မင်းရဲ့ကိုယ်ပိုင်ပုံစံလေးအတိုင်းသာ

( 3 မှတ်ချက်)

5000 (ကျပ်)

တစ်ကမ္ဘာလုံးမှာ အုပ်ရေ ၁၆ သန်းကျော် ရောင်းထားရတဲ့ ” The Four Agreements ” မြန်မာပြန် ” မင်းရဲ့ ကိုယ်ပိုင် ပုံစံလေးအတိုင်းသာ ” .. လူရဲ့ မူလပကတိ စိတ်ပိုင်းဆိုင်ရာ အကြောင်းအရာတွေနဲ့ ပတ်သက်လို့ စိတ်ရဲ့သဘောသဘာ၀ကို လေ့လာနေသူတွေ အကြိုက်တွေ့မယ့် စာအုပ်လေး .. ” ဒီစာအုပ်လေးဟာ ကိုယ်ပိုင်လွတ်မြောက်ခြင်းတွေဆီသို့ သွားရာလမ်းအတွက် လမ်းညွှန်ပေးနိုင်မယ့် စာအုပ်တစ်အုပ် ဖြစ်ပါတယ် .. ဒီစာအုပ်ထဲမှာပါတဲ့ သဘောတူချက် လေးချက်က ကျွန်မတို့ ဘ၀ကို ပြောင်းလဲမှုတွေ အများကြီး ဖြစ်စေပါလိမ့်မယ် .. စကားလုံးတွေကို မှန်ကန်စွာ ရွေးချယ်တတ်ဖို့ ၊ မှန်ကန်စွာပြောဆိုတတ်ဖို့ ၊ ကိုယ့်အပူမဟုတ်တဲ့ အရာတွေကို ကိုယ့်အပူမလုပ်ဖို့ ၊ မြင်မြင်သမျှ ထင်ထင်သမျှကို ရမ်းသမ်းကောက်ချက်ချပြီး စိတ်သောကတွေကို မဖန်တီးဖို့ ၊ ဘ၀မှာ ဘယ်အရာကို မဆို ကိုယ်လုပ်နိုင်သမျှ အကောင်းဆုံးလုပ်ပြီး ကြိုးစားတတ်ဖို့ စတဲ့ အရာတွေကို ဒီစာအုပ်လေးကနေ တစ်ဆင့် သင်ယူရရှိနိုင်မှာ ဖြစ်ပါတယ် ” လို့ ဆရာမ စူးရှမေက အမှတ်တရ စကားမှာ ဆိုထားပါတယ် .. ” တစ်နည်းအားဖြင့် ကျွန်တော်တို့တွေက မိဘတွေ ၊ လူကြီးတွေနဲ့ ပတ်၀န်းကျင်ရဲ့ ပုံစံခွက်လေးထဲမှာ ချပေးထားတဲ့အတိုင်း ကြီးပျင်းလာကြရသူတွေပါ .. အသက်ကြီးလာတော့လည်း ပုံစံခွက်ထဲကနေ ရုန်းမထွက်မိတော့ပဲ ဒီတိုင်းပဲ ဆက်နေသွားကြတော့တယ် .. ဒီတော့ ကျွန်တော်တို့ဟာ ကျွန်တော်တို့ရဲ့ ကိုယ်ပိုင်ပုံစံလေးတွေအတိုင်း ဘ၀မှာ ရှင်သန်နေနိုင်ခဲ့ကြပါရဲ့လား .. ကိုယ့်အတွက် တွေးကြည့်စရာ ၊ ကိုယ့်အတွက် မေးကြည့်စရာလေးပါ .. ” လို့ ဘာသာပြန် စာရေးသူ ထက်ဘုန်းရှိန်ကလည်း အမှာစာမှာ ပြောထားပါသေးတယ် …။

စာမျက်နှာ

128

စာအုပ်အရွယ်အစား

5.5× 0.3×8.1 inches

ပုံနှိပ်မှတ်တမ်း

စာရိပ်မြိုင်စာပေ 2023 နိုဝင်ဘာလ (ဒုတိယအကြိမ်)

စျေးနှုန်းအပြောင်းအလဲ

22.11.2023 ရက်နေ့မှစတင်၍ မူရင်းထုတ်ဝေတိုက်မှ 5000 ကျပ် စာအုပ်စျေးနှုန်းအသစ်ပြောင်းလဲသတ်မှတ်ထားပါသည်။

16 in stock

မင်းရဲ့ကိုယ်ပိုင်ပုံစံလေးအတိုင်းသာ အား ဝေဖန်သုံးသပ်မှု 3 ရှိပါသည်။

  1. Toe Tet Lynn

    “မင်းရဲ့ကိုယ်ပိုင်ပုံစံလေးအတိုင်းသာ”

    ဆရာထက်ဘုန်းရှိန် ဘာသာပြန်ထားတဲ့ “မင်းရဲ့ကိုယ်ပိုင်ပုံစံလေးအတိုင်းသာ” ဆိုတဲ့ စာအုပ်က စိတ်ကို control လုပ်ရာမှာကော အတွေးမလွန်မိစေဖို့ ထိန်းရာမှာပါ တော်တော် ထိရောက်တယ်။
    ကိုယ့်ဘက်က တစ်ဖက်သက် ကောက်ချက်အမျိုးမျိုး ဆွဲပြီး စိတ်ညစ်တတ်၊ စိတ်သောကရောက်တတ်တဲ့ သူတွေအတွက်ဆိုရင် ဒီစာအုပ်လေးက အတော်အသုံးဝင်ပါတယ်။

    နိဒါန်းပိုင်းနဲ့ မီးခိုးအူနေတဲ့ မှန် အထိတော့ တခြားသော ယုံကြည်သက်ဝင်မှုဆိုင်ရာအသုံး‌လေးတွေပါ ပါတော့ အသုံးအနှုန်းတွေကို ဖတ်ဖတ်ချင်း သိပ်နားမလည်သေးဘူး။ ဒါကြောင့် နှစ်ခေါက်လောက် ထပ်ဖတ်ဖြစ်တယ်။

    အဲဒီနောက်မှာ လာတဲ့ သဘောတူညီချက်လေးခု အပိုင်းက စလို့ တော်တော်လေး ရှင်းရှင်းလင်းလင်း ဖြစ်ပြီး ဆိုလိုတဲ့ အဓိပ္ပာယ်ကို တစ်ခါတည်း ကောင်းကောင်း နားလည်လာရတယ်။
    စာသားတွေကလည်း အသုံးအနှုန်းကြီးတွေ မဟုတ်ဘဲ ပေါ့ပေါ့ပါးပါး သုံးထားတော့ ဖတ်ပျော်တယ်။ ဒီတစ်ခန်း ဖတ်ပြီး နောက်တစ်ခန်းပါ ဆက်ဖတ်ချင်စိတ်ပေါ်မိတယ်။

    ပထမသဘောတူညီချက်ဖြစ်တဲ့ “စကား အမှား ကင်းပါစေ” မှာဆိုရင် ကိုယ့်စကားကြောင့် တစ်ပါးသူထိခိုက်သွားမှာ၊ စကားက မှော်ဆန်ပြီး စကားတစ်ခွန်းကြောင့် အဓိပ္ပာယ်အမျိုးမျိုး ပြောင်းပြီး တစ်ခြားသူအပေါ်မှာ ‌မကောင်းတဲ့ အကျိုး သက်ရောက်သွားမှုတွေ ဖြစ်သွားနိုင်တာကိုပါ ကျွန်တော်တို့ကို သိရှိစေပါတယ်။

    “ဘာကိုမှ ကိုယ့်အပူ ကိုယ့်ကိစ္စ မလုပ်နဲ့” ဆိုတဲ့ agreement မှာဆိုရင် တစ်ခြားသူတွေ ဘယ်လောက် ကိုယ့်ကို ဝေဖန်နေပါစေ သူ့အပူမို့ ကိုယ်နဲ့ မသက်ဆိုင်တဲ့ အကြောင်းကို ပိုပြီး သတိပြုမိလာခဲ့ရပါတယ်။

    “ရမ်းသမ်းကောက်ချက်မချပါနဲ့” မှာဆိုရင် အရာရာကို ရမ်းပြီး ကောက်ချက်မချဖို့၊ စိတ်အဆိပ်တွေအများကြီးကို မဖန်တီးမိစေဖို့ အသိပေးထားပါတယ်။ ဘာလို့ဆိုရင် ဒီလိုလုပ်ရပ်တွေက ကျွန်တော်တို့ကို နာကျင်စေပြီး ဒုက္ခပင်လယ်ထဲ နစ်စေပါတယ် ဆိုတဲ့ အချက်ကို ကျွန်တော် သေချာသတိထားမိနေလို့ပါ။

    “အမြဲတမ်း အကောင်းဆုံးလုပ်ပါ” ဆိုတဲ့ agreement မှာဆိုရင်လဲ ကိုယ် လုပ်နေတဲ့ အလုပ်ကို အသေးစိတ်ကအစ ကိုယ့်ရဲ့အကောင်းဆုံးအဆင့်ထိ လုပ်ဖို့ သိလာရတယ်။ ဒါဆို ကိုယ့်ကိုယ်ကိုယ်လည်း ကျေနပ်စေပြီး တခြားသူကိုယ်လုပ်ထားတဲ့ အရာ‌ကို မကောင်းပြောတာကို စိတ်ဆင်းရဲ‌နေစရာ မလိုတာကို သိလာစေပါတယ်။

    ဒီစာအုပ်လေးထဲမှာ ကျွန်တော့်ကို အမြဲ သတိတရရှိစေပြီး သတိပေးပေးနေတဲ့ စာစုလေးတွေ ရှိပါတယ်။

    “လူတိုင်းက ဘဝကိုကျွန်တော်တို့ မြင်သလိုပဲ မြင်ကြတယ်လို့ ကျွန်တော်တို့ ကောက်ချက်ချကြပါတယ်။ အခြားလူတွေက ကျွန်တော်တို့ တွေးသလိုတွေးကြတယ်၊ ကျွန်တော်တို့ ခံစားကြသလို ခံစားကြတယ်၊ ကျွန်တော်တို့ ဝေဖန်သလို ဝေဖန်ကြတယ်၊ ပြီးတော့ ကျွန်တော်တို့ အနိုင်ကျင့်သလို အနိုင်ကျင့်ကြတယ်လို့ ရမ်းသမ်းယူဆတတ်ကြပါတယ်။ ဒါဟာ လူသားတွေရဲ့ အကြီးမားဆုံးသော ရမ်းသမ်းကောက်ချက်ကြီးပဲဖြစ်ပါတယ်။” (စာ – ၇၀)

    “ဘယ်လိုအခြေအနေမျိူးမှာမဆို အမြဲတမ်း အကောင်းဆုံး လုပ်ပါ၊ ပိုလဲ မလုပ်နဲ့၊ လျှော့လဲ မလုပ်ပါနဲ့။ ဒါပေမဲ့ သင့်ရဲ့ အကောင်းဆုံး ဆိုတဲ့ အရာဟာ တစ်ကြိမ်နဲ့ တစ်ကြိမ်တော့ ဘယ်တော့မှ တူညီနေမှာ မဟုတ်ဘူး ဆိုတာကို သိထားပါ။”

    ဒီ ၂ ခုကိုတော့ ကျွန်တော် အကြိုက်ဆုံးပါပဲ။

    ပြီးတော့ စာအုပ်နာမည်နဲ့ စာအုပ်မျက်နှာဖုံးက ဒီစာအုပ်ကို ဖတ်ချင်လာအောင် ကျွန်တော့်ကို အရင်ဆုံး ဆွဲဆောင်မှုပေးခဲ့တာပါ။

    ဒီစာအုပ်လေးကို ခုလို ဘာသာပြန်ဆိုပေးတဲ့ ဆရာ့ကိုလဲ သိပ်ကျေးဇူးတင်မိပါတယ်။
    နောက်ထပ်စာအုပ်တွေကိုလဲ မျှော်နေပါတယ် ဆရာ။

    #ထက်ဘုန်းရှိန်
    #မင်းရဲ့ကိုယ်ပိုင်ပုံစံလေးအတိုင်းသာ
    #စာရိပ်မြိုင်

  2. Thiha Soe

    ခေါင်းစဉ်ရဲ့ အဓိပ္ပါယ်အတိုင်းပဲ ကိုယ့်ရဲ့ပုံစံလေးအတိုင်းပဲ နေဖို့က အရေးကြီးမှန်း ကျွန်တော်တို့ မေ့နေတတ်ကြတယ်။ လောကအမောတွေ၊ အပူတွေ၊ အတုအယောင်တွေကြားမှာ ကိုယ့်ရဲ့ပုံစံအမှန် ပျောက်သွားပြီး စိတ်ညစ်နေရတဲ့သူအဖို့ ဒီစာအုပ်လေးက နွေရာသီမှာ ခရီးသွားရင်း ရေချမ်းစင်လေး တွေ့လိုက်ရသလိုပဲ။ အမောပြေစေတယ်။ အေးချမ်းမှုကို ရှာဖွေဖို့ ကူညီပေးတယ်။ ရေအိုးထဲက ရေကို ကိုယ်တိုင်ယူသောက်မှ ရေငတ်ပြေသလို ဒီစာအုပ်လေးကို ဖတ်ကြည့်မှလည်း အနှစ်အရသာ အသိပညာရမှာဖြစ်လို့ အထူးသဖြင့် လူငယ်လေးတွေကို ဖတ်စေချင်တယ်။

    #ထက်ဘုန်းရှိန်
    #မင်းရဲ့ကိုယ်ပိုင်ပုံစံလေးအတိုင်းသာ

  3. Zan

    စာအုပ်ရဲ့ ခေါင်းစဉ်ကို မြင်ကတည်းက ဖတ်ချင်ခဲ့တဲ့စာအုပ်လေးတစ်အုပ်။ တခါတရံ နေရင်းထိုင်ရင်း စဉ်းစားမိတာက ငါတို့က ငါတို့ရဲ့ပုံစံအတိုင်း ငါတို့လုပ်ချင်တဲ့ အလုပ်ကို လုပ်နေတာလားပေါ့။ အဲ့လိုစဉ်းစားမိတာနဲ့ ဒီစာအုပ်ကလေးတွေ့တာနဲ့ တိုက်တိုက်ဆိုင်ဆိုင်ပဲ ဖတ်ဖြစ်သွားတဲ့ စာအုပ်လေး။ ပထမ စဖတ်ဖတ်ချင်းတော့ နည်းနည်းဖတ်ရတာ တမျိုးဖြစ်ပေမယ့် အပိုင်း(၃)လောက်ကနေစပြီး စာအုပ်ကို မချချင်တော့လောက်အောင် ဆွဲဆောင်မှုအပြည့်နဲ့။ စာကြောင်းတကြောင်းဖတ်လိုက်တိုင်း အပြင်မှာဖြစ်နေတာနဲ့ ထပ်တူကျနေတော့ တွေးလိုက်ဖတ်လိုက်နဲ့ စာအုပ်လေးက ဘယ်လိုပြီးလို့ ပြီးသွားမှန်း မသိအောင်ပါပဲ။ ဖတ်လို့ကောင်းယုံ မဟုတ်ဘဲ နေ့စဉ်ဘဝအတွက်၊ ကိုယ့်ဘဝအတွက် လုံးဝအသုံးဝင်မယ့် စာအုပ်လေးပါ။ ဖတ်ကြည့်ကြဖို့ တိုက်တွန်းပါတယ်။

လူကြီးမင်း၏ ဝေဖန်သုံးသပ်ချက်ကို မျှဝေပေးပါ...

Your email address will not be published. Required fields are marked *

ထက်ဘုန်းရှိန် စာအုပ်များ