သတိပဋ္ဌာန်ဦးနှောက်

ဤစာအုပ်တွင် ဗုဒ္ဓဘာသာဝင်များ သက်ဝင်ယုံကြည်သော နိဗ္ဗာန်ကို မျက်မှောက်ပြုရန်အတွက်မဟုတ်ဘဲ လောကီနှင့်ဆိုင်သည့် အခြားရည်ရွယ်ချက်များအတွက်လည်း သတိပဋ္ဌာနသုတ်ထဲမှ ဗုဒ္ဓ၏ ထိပ်တန်းစိတ်လေ့ကျင့်မှုနည်းစနစ်များကို ထုတ်ယူအသုံးပြုနိုင်သည်ဟု ညွှန်းဆိုထားသည်။ ဗုဒ္ဓဘာသာကိုမကိုးကွယ်သော်လည်း၊ ဗုဒ္ဓဘာသာနှင့်ဆိုင်သည့် သက်ဝင်ယုံကြည်မှုများကို လက်မခံသော်လည်း စိတ်၏အဆင့်ကို မြင့်မားရန်အတွက် သတိပဋ္ဌာန်နည်းလမ်းဖြင့် လေ့ကျင့်ရန် ဖြစ်နိုင်သည်ဟုဆိုလိုခြင်း ဖြစ်သည်။တစ်နည်းအားဖြင့် သတိပဋ္ဌာန်နည်းလမ်းသည် ဗုဒ္ဓဘာသာဝင်များသာမက အခြား မည်သည့်ဘာသာဝင်မဆို ယုံကြည်စွာ လိုက်နာကျင့်ကြံ အားထုတ်နိုင်သော နည်းလမ်းဖြစ်သည်ဟု ထင်ရှားစွာ ပြဆိုထားခြင်း ဖြစ်သည်။

ဤစာအုပ်တွင် ခန္ဓာကိုယ်အတွင်းသဘာဝအလျှောက် လည်ပတ်နေသော ဇီဝကမ္မဖြစ်စဉ်များ အပေါ် သတိပဋ္ဌာန်ကျင့်ကြံအားထုတ်မှု၏ သက်ရောက်မှုများ၊ သတိပဋ္ဌာန်၏ အခြေခံအုတ်မြစ်များ၊ ခန္ဓာကိုယ်ကို နှံ့စပ်အောင်ကြည့်ခြင်း၊ ခန္ဓာကိုယ်ပေါ်တွင် စူးစိုက်ဆင်ခြင်ရသည့်အကြောင်းရင်း၊ သတိပဋ္ဌာနသုတ်၏ စွမ်းဆောင်ပုံနှင့်ပတ်သက်သည့် သိပ္ပံနည်းကျအထောက်အထားများ၊ သတိပဋ္ဌာန်ကို ခေတ်သစ် အဓိပ္ပာယ်ဖွင့်ဆိုချက်၊ သတိပဋ္ဌာနသုတ်ကို ခြုံငုံသုံးသပ်မှုများ အစရှိသည့် သတိပဋ္ဌာန်ကျင့်စဉ်နှင့် ပတ်သက်သည့် သိသင့်သိထိုက်သည့် အရာများစွာများကို အသေးစိတ် ရှင်းလင်းတင်ပြထားပါသည်။

ဤစာအုပ်ကိုဖတ်ရှုခြင်းအားဖြင့် ဗုဒ္ဓဘာသာတွင် အထူးအရေးပါသော သတိပဋ္ဌာနသုတ်နှင့် ပတ်သက်၍ ဆန်းသစ်သော ရှုထောင့်အမြင်များဖြင့် နက်နဲစွာ စူးစမ်းလေ့ထားသော အကြောင်းအရာများစွာကို ကျယ်ပြန့်စွာ ဆင်ခြင်တွေးတောနိုင်မည်ဖြစ်၍ ကိုယ်နှင့်စိတ်၏ ပကတိ သဘောသဘာဝများကို ရှုမြင်ရာတွင်လည်းကောင်း၊ သတိပဋ္ဌာန်တရားကို ကျင့်ကြံအားထုတ်ရာတွင်လည်းကောင်း စာဖတ်သူများကို တစ်ထောင့်တစ်နေရာမှ များစွာ အထောက်အကူ ပြုလိမ့်မည်ဟု ယုံကြည်မိပါသည်။