လုပ်ငန်းခွင်မှာ တရားမှတ်နည်း

ယခုစာအုပ်သည် စာရေးသူမှ လွန်ခဲ့သော သုံးလေးနှစ်တာကာလ၌ မြန်မာနိုင်ငံအနှံ့အပြားတို့တွင် *Dhamma Workshop* တရားသက်တန်းများစွာကျင်းပဖြစ်ခဲ့သည်။ Mindfulness-based compassion and empathetic joy meditation* သတိပဋ္ဌာန်အခြေခံသော ကရုဏာ နှင့် မုဒိတာဘာဝနာကို ဗဟိုပြု၍ ဗုဒ္ဓမြတ်စွာဘုရား၏ စိတ်ပိုင်းဆိုင်ရာ အဆုံးအမများဖြင့် တင်ပြဟောပြောခဲ့ပါသည်။

ထိုတရားသင်တန်းများ၏ ရည်ရွယ်ချက်နှစ်ခုအနက် ပထမတစ်ခုမှာ လုပ်ငန်းခွင်များ၌ဗုဒ္ဓမြတ်စွာဘုရား၏ စိတ်ကို တိုက်ရိုက် လက်တွေ့ဆုံးမသည့်နည်းကို အသုံးပြု၍ စိတ်ဖိစီးမှုကိုင်တွယ်ခြင်း *stress management* ပြုလုပ်နိုင်စွမ်း ရှိကြရန်ဖြစ်သည်။ နောက်ရည်ရွယ်ချက်တစ်ခုမှာ မိမိနှင့် သူတစ်ပါး စိတ်ခံစားမှု *emotion* ကို ပိုမိုသတိပြု နားလည်စေရန်ဖြစ်ပါသည်။

ထိုတရားသင်တန်းများသည် သုံးလေးနှစ်တာကာလအတွင်း၌ နာရီပေါင်း နှစ်ထောင်နီးပါးမျှ အချိန်အသုံးပြု ပို့ချခဲ့ရာ ပို့ချချက်များမှ ကောက်နှုတ်၍ စာအုပ်များထုတ်ဝေခဲ့ပါသည်။ ယခုစာအုပ်သည်လည်း ထိုတရားသင်တန်းတို့၌ ထည့်သွင်းလေ့ကျင့်ခဲ့သော တရားထိုင်နည်းအများစုကို စုပေါင်းထားခြင်းဖြစ်သည်။