စစ်အတွင်းခရီးသည်

ဒုတိယကမ္ဘာစစ်ကြီးအတွင်း မြန်မာပြည်သူတို့၏ ကမ္ဘာ့တိုးတက်သောအင်အားစုများနှင့်အတူ ဖက်ဆစ်ဆန့်ကျင်ရေး၊ လွတ်မြောက်ရေး၊ ဒီမိုကရေစီအရေးတို့ အတွက် တိုက်ပွဲဝင်ခဲ့ကြပုံ၊ အတွေ့အကြုံများကို ပြန်လည်ပြောပြသည့်ဟန်ဖြင့် ရေးသားထားသည့် သမိုင်းမှတ်တမ်းစာအုပ်ဖြစ်သည်။ မြန်မာ့လွတ်လပ်ရေး လှုပ်ရှားမှုများတွင် အဓိကဦးဆောင်ပါဝင်ခဲ့သူ တစ်ဦးဖြစ်ပြီး ဖဆပလခေတ်တွင် ပထမဦးဆုံး အဖမ်းခံခဲ့ရသည့် စာရေးဆရာ သိန်းဖေမြင့်က ရေးသားထားခြင်း ဖြစ်ပါသည်။ ဆရာသိန်းဖေမြင့်သည် ၁၉၅၀၊ ၅၂ ခုနှစ်တစ်ဝိုက်တွင် ရှုမဝမဂ္ဂဇင်း၌ ‘စစ်အတွင်းခရီးသည်’ဟု လည်းကောင်း၊ ‘မဟာမိတ်နှင့် ဗမာ့တမန်’ ဟူသော ခေါင်းစဉ်ဖြင့်လည်းကောင်း ဆောင်းပါး

ရှည်ကြီး နှစ်ပုဒ်ကို အခန်းဆက် ရေးသားခဲ့လေသည်။ ယခုစာအုပ်တွင် တို့ဗမာအစည်းအရုံးဝင် သခင်များဖြစ်သည့် စာရေးသူနှင့် သခင်စိုး၊ သခင်ကျော်စိန်၊ သခင်မြသွင်တို့သည် ဆုတ်ခွာနေသော တရုတ်တပ်များနှင့် အဆက်အသွယ်ယူကာ တရုတ်ပြည် သို့မဟုတ် အိန္ဒိယပြည်သို့ သွားကြပြီး မြန်မာပြည်ပြင်ပမှ အကူအညီရယူကာ ဂျပန်ဆန့်ကျင်ရေး လုပ်ငန်းများ လုပ်ဆောင်ရန် ရည်ရွယ်၍ ခရီးရှည်ထွက်ခဲ့ကြပုံများ၊ အခက်အခဲအမျိုးမျိုးကို ရင်ဆိုင်ကျော်လွှားကာ ဖက်ဆစ်ဂျပန်တော်လှန်ရေးအတွက် အသက်စွန့်၍ ကြိုးစားအားထုတ်ခဲ့ကြပုံများကို မှတ်တမ်းသဖွယ် ရေးသားထားသည်။