ငြိမ်းချမ်းမှုကိုရှာဖွေခြင်း

( 14 မှတ်ချက်)

5000 (ကျပ်)

▪️ ဇင်ဗုဒ္ဓဘာသာဘုန်းတော်ကြီး ဟေမန်ဆူနမ် (Haemin Sunim) ရေးသားတဲ့ The Things You Can See Only When You Slow Down စာအုပ်ကို ဆရာမောင်သန်းမှ မြန်မာဘာသာပြန်ဆိုထားသည့် စာအုပ်ဖြစ်ပါတယ်။ မူရင်းစာအုပ်ဟာ နိုင်ငံခြားဘာသာပေါင်း ၃၀ ကျော်ထိ ဘာသာပြန်ထားပြီး အုပ်ရေသုံးသန်းကျော်ရောင်းချထားပြီးဖြစ်တဲ့ ကမ္ဘာကျော်စာအုပ်တစ်အုပ် ဖြစ်ပါတယ်။

▪️ စာအုပ်မှာ အခန်း(၈)ခန်းပါဝင်ပြီး ဘ၀မှာ ကြုံတွေ့လာရနိုင်တဲ့ ရှုထောင့်ပေါင်းစုံကို တစ်ခုချင်းစီ ရေးပြထားပါတယ်။ အဲဒီအထဲမှာ အချစ်အကြောင်း၊ ခင်မင်မှုအကြောင်းတွေပါသလို အလုပ်အကြောင်း၊ စိတ်ခွန်အားဖြစ်စရာတွေလည်း ပါပါတယ်။ ကိုယ့်ရဲ့အနာဂတ်နဲ့ ပတ်သက်ပြီး အသေချာ မရေရာဖြစ်နေရင်၊ ကိုယ့်ရဲ့ဝါသနာကိုမသိရင်၊ ကိုယ့်အကြောင်းကို ပို နားလည်လာဖို့နဲ့ ကိုယ့်ရဲ့ဝါသနာပါရာကို ရှာဖွေတွေ့ရှိဖို့ နည်းလမ်းတွေကို အကြံပေးထားပါတယ်။

▪️ အခန်းတစ်ခန်းစီကို အက်ဆေးတစ်ပုဒ်နဲ့စထားပြီး မှတ်သားဖွယ် အကြောင်းအရာခပ်တိုတိုလေးတွေကို နောက်ဆက်တွဲ ရေးပြထားပါတယ်။ အဲဒီ အကြံဉာဏ်တိုတိုလေးတွေဟာ သင့်ကို ရည်ရွယ်ပြီး ရေးထားပါတယ်။ အဲဒီ အကြံဉာဏ်တိုတိုလေးတွေဟာ သင့်ကိုရည်ရွယ်ပြီး ရေးထားပါတယ်။ ဒါမှသာ ဘ၀မှာ အခက်အခဲစိတ်ညစ်စရာတွေ ကြုံရတဲ့အခါ အဲဒီမက်ဆေ့စ် တိုတိုလေးတွေကို မှတ်မိပြီး ရှေ့ဆက်ဖို့ ခွန်အားရနိုင်မှာဖြစ်ပါတယ်။

▪️ စိတ်အာရုံစူးစိုက်မှု ပိုကောင်းလာဖို့၊ တရားမှတ်ဖို့အတွက် မှတ်ချက်တိုလေးတွေ ထည့်ရေးထားပါတယ်။ တချို့စာဖတ်သူတွေကတော့ ၀တ္ထုစာအုပ်ဖတ်သလို မြန်မြန်ဖတ်လိုက်ကြမှာပါ။ ဒါပေမယ့် စာရေးသူ အကြံပြုလိုတာကတော့ အချိန်ယူပြီး အေးအေးဆေးဆေး ဖတ်ဖို့ပါ။ အခန်းတစ်ခန်းပြီးတိုင်း ကိုယ်ဖတ်ခဲ့တဲ့ အကြောင်းအရာတွေကို ပြန်စဉ်းစားပါ။ ပြီးမှ နောက်တစ်ခန်းကို ဆက်ဖတ်ပါလို့ အကြံပြုထားပါတယ်။

စာမျက်နှာ

184

စာအုပ်အရွယ်အစား

5.5 × 0.5 × 8.2 inches

ပုံနှိပ်မှတ်တမ်း

ပန်းဆက်လမ်း၊ 2023 ဇန်နဝါရီလ (စတုတ္ထအကြိမ်)

စာအုပ်စျေးနှုန်းအပြောင်းအလဲ

1.1.2023 နေ့မှစတင်၍ မူရင်းထုတ်ဝေတိုက်မှ ကျပ် 5000 စာအုပ်စျေးနှုန်းအသစ်ပြောင်းလဲသတ်မှတ်ထားပါသည်။

12 in stock

ငြိမ်းချမ်းမှုကိုရှာဖွေခြင်း အား ဝေဖန်သုံးသပ်မှု 14 ရှိပါသည်။

  1. ရွှေဇင်ခိုင်ဦး

    ရင်ထဲမှာအပူတွေများပြီး မချိမဆံ့ခံစားနေရတဲ့အချိန်မှာ
    ဒီစာအုပ်လေးကို ရှာတွေ့ခဲ့တာ
    တကယ့်ကိုအဖိုးမဖြတ်နိုင်ဆုလာဒ်ပါပဲ
    စာဖတ်မြန်တဲ့ကိုယ်တောင် ၇ရက်တိတိအချိန်ယူပြီး
    တစ်ကြောင်းချင်းစီကိုအထပ်ထပ်အခါခါဖတ်ပြီး
    တွေးယူရတဲ့အထိပါပဲ
    စာတစ်ပိုဒ်ဖတ်ပြီးတိုင်း
    အပူတစ်ခုလျှော့သွားသလိုခံစားရတယ်
    တစ်အုပ်လုံးဖတ်ပြီးသွားတဲ့အခါ
    ရင်ထဲမှာငြိမ်းချမ်းသွားသလိုခံစားရတယ်
    စိတ်ကိုထားတတ်အောင်သင်ပေးတဲ့ စိတ်ပညာစာအုပ်
    လို့တောင်တင်စားချင်ပါတယ်
    စာအုပ်အမည်နဲ့ရလာဒ်က
    လုံးဝကိုပြီးပြည့်စုံပြီးလိုက်ဖက်လွန်းပါတယ်
    ‌ဘာသာပြန်ပေးတဲ့ဆရာကိုလဲ
    ကျေးဇူးအများကြီးတင်ပါတယ်နော်

  2. Nay Thu

    ❤️❤️❤️အကြိုက်ဆုံးစာသားလေးကိုပဲ ရေးလိုက်တော့မယ်….
    အာဏာရှိတဲ့လူတွေဟာ အများအားဖြင့် ခေါင်းညိမ့်တတ်တဲ့ လူတွေနဲ့ပဲ ၀န်းရံနေတတ်တယ်။ ဒီလိုလုပ်ခြင်းက သူတို့ကို အရေးပါတဲ့သူလို့ ခံစားစေရတာကိုး။ သင့်အနီးမှာရှိတဲ့ လူတွေအားလုံးဟာ သင်ပြောသမျှခေါင်းညိမ့်နေမယ်ဆိုရင် အဲဒီလူတွေဟာ သင့်အပေါ် သစ္စာရှိသူတွေ မဟုတ်ဘဲ အခွင့်အရေးသမားတွေသာ ဖြစ်ပါလိမ့်မယ်။
    တစ်စုံတစ်ယောက်နဲ့ ပြဿနာဖြစ်တဲ့အခါ ကိုယ့်ရဲ့အားနည်းချက်ကိုပဲရှာပါ။ ဒါဟာ လောကနိယာမအရ အမှန်တရားကိုရှာဖွေခြင်းပါပဲ။ တစ်စုံတစ်ယောက်ကို သဘောမကျတာတွေ ရှိတဲ့အခါ ဘယ်အချက်ကို မကြိုက်တာလဲဆိုတာရှာပါ။ အဲလိုမကြိုက်တဲ့အချက်က သင့်ဆီမှာကော ရှိသလားဆိုတာ လေ့လာပါ။ သူတစ်ပါးဆီမှာ ကိုယ်မကြိုက်ဘူးလို့ ချက်ချင်းသတိထားမိလိုက်တဲ့ အချက်တွေဟာ တစ်ခါတစ်ရံ သင့်ဆီမှာလည်း ရှိနေတတ်တယ်။
    လူတွေဟာ သူတစ်ပါးကို ထိခိုက်စေမယ့်စကားတွေ၊ နာကျင်စေမယ့်စကားတွေကို ပြောတယ်ဆိုတာ သူတို့ကိုယ်တိုင်က ထိခိုက်နာကျင်နေလို့ပါ။ သင်ဟာ အဲလိုမျိုး မနာလို ၀န်တိုပြီး စိတ်ထားမမှန်တဲ့သူတွေကို တွေ့တဲ့အခါ “ဪ.. သူကိုယ်တိုင်ကော ဘယ်လိုအခြေအနေကို ရင်ဆိုင်နေရတာပါလိမ့်” လို့ တွေးကြည့်လိုက်ပါ၊ သူ့ကို သနားစရာ သတ္တဝါတစ်ကောင်အဖြစ် မြင်လာပါလိမ့်မယ်။
    ရင်ထဲမှာ မေတ္တာတရားရှိတဲ့အခါ သာမန်ကိစ္စလေးတွေ၊ တွေ့မြင်နေကျအရာလေးတွေတောင် တန်ဖိုးရှိပြီး လှပနေပါလိမ့်မယ်။ မေတ္တာကင်းမဲ့တဲ့နှလုံးသားဟာ အသက်ရှင်ရတာ အဓိပ္ပာယ်မရှိသလို ခံစားလာရပြီး မိသားစုဝင်တွေကိုတောင် သူစိမ်းတွေလို ခံစားလာရတယ်။ *****
    Haemin Sunim(The Things You Can See Only When You Slow Down), ဆရာ “မောင်သန်း”နဲ့ Pann Satt Lann ဒီထက်မက အောင်မြင်ပါစေဗျ။

  3. Nyan Lin Thu (verified owner)

    တကယ်ကောင်းမွန်တဲ့စာအုပ်လေးပါစိတ်ပါဝင်စားစွာနဲ့ဖတ်ကြည့်ရင်တကယ်အနှစ်တွေကြီးပါပဲ စိတ်ဓာတ်ကျနေတဲ့အချိန်ဖတ်ရင် စိတ်ဓာတ်ကျနေတာကိုပဲတစ်ခါတည်းဖြေလျော့ပေးနိုင်ပါတယ်
    အကြိုက်ဆုံးစာကြောင်းလေး
    “မှန်တစ်ချပ်ဟာသူ့ရှေ့မှာရောက်လာတဲ့အရာကိုဘယ်အရောင်ဆိုးမှုပြုပြင်ချယ်သမှုမှမပါဘဲနဂိုအတိုင်းပြနိုင်သလိုသင်ခံစားနေရတဲ့စိတ်ခံစားမှု(ဥပမာ-ဒေါသပဲဆိုပါစို့)ကိုဘာခံစားချက်မှမထည့်ဘဲနဂိုအတိုင်းရှုမြင်ပေးပါ”
    အခန်း(၂)သတိပဌာန်(စာ-၃၈)

  4. Motivated Yourself (verified owner)

    ငြိမ်းချမ်းမှုဆိုတာ တကယ်တော့ တကူးတက လိုက်ရှာနေစရာမလိုပါဘူး……သင့်ရဲ့ကိုယ်အတွင်း တစ်နေရာရာမှာ သူကိန်းအောင်းနေတတ်ပါတယ်……ငြိမ်းချမ်းမှုကိုရှာဖွေတဲ့နေရာမှာတော့ သင်ကိုယ်တိုင်ရှာဖို့လိုအပ်ပါလိမ့်မယ်…..ကိုယ်တွင်းမှာ ငြိမ်းချမ်းနေမယ် inner peace ဖြစ်နေမယ်ဆိုရင် အပြင်မှာလည်းသင်ငြိမ်းချမ်းနေတာ တခြားသူတွေတောင် လိုက်ပြီးခံစားလို့ရပါတယ်…..

    အပြောင်းအလဲမြန်နေတဲ့ လောကကြီးထဲမှာ လူတွေလည်း အပြောင်းအလဲမြန်တာ သိပ်တော့မဆန်းပါဘူး….ကိုယ်ကသာ ပြောင်းလဲမှုတွေကြား နေသားကျအောင်နေတတ်ဖို့ပဲလိုပါတယ်……အဲ့လိုနေနိုင်ဖို့ကလည်း ပြောသလောက်တော့မလွယ်ဘူးပေါ့……ကိုယ်ရင်ဆိုင်နေရတဲ့ အခက်အခဲတွေ ဝမ်းနည်းပူဆွေးမှုတွေ ဆိုတာလည်းကိုယ်တိုင်သာအသိဆုံးဆိုတော့လေ……ဒါပေမယ့် Inner peace ငြိမ်းချမ်းမှုကို ရှာဖွေတွေ့ရှိသွားပြီဆိုရင်တော့ ကျွန်မတို့ဘဝတွေဟာ နေရတာ အဓိပ္ပါယ်ပိုရှိလာမယ် ပျော်ရွှင်လာမယ် အေးချမ်းလာမယ်…….အဲ့တော့ စစ်မှန်တဲ့ ငြိမ်းချမ်းမှုကို ကျွန်မတို့ရှာကိုရှာသင့်ပါတယ်…..
    “တစ်စက္ကန့်မှ အနားမရပဲ အလုပ်နဲ့လက်နဲ့ အဆက်မပြတ်လုပ်ရတဲ့အခါ၊ အနာဂတ်က ခန့်မှန်းမရဘဲ မသေမချာဖြစ်နေတဲ့အခါ၊ စိုးရိမ်စရာအတွေးတွေ သင့်ခေါင်းထဲပြည့်နှက်နေတဲ့အခါ၊ သူတစ်ပါးစကားကြောင့် နာကျင်ရတဲ့အခါ ခနတာဖြစ်ဖြစ် စိတ်ကိုငြိမ်အောင်လေးထားလိုက်ပါ….သိစိတ်တွေကို ပစ္စုပ္ပန်ဆီဆွဲယူပါ…..လေကိုပြင်းပြင်းရှူလိုက်ပါ….ကျွန်တော်တို့ရဲ့ စိတ်တွေကို အရှိန်လျော့ချလိုက်တာနဲ့ ငြိမ်းချမ်းမှုက သူ့အလိုလိုပေါ်လာပါလိမ့်မယ်”တဲ့….. ဟုတ်ပါတယ်….ကျွန်မတို့ တကယ်ပဲ ကျွန်မတို့ရဲ့စိတ်တွေကို အရှိန်လျော့ဖို့လိုအပ်နေတာပါ…..
    ဘဝမှာ ကြုံတွေ့လာရနိုင်တဲ့ ရှုထောင့်ပေါင်းစုံကို ဒီစာအုပ်လေးမှာဖတ်ရှုနိုင်ပါတယ်….. အချစ်အကြောင်း၊ ခင်မင်မှုအကြောင်း၊ အလုပ်အကြောင်း၊ စိတ်ခွန်အားဖြစ်စရာတွေ နှစ်သိမ့်အားပေးမှုတွေလဲ ဒီစာအုပ်လေးထဲမှာ ပါပါတယ်……ကျွန်မ လက်တလော ခံစားနေရတဲ့ ခံစားချက်တွေကိုလည်း တော်တော်လေးသက်သာစေခဲ့ပါတယ်…….
    မှတ်သားဖွယ် အကြောင်းအရာ ခပ်တိုတိုလေးတွေလည်း ပါဝင်တာကြောင့် ဘဝမှာ အခက်အခဲ စိတ်ညစ်စရာတွေကြုံလာရတဲ့အခါ အဲ့ဒီအကြောင်းအရာလေးတွေကို မှတ်မိပြီး ရှေ့ဆက်ဖို့ခွန်အားတွေလည်း ရနိုင်မှာပါ……
    စာအုပ်လေးမှာ အခန်း (၈) ခန်းပါဝင်ပါတယ်……အခန်းတိုင်း အခန်းတိုင်း တကယ်ကိုယ် တွေးတောလို့ကောင်းတယ်……မိမိကိုယ်ကိုယ် ပြန်လည်သုံးတတ်လာတယ်…..ဆုံးဖြတ်ချက်တွေချတတ်လာတယ်……ကျွန်မဒီစာအုပ်လေးဖတ်ပြီး လိုက်လုပ်ကြည့်မယ်လို့ဆုံးဖြတ်ထားတဲ့အရာတွေလည်းရှိတယ်……
    🌿 ကျွန်မရဲ့စိတ်ကို အနားပေးမယ်… လူတစ်ယောက်တောင် ကာယခွန်အားတွေသုံးပြီး အလုပ်လုပ်ရရင် လူပင်ပန်းတာရှိသေးတာပဲ…. ကျွန်မတို့ရဲ့ စိတ်တွေကို မနားမနေ အတွေးပေါင်းသောင်းခြောက်ထောင်နဲ့ နှိပ်စက်နေရတာ ကိုယ့်စိတ်ကိုယ် မသနားဘူးလား…..သူ့ကိုလည်းအနားယူခွင့်ပေးလိုက်ကြရအောင်…..
    🌿 ဒေါသဖြစ်တာ စိတ်အားငယ်တာ တွေကိုလည်း သတိလေးနဲ့စောင့်ကြည့်လိုက်မယ်ဆိုရင် 100% မဟုတ်တောင် အနည်းဆုံး 50% လောက်တော့ ဒေါသဖြစ်စိတ် အားငယ်စိတ်တွေကိုလျော့ချနိုင်မယ်လို့ ယုံကြည်ပါတယ်…..ကိုယ့်ရဲ့ စကားလုံးတွေနောက်မှာ အမြဲသတိလေးကပ်နေဖို့လည်းကြိုးစားသင့်တယ်…….
    🌿 အရာရာကို နိုင်ချင်ဇော ဖြစ်ချင်ဇော စတဲ့ ‘ဇော ဇော’တွေနဲ့ အလုပ်လုပ်ရင်လည်း သေချာပါတယ် အမှားပါဖို့များနေတယ်…..’Things You Can See When You Slow Down ‘ ဆိုတဲ့အတိုင်း အရာရာကိုဖြည်းဖြည်းမှန်မှန် လုပ်သွားကြစို့နော်…..ဇော တွေမကပ်ပါနဲ့…….
    🌿 တစ်ယောက်နဲ့တစ်ယောက်ကြား ဆက်ဆံရေးကလည်းအရေးကြီးပါတယ်….. တစ်ယောက်နဲ့တစ်ယောက် ယုံကြည်မှုတွေပိုတိုးစေဖို့ကလည်း ဆက်ဆံရေးက အက္ခရာကျပါတယ်…..မိသားစုကြား မိတ်ဆွေတွေကြား ဆက်ဆံရေးကို တန်ဖိုးထားတတ်ဖို့လည်းလိုပါတယ်……
    🌿အနာဂတ်ကို ကြိုတင်ပူပန်နေမယ့်အစား ပစ္စုပ္ပန်မှာသာ နေကြည့်လိုက်ပါ….ငြိမ်းချမ်းမှုဆိုတာ ပစ္စုပ္ပန်မှာပဲရှိပါတယ်…..ပစ္စုပ္ပန်ကပဲ ကျွန်မတို့ရဲ့ အနာဂတ်ကို ဖန်တီးပေးပါလိမ့်မယ်… ရထောင့်ရခဲ ဒီလူ့ဘဝလေးကို ပျော်ပျော်ရွှင်ရွှင်ဖြတ်သန်းဖို့ ထိုက်တန်ကြတဲ့သူတွေချည်းပါပဲ…..
    🌿ကိုယ် ယုံကြည်ရာ ဘာသာရေးလုပ်နေခြင်းကလည်းကျွန်မတို့ရဲ့စိတ်ကို တည်ငြိမ်မှုရစေသလို ငြိမ်းချမ်းမှုကိုရှာဖွေတဲ့နေရာမှာလည်း တစ်စိတ်တစ်ပိုင်းပါဝင်နေတယ်လို့ ယုံကြည်ပါတယ်…….
    ဒီအကြောင်းအရာလေးတွေကတော့ ကျွန်မဒီစာအုပ်လေးဖတ်ပြီး တွေးမိတွေးရာလေးတွေ တွေးတောရင်း ကိုယ်တိုင်လည်းလုပ်ကြည့်ဖို့ ဆုံးဖြတ်ထားတဲ့အရာလေးတွေမျှဝေခြင်းသာဖြစ်ပါတယ်…..
    စာဖတ်သူတို့လည်း ငြိမ်းချမ်းမှုကို လိုလားတယ်….ရှာဖွေနေကြတယ် ဆိုရင်တော့ ဒီစာအုပ်လေးဖတ်ကြည့်စေချင်ပါတယ်…..စစ်မှန်တဲ့ ငြိမ်းချမ်းမှုတွေကိုရှာဖွေတွေ့ရှိနိုင်ကြပါစေလို့ ဆန္ဒပြုရင်း………
    Thae JM

လူကြီးမင်း၏ ဝေဖန်သုံးသပ်ချက်ကို မျှဝေပေးပါ...

Your email address will not be published. Required fields are marked *

မောင်သန်း စာအုပ်များ