒီတစ်ခါတော့ ကျွန်မစကားတွေကို ရှင်တို့အဆုံးထိ
နားထောင်ပေးကြဖို့ ကျွန်မတောင်းပန်ပါတယ်ရှင်။”

နွမ်းလျငှက်ငယ် တစ်ဖြစ်လဲ 13 reasons why စာအုပ်ကို စာရေးဆရာ Jay Asher က ၂၀၀၇ ခုနှစ် မှာ ရေးသားဖြန့်ဝေခဲ့ပါတယ် .. အမေရိကန် လူငယ်တွေကြားထဲမှာ အင်မတန် နာမည်ကြီး ကျော်ကြားခဲ့တဲ့ နွမ်းလျငှက်ငယ် ဇာတ်လမ်းဟာ ကျောင်းသားလူ‌ငယ်တွေကြားမှာ ကြုံတွေ့ကြရလေ့ရှိတဲ့ အနိုင်ကျင့်မှု၊ မူးယစ်ဆေးသုံးစွဲမှု၊ စွဲလမ်းမှု၊ သစ္စာဖောက်ခံရမှုစတဲ့ အတွေ့အကြုံပေါင်းများစွာကို ဖော်ကျူး သီကုံးထားတဲ့ ဇာတ်လမ်းတစ်ပုဒ်လို့ပဲ ပြောပါရစေ

ဒါ့အပြင် ၀တ္ထုဇာတ်လမ်းကို ရုပ်သံဇာတ်လမ်းအဖြစ် ပြောင်းလဲရာမှာ ဇာတ်ကောင်တစ်ယောက်ချင်းစီရဲ့ သဏ္ဍာန်ကို ကွက်ကွက်ကွင်းကွင်း ဖော်ပြနိုင်ခဲ့တာကြောင့် ကမ္ဘာတဝန်းက ပရိတ်သတ်တွေရဲ့ လက်ခံအားပေးမှုကို ရရှိပြီးသားလည်းဖြစ်ပါတယ် ..

ဘာသာပြန်သူတစ်ယောက်အနေနဲ့ ဇာတ်ကောင် တစ်ယောက်ချင်းစီရဲ့ ရသကို စာဖတ်သူတို့ ခံစားနိုင်ဖို့ အနည်းငယ် အကြံပြုပါရစေ .. ဒီစာအုပ်လေးဟာဆိုရင် ကွယ်လွန်သူ ဟန်နာဘိတ်ကာရဲ့ စကားနောက်ခံကို နားထောင်ရင်း နောင်တ တပွေ့တပိုက်ကြီးနဲ့ ခံစားနေရတဲ့ ကလေးဂျန်ဆန်ရဲ့ သောကကို ကြုံတွေ့ခံစားရမှာမို့ ဇာတ်ကောင်တစ်ကောင်ကနေ တစ်ကောင်ဆီ ကူးပြောင်းသွားတဲ့ နေရာလေးတွေကို “စကားလုံးပုံစံ” [Font] မတူအောင် ရေးသားထားတာကို တွေ့ရမှာပါ .. ဒီလို အကူးအပြောင်းဆီရောက်တိုင်း စာဖတ်သူအနေနဲ့ မျက်လုံးကလေး ခဏလောက်မှိတ်ကာ အနားယူပြီးမှ နောက်တစ်ပိုင်းဆီ ဆက်ဖတ်စေချင်ပါတယ် ..

ဘာသာပြန်သူ သက်ပိုင်ရဲ့ နောက်ဆုံး အကြံပြုချက်ကတော့ ” ကိုယ့်အနီးအနားမှာ ရှိတဲ့ လူတွေ တစ်ဦးချင်းစီတိုင်းကို တန်ဖိုးထား ဆက်ဆံပေးကြပါ” ဆိုတာပါပဲ .. လူတစ်ယောက်ချင်းစီမှာ စိုးရိမ်သောကတွေ ကိုယ်စီ ရှိကြပါတယ် .. ဒီလို သောကကိုယ်စီနဲ့ လှုပ်ရှားရုန်းကန်နေကြတဲ့ လူသားတစ်ဦးချင်းစီကို တန်ဖိုးထားဆက်ဆံပေးပါ ၊ ပြုံးပြပါ .. “နေကောင်းလား၊ အဆင်ပြေလား” လို့ ကိုယ့်ဘက်က စတင် နှုတ်ဆက်ပြီး ဂရုစိုက်ကြောင်း ပြသပေးပါ ..

သင့်ရဲ့ အပြုအမှု၊ အပြောအဆို၊ စကားတစ်ခွန်းဟာ တဖက်သားအတွက် အားဆေးတစ်ခွက် ဖြစ်သွားနိုင်သလို၊ မြားတစ်စင်းလည်း ဖြစ်သွားနိုင်တာကို သတိရပြီး နေ့စဉ်ဘ၀မှာ အသက်တစ်ချောင်းကို ကယ်တင်လိုက်နိုင်တယ်၊ ပြဿနာတစ်ခုကို ပပျောက်အောင် ဖြေရှင်းပေးလိုက်နိုင်တယ်ဆိုရင် ဒီ နွမ်းလျငှက်ငယ် စာအုပ်လေးကို ဘာသာပြန်ရကျိုးနပ်ပြီလို့ ယူဆပါတယ် ..
( ဆရာသက်ပိုင်အမှာစာမှ ကောက်နှုတ်ချက် )