နှလုံးသားဖြင့်ရင်း၍ ပတ်သက်ခဲ့ဖူးသော ပုရိသများ

( 2 မှတ်ချက်)

13000 (ကျပ်)

အရောင်အမျိုးမျိုးရှိတဲ့ ချစ်ခြင်းမေတ္တာတွေထဲ ဘယ်လိုချစ်ခြင်းမျိုးက ခမ်းနားသလဲ…
အချစ်ဆိုတာက ဆန့်ကျင်ဘက်လိင်နှစ်ခုကြားမှာပဲ ဖြစ်ပေါ်နေခြင်းမျိုးမဟုတ်ပါဘူး။ အမျိုးသမီးအချင်းချင်း၊ အမျိုးသားအချင်းချင်းကြားထဲမှာလဲ ချစ်ခြင်းမေတ္တာဖြစ်ပေါ်တတ်ပါတယ်။

တစ်ယောက်အကြောင်း တစ်ယောက်နားလည်ပြီး တစ်ယောက်ပျော်ရွှင်ခြင်းတွေ တစ်ယောက်မျှဝေနိုင်တဲ့အခါ ချစ်ခြင်းမေတ္တာက ခိုင်မြဲပါတယ်။

အီဗလင်းက ဘယ်လိုလူမျိုးလဲ… ဘယ်သူ့ကိုအချစ်ဆုံးလဲဆိုတာ စိတ်ဝင်စားစရာသိပ်ကောင်းတယ်။ ဘာကြောင့် အဲ့ဒီ့တစ်ယောက်ကို သူ သေဆုံးတဲ့အချိန်ထိချစ်သွားသလဲ။ အီဗလင်းဟာ အချစ်နဲ့ အောင်မြင်မှု ဘာကိုရွေးချယ်သွားသလဲ။

🔸️ ဒီစာအုပ်ကိုဖတ်လိုက်ရင် အောင်မြင်တဲ့အမျိုးသမီးတစ်ယောက်ရဲ့ လိင်တူလိင်ကွဲချစ်ခြင်းမေတ္တာ၊ အိမ်ထောင်ရေးအပေါ် ခံယူချက်သဘောထား၊ အောင်မြင်မှုအတွက် ကြိုးစားရုန်းကန်ရပုံ၊ ရှင်သန်ခြင်း ..သေဆုံးခြင်းအပေါ် သူမအတွေးအမြင်တို့ကို စိတ်ဝင်စားဖွယ် တွေ့ရှိရမှာပဲဖြစ်တယ်။

🔸️ ဒီစာအုပ်ရဲ့ မူရင်းစာအုပ်ကို အမေရိကန်စာရေးဆရာမ Taylor Jenkins Reid ရေးသားပြီး ၂၀၁၇ မှာထွက်ရှိလာကာ အုပ်ရေ ၂သန်းကျော်လောက် ရောင်းချရပါတယ်။ တရုတ်၊ ဂျာမနီ၊ စပိန်၊ ပြင်သစ်၊ ပေါ်တူဂီ၊ အီတလီ၊ တူရကီ စတဲ့ ဘာသာစကားပေါင်း ၁၈မျိုးနဲ့ ဘာသာပြန်ဆိုထားတဲ့ နာမည်ကျော်စာအုပ်ကောင်းတစ်အုပ်ပါ။ စာအုပ်မှာ အပိုင်း ၇ ပိုင်းပါပြီး ဟောလီးဝုဒ်ကြယ်ပွင့် အီဗလင်းဟူးဂိုရဲ့ ဘဝဇာတ်ကြောင်းကို သူကိုယ်တိုင် သတင်းထောက်အမျိုးသမီးလေးတစ်ယောက်ကို ပြောပြနေဟန် ရေးဖွဲ့ထားတာပါ။

စာမျက်နှာ

456

စာအုပ်အရွယ်အစား

5.6x 0.8 x 8.1 inches

ပုံနှိပ်မှတ်တမ်း

ပန်းဆက်လမ်းစာပေ ၊ 2024ဖေဖော်ဝါရီလ (ပထမအကြိမ်)

⛔️BOOK JECKET SERVICE

*Cover ပါ Bookflap နှင့် စာအုပ်မိုးကာ မလိုက်ဖက်ပါသဖြင့်*ပန်းဆက်လမ်း၏ အခမဲ့လက်ဆောင် ဝန်ဆောင်မှုဖြစ်သော Book Jecket (စာအုပ်မိုးကာ) ကို ယခု စာအုပ်အတွက် ချန်လှပ်ပါသည်။

17 in stock

နှလုံးသားဖြင့်ရင်း၍ ပတ်သက်ခဲ့ဖူးသော ပုရိသများ အား ဝေဖန်သုံးသပ်မှု 2 ရှိပါသည်။

  1. Aeri Myat (verified owner)

    The Seven Husbands of Evelyn Hugo💚

    ဆရာမ စုမြတ်ချစ်ကတော့ “နှလုံးသားဖြင့် ရင်း၍ ပတ်သက်ခဲ့ဖူးသော ပုရိသများ”ဆိုတဲ့ အမည်လေးနဲ့ ဘာသာပြန်ဆိုထားပါတယ်။

    ပြောရရင် “အီဗလင်းဟူးဂို”ရဲ့ အတ္ထုပ္ပတ္တိ
    ၊လူတစ်ယောက်ရဲ့ မွေးဖွားချိန်ကနေ
    သေဆုံးချိန်ထိ ဘဝဖြတ်သန်းပုံ၊ အနိမ့်အမြင့်၊ အတက်အကျတွေကို အသေးစိတ်
    ရေးပြထားတဲ့ စာအုပ်တစ်အုပ် ဖြစ်ပါတယ်။

    အိမ်ထောင်ခုနှစ်ဆက်ကျတယ်ဆိုတဲ့
    အမျိုးသမီးအကြောင်းဟာ ကျွန်မအတွက် မဖတ်ခင်ကတည်းက အတော်လေး စိတ်ဝင်စားဖို့ကောင်းခဲ့ပါတယ်။

    အသက်၁၄နှစ်ကတည်းက ပထမအိမ်
    ထောင်ကျခဲ့တဲ့ အီဗလင်းဘဝမှာ
    အချစ်စစ်နဲ့ ချစ်ခဲ့ဖူးတာလည်း ရှိတယ်။
    ကမ္ဘာကျော် မင်းသမီးဖြစ်လာဖို့အတွက်
    ခန္ဓာကိုယ်ကို ရင်းပြီး ပေးဆပ်လိုက်ရတာလည်း ရှိတယ်။ရမ္မက်ဆန်ဆန် အချစ်ရေးကိုလည်း ဖြတ်သန်းခဲ့ဖူးပေမယ့်
    ယူခဲ့ဖူးသော အိမ်ထောင်ဆက် ခုနှစ်ဆက်ကြားမှာ သူမအချစ်ဆုံးက “ဆီလီယာစိန့်ဂျိမ်းစ်” ဆိုတဲ့ အမျိုးသမီး ဖြစ်နေခဲ့တာကတော့ ဒီစာအုပ်ရဲ့ ထူးခြားချက်ပါပဲ။

    ရုပ်ရှင််မင်းသမီး ငွေကြယ်ပွင့် ဆီလီယာ့အပေါ် လိင်တူချစ်သူရယ်လို့ အများက အထင်သေးမေးငေါ့ကြမယ့်အဖြစ်မျိုး မဖြစ်ရလေအောင် အီဗလင်းတစ်ယောက်
    အတတ်နိုင်ဆုံး ကာကွယ်ပေးခဲ့တယ်။

    ဆီလီယာ့အတွက်ရယ်လို့ ဆိုပေမယ့်
    တစ်ချို့ရွေးချယ်ခြင်းတွေဟာ သူမတို့ နှစ်ဦးစလုံးအတွက် ပိုပြီးအထိနာစေခဲ့ရတယ်။ချစ်လျှက်နဲ့ ဝေးကွာခဲ့ရတဲ့နှစ်တွေလည်း ရှိခဲ့ပြန်တယ်။

    အောင်မြင်ကျော်ကြားမှုနဲ့ စည်းစိမ်ချမ်းသာထက် နောက်ဆုံးမှာတော့
    အီဗလင်းဟာ သူမချစ်တဲ့အမျိုးသမီးနဲ့
    ဘဝကို အကောင်းဆုံးဖြတ်သန်းသွားဖို့ကို ဦးစားပေး ရွေးချယ်လိုက်တာက သူမဘဝအတွက် အကောင်းဆုံး ရွေးချယ်မှုတစ်ရပ်လို့သာ ဆိုချင်မိပါတယ်။

    အီဗလင်းပြောသွားတာလေး တစ်ခုက
    “တစ်စုံတစ်ခုကို စိတ်မကောင်းဖြစ်လို့ ရပေမယ့် နောင်တတော့မရနဲ့”တဲ့လေ။

    ဒီစာအုပ်မှာ မထင်ထားတဲ့ ကိစ္စတစ်ခုလည်းရှိသေးတယ်။အီဗလင်းဟာ သူမအကြောင်းတွေကို သတင်းထောက်မလေး “မိုနစ်”ကို ဘာလို့ပြောပြတာလဲ၊ သူမအကြောင်းတွေကို ဘာလို့ မကွယ်မဝှက် ချပြချင်ရသလဲ၊ နောက်ဆုံး မိုနစ့်အတွက် အီဗလင်း ပေးခဲ့တဲ့စာတစ်စောင်ကရော
    မိုနစ့်အတွက် ဘယ်လိုမျိုး အရေးပါနေတာလဲ ဆိုတာတွေပေါ့။
    သိချင်ရင်တော့ စာအုပ်လေး ဖတ်ကြည့်လိုက်ဖို့ တိုက်တွန်းပါရစေနော်😁💚

    ဘာသာပြန် ဖတ်နေတယ်ဆိုတာတောင်
    တစ်ချက် တစ်ချက်မှ သတိဝင်လာတဲ့အထိ ဆရာမအရေးအသားမှာ မျောပါသွားတာ ဇာတ်လမ်းအစကနေ အဆုံးထိပါပဲ🥰

    စာအုပ်ကောင်းလေး ဘာသာပြန်ရေးသားပေးတဲ့ ဆရာမစုမြတ်ချစ်ကို ကျေးဇူးအများကြီးတင်ပါတယ်💚💚💚

  2. Mon Halsey

    ဘာသာပြန်စာရေးသူတစ်ဦးဖြစ်တဲ့
    ဆရာမစုမြတ်ချစ်ရဲ့ “နှလုံးသားဖြင့်ရင်း၍ ပတ်သက်ခဲ့ဖူးသော ပုရိသများ” စာအုပ်ကို စထွက်တဲ့နေ့ကတည်းက လက်ခံရရှိခဲ့ပါတယ်။
    Taylor Jenkins Reid ရဲ့ နာမည်ကျော် The Seven Husbands of Evelyn Hugo
    စာအုပ်ကို ဘာသာပြန်ထားတာပါ။
    စာအုပ်မထွက်ခင်ကတည်းက နာမည်ကြားရုံနဲ့ စိတ်ဝင်စားစရာဖြစ်ခဲ့တာကြောင့် သေချာလေးဖတ်ခဲ့ပါတယ်။နေ့တိုင်း လေးငါးရွက်လောက်ဖတ်ခဲ့တာကြောင့် တစ်လကျော်လောက်တော့ ကြာသွားတယ်။
    ဒီစာအုပ်က Hollywood ရဲ့ အကျော်ဇေယျ ရုပ်ရှင်မင်းသမီး Evelyn Hugo ရဲ့ ရုန်းရင်းဆန်ခတ် ဘဝခရီးလမ်းကို ရေးဖွဲ့ထားတဲ့ စိတ်ဝင်စားစရာ ဇာတ်လမ်းတစ်ပုဒ်ဖြစ်ပါတယ်။ သူ့ရဲ့ဘဝမှာ လူသိရှင်ကြား ပတ်သက်ခဲ့တဲ့ အမျိုးသား ၇ ယောက်ရှိခဲ့ပြီး အဲဒီအမျိုးသားတွေရဲ့
    နောက်ကွယ်မှာတော့ သူအင်မတန်ချစ်မြတ်နိုးတဲ့ တွဲဖက်မင်းသမီးတစ်ယောက်က တစ်သက်လုံး ရှိနေခဲ့တာဖြစ်ပါတယ်။ ဒီအမျိုးသားတွေနဲ့ပတ်သက်ခဲ့ရတာဟာ သူတကယ်ချစ်ခဲ့မိတဲ့ချစ်သူ အမျိုးသမီးကြောင့် ဖြစ်နေခဲ့တာကလည်း အံ့ဩစရာပဲဖြစ်ပါတယ်။
    ဒီစာအုပ်ဟာ နာမည်ကျော်အမျိုးသမီးတစ်ယောက်ရဲ့ အချစ်၊ ရည်မှန်းချက်၊ အနစ်နာခံမှု၊ ကြောက်ရွံ့မှု၊ ကျော်ကြားမှု၊ ငွေကြေး ချမ်းသာမှု၊ မလိမ့်တပတ်ရိုက်စားလုပ်မှုများ..
    စတဲ့အကြောင်းအရာတွေကို စာရေးခြင်းအတတ်ပညာ၊ စိတ်ကူးစိတ်သန်းကောင်းကောင်းနဲ့ ကျွမ်းကျင်စွာ ပေါင်းစပ်ဖန်တီးထားတဲ့ Heavy Drama အမျိုးအစား ဝတ္ထုတစ်ပုဒ်ပဲဖြစ်ပါတယ်။
    Evelyn Hugo ဟာ အပြင်မှာတကယ်ရှိတဲ့ဇာတ်ဆောင်တစ်ယောက်မဟုတ်ပါဘူး။ (သူ့ဘဝဇတ်ကြောင်းနဲ့တူတာက ၇ ကြိမ်တိုင်တိုင်လက်ထပ်ခဲ့ရုပ်ရှင်မင်းသမီးကြီး Elizabeth Taylor ပဲဖြစ်ပါတယ်)။ ဒီဝတ္ထုကို အမှန်တကယ် ထူးခြားစေတာက သူ့ရဲ့အမျိုးသားဇာတ်ကောင်တွေနဲ့ ရှုပ်ထွေးတဲ့ဆက်ဆံရေး Complicated Relationship
    ပဲဖြစ်ပါတယ်။
    ဝတ္ထုရဲ့ဖွဲ့စည်းပုံက အတိတ်နဲ့ပစ္စုပ္ပန်ကြား အပြန်အလှန်ချိတ်ဆက်ယှက်နွယ်နေတဲ့ Evelyn ရဲ့ အတွေးခံစားမှုတွေကို Journalist တစ်ယောက်ဖြစ်တဲ့ Monique Grant ကို မထိန်မချန်ပြောပြပုံကနေ ဖြစ်တည်ထားတဲ့ ဖွဲ့စည်းပုံမျိုးဖြစ်ပါတယ်။
    ဒီလိုအမေးအဖြေ စကားပြောပုံစံတွေထဲမှာ မင်းသမီးရဲ့ဘဝပဟေဠိကို ရှာဖွေခြင်းနဲ့အတူ
    စာဖတ်သူတွေကို ဆွဲခေါ်
    သွားတယ်။ ခင်ပွန်းတစ်ဦးစီဟာ Evelyn ရဲ့ဘဝတစ်လျှောက် မတူညီတဲ့ အခန်းကဏ္ဍတွေကို ကိုယ်စားပြုပြီး သူ့ရဲ့ ချစ်ခြင်းမေတ္တာနဲ့ပြည့်စုံမှုကို ရှာဖွေတဲ့နေရာမှာ LGBTQ+ တို့ရဲ့အခွင့်အရေး၊ ကျော်ကြားမှုရဲ့နောက်ကွယ်က ရင်ဆိုင်ရတဲ့ စိတ်မလွတ်မြောက်မှုအန္တရာယ်တွေ၊ အတားအဆီးတွေကို ဖော်ပြထားတယ်။
    စာဖတ်သူတွေအတွက် တစ်ခေတ်တစ်ခါတုန်းကရှိခဲ့တဲ့ လိင်တူလိင်ကွဲ လူမှုစံနှုန်းများရဲ့သက်ရောက်မှုတွေဟာ ရင်တမမဖြစ်စေပါတယ်။
    အချစ်ဆိုတာ ဘာလဲ။ အချစ်နဲ့ပတ်သက်ရင် လူတွေဟာ ဘယ်လောက်အထိ ရူးသွပ်နိုင်ကြသလဲ၊ ပေးဆပ်နိုင်ကြသလဲ။ နာမည်ကျော်ကြားခြင်း၊ ငွေကြေးချမ်းသာခြင်းတွေရဲ့နောက်ဆုံးမှာ လူတစ်ယောက်ဟာ ဘာတွေရသွားသလဲ။ ဘာတွေလုပ်သွားသလဲ။ ဒီလိုမေးခွန်းတွေဟာ စာဖတ်သူတွေရဲ့ခေါင်းထဲမှာ ကျန်ခဲ့တာပဲဖြစ်ပါတယ်။
    နာမည်ကြီးတဲ့သူတွေအပေါ်မှာ “လူတွေထဲကလူတစ်ယောက်ပါပဲ” ဆိုတဲ့အမြင်နဲ့ ဘေးကလူတွေဟာ
    ဘယ်လောက်အထိနားလည်မှုပေးနိုင်ကြသလဲ။
    နာမည်ကျော်တွေဟာ သူတို့ နာမည်တစ်လုံးအမြဲရေပန်းစားနေဖို့အတွက် စွန့်လွှတ်ခဲ့ရတဲ့အရာတွေအများကြီးပါပဲ။သူတို့ဘဝကို သူတို့တကယ် ကျေနပ်ပျော်ရွှင်မှု ရှိပါရဲ့လား။တွေးနေမိပါတယ်။
    ကျွန်မအနေနဲ့ Heart ထိခဲ့ရတာက နောက်ဆုံးစာမျက်နှာက Evelyn Hugo ကွယ်လွန်သွားပြီဆိုတဲ့သတင်းစာမျက်နှာလေးပဲဖြစ်ပါတယ်။ ဒီစာမျက်နှာကို ဖတ်လိုက်ရတဲ့အချိန်မှာ တစ်ခုခုခံစားခဲ့ရတယ်ဆိုရင် ဒါဟာ မူလစာရေးသူသည်လည်းကောင်း၊ ဘာသာပြန်ဆရာသည်လည်းကောင်း အောင်ပွဲရပြီလို့ပြောနိုင်တာပဲဖြစ်ပါတယ်။
    လူ့လောကမှာရှိနေတဲ့ သမားရိုးကျ ကန့်သတ်ချက်တွေကို ကျော်လွန်ပြီး စိတ်ဝင်စားဖွယ်ကောင်းတဲ့ နာမည်ကျော်တစ်ယောက်ရဲ့ ဘဝတစ်ခုကို ဇာတ်လမ်းအဖြစ် ပုံဖော်ဖန်တီးထားတာပါ။ ဝတ္ထုဖတ်ရတာကြိုက်တဲ့သူတွေအတွက် ရသတစ်ခုပေးစွမ်းနိုင်မှာ အမှန်ပဲဖြစ်ပါတယ်။ စာမျက်နှာလေးရာကျော်ရှိတဲ့အတွက် ဆရာမစုမြတ်ချစ်ရဲ့ အားထုတ်မှုကို အသိအမှတ်ပြုပါတယ်။ ဖတ်ခွင့်ရတဲ့အတွက်လည်း ကျေးဇူးတင်ပါတယ်။

လူကြီးမင်း၏ ဝေဖန်သုံးသပ်ချက်ကို မျှဝေပေးပါ...

Your email address will not be published. Required fields are marked *

စုမြတ်ချစ် စာအုပ်များ