သင်္ဘောသားပြောသောပုံပြင်များ

ဒီစာအုပ်ပါ အကြောင်းအရာတွေကို –

သင်္ဘောသား မဟုတ်သူ၊ သင်္ဘောသားလောကနဲ့ မနီးစပ်တဲ့ သူတွေက “ ဒါတွေက တကယ်ဖြစ်ခဲ့တာလား “ လို့ အမေးရှိကြလိမ့်မယ်၊ ထူးဆန်းကြလိမ့်မယ်။

သင်္ဘောသားတွေကတော့ “တကယ်ပဲ ဒီအတိုင်းတွေပါပဲ” လို့ ဖြေကြမယ်။

စာရေးဆရာက ဒီလိုပြောထားပါတယ်။

“မြန်မာရုပ်ရှင်တွေ၊ ဗီဒီယိုတွေ အတော်များများမှာတော့ သင်္ဘောသားဇာတ်ကောင်တစ်ကောင် ပါလာပြီ ဆိုရင် ပေါကြောင်ကြောင် အပြုအမူတွေ၊ ဗရုတ်သုတ်ခ ဝတ်စားဆင်ယင်မှုတွေနဲ့ ကျပ်မပြည့်တဲ့ ကာရိုက်တာတွေ ထားတတ်ကြပါတယ်။ တချို့ကလဲ ဗီလိန်အဖြစ်နဲ့ ထားပါတယ်။ နောက်ထပ် ထူးခြားမှုတစ်မျိုးကတော့ ဟာသဆန်ပါတယ်။ ဇာတ်လိုက်မင်းသားဟာ သင်္ဘောတစ်ခေါက် နှစ်ခေါက်လောက် လိုက်ပြီးရင် မြန်မာပြည်ပြန်လာပြီး ကုမ္ပဏီထောင်ကြတော့တာပါပဲ။

ဒီစာအုပ်ဟာ သင်္ဘောသားတွေရဲ့ ဘဝကို သနားဖို့ ရှေ့နေလိုက်ပေးတဲ့ စာအုပ်မျိုး မဟုတ်ပါဘူး။ အဲဒီလိုလဲ မရည်ရွယ်ပါဘူး။ တချို့အကြောင်းအရာတွေက ကိုယ်တွေ့တွေဖြစ်ပြီး တချို့က မိတ်ဆွေတွေရဲ့ အတွေ့အကြုံတွေ ဖြစ်ပါတယ်။ တချို့ အကြောင်းအရာတွေက ရယ်မောစရာဖြစ်ပြီး တချို့က ရင်မောစရာတွေ ဖြစ်ကြပါတယ်။

ဒီစာအုပ်ထဲက အရေးအသားတွေဟာ ဝတ္ထုတိုတွေ မဟုတ်ပါဘူး။ အတွေ့အကြုံတွေကို ပေါ့ပေါ့ပါးပါး ပြန်ပြောပြထားတဲ့ ဇာတ်လမ်းတွေပါ”