မြကြာဖြူ

ကျွန်မတို့မှာ တစ်ဖက်က သားကိုသခင်၊ လင်ကိုဘုရား သဘောထားပြီး မိန်းမဆိုတာ ယောက္ခမအိမ်မှာ ကျွန်အကြီးဆုံးအဖြစ်နဲ့ နေရတယ်ဆိုတဲ့ ကွန်ဖြူးရှပ်ယဉ်ကျေးမှုကြီး ဖိစီးလွှမ်းမိုးတဲ့နိုင်ငံကြီးရှိပါတယ်။ တစ်ဖက်မှာလည်း လင်ယောကျ်ားကို မိန်းကလေးရှင်က ငွေနဲ့ပေးဝယ်ရပြီး လင်ရတာနဲ့တစ်ပြိုင်နက် အိမ်တွင်းပုန်းရ၊ ခေါင်းမြီးခြုံရတဲ့ အစဉ်အလာကြီး ဖိစီးထားတဲ့ နိုင်ငံကြီးရှိပါတယ်။ ဒါပေမယ့် ဒီနိုင်ငံကြီးတွေရဲ့ ဩဇာဟာ ကျွန်မတို့ မြန်မာအမျိုးသမီးတွေကို ဘယ်လိုမှ အရိပ်ထိုးခြင်း၊ လွှမ်းမိုးခြင်း၊ သက်ရောက်ခြင်း၊ ရောင်ပြန်ဟပ်ခြင်း မရှိခဲ့ပါဘူး။ စီးပွားရေးလုပ်ငန်းဆိုင်ရာမှာ မြန်မာမိန်းမက မောင်တစ်ထမ်း၊ မယ်တစ်ရွက်မျှမက မောင်ထမ်းသလို မယ်ထမ်းရတဲ့အခ့ါလည်းရှိခဲ့ပါတယ်။ အပျိုကြီးဘဝ၊ မုဆိုးမဘဝတွေမှာ မိသားစုရဲ့ တာဝန်ကို အဓိကဝန်ကိုင်အဖြစ်နဲ့ ရုန်းကန် တာဝန်ယူမှုတွေလည်းရှိတဲ့ အမျိုးသမီးတွေပါ။ ဒီလို တာဝန်ယူနိုင်မှု၊ တာဝန်ယူနိုင်လောက်အောင် အကင်းပါးဖျတ်လတ်မှု၊ လွတ်လပ်မှုတွေကို သဘောကျလွန်းလို့ မြန်မာ့စီးပွားရေးနယ်ထဲက အမျိုးသမီးတွေကို ​မော်ကွန်းထိုးတဲ့သဘောနဲ့ ဓနမဂ္ဂဇင်းမှာ ရေးသားခဲ့တာပါ

လူထုဒေါ်အမာ ၏ “မန္တလေးသူ မန္တလေးသားများ” စာအုပ်တွင်ပါဝင်သော စာရေးသူအမှာစာမှာ ကောက်နုတ်ချက်