မျက်ကွယ်မြစ်

ဇမ္ဗူဒီပါ လကျ်ာတောင်ကျွန်း နိမိတ်ထွန်းတယ်လို့ဆိုကြသလို တစ်ချို့သောနှုတ်ထွက်စကားတွေဟာ နိမိတ်ဖြစ်သွားတတ်ပြီး၊တစ်ချို့သောနှုတ်ထွက်စကားတွေဟာ ကျိန်စာဖြစ်လာတတ်တယ်လို့ တွေးစရာဖြစ်လာတယ်ဆိုရင် မျက်ကွယ်မြစ်ဟာ အဲဒီနိမိတ်နဲ့ကျိန်စာတွေအတွက် သက်သေအဖြစ် ရောက်သွားလေမလား ..

ကြည့်နေသည်ဖြစ်စေ၊ကြည့်မနေသည်ဖြစ်စေ၊ မြင်ကြသည်ဖြစ်စေ၊မမြင်ကြသည်ဖြစ်စေ၊ မြစ်ကတော့ စီးဆင်းမြဲ စီးဆင်းနေမည်သာ ဖြစ်လေသည် ..ကြက်တိုက်ခြင်းကို ဝါသနာကြီးပြီး ကြက်နဲ့ပဲအချိန်ကုန်ကာ အိမ်အလုပ်၊အိမ်စီးပွားရေးကို စိတ်မဝင်စားတဲ့အစ်ကို ..

အိမ်အလုပ်ရော၊အိမ်စီးပွားရေးကိုရော မိဘနှစ်ပါးနဲ့အတူ မနားမနေ လုပ်ကိုင်ရုန်းကန်နေရတဲ့ နှမ ..
အစ်ကို့ကိုထိရင် ဆတ်ဆတ်ထိမခံတုန့်ပြန်တတ်ပေမယ့် အိမ်မှာကတော့ တစ်စက်ကလေးမှမတည့်ကြတဲ့မောင်နှမနှစ်ယောက် ..

နှမဖြစ်သူယောကျ်ားရသွားပြီးတဲ့နောက် အစ်ကိုဖြစ်သူရဲ့ကြမ္မာအလှည့်အပြောင်းမှာ ခါးသီးနာကျင်စရာ
ဖြစ်လာခဲ့သလို၊နှမဖြစ်သူရဲ့ကံကြမ္မာအလှည့်အပြောင်းကလည်း ရင်ကွဲစရာအဖြစ် သူတို့မောင်နှမဆီကို ဆိုက်ဆိုက်မြိုက်မြိုက်ရောက်ရှိလာခဲ့တယ် ..နှလုံးသားမြစ်သည်ကား ဒိုက်သရိုက်တွေ၊အတားအဆီးတွေကြားကနေ တွန်းတိုက်ထိုးဖောက်ကာ မျက်မြင်၊မျက်ကွယ် မခွဲမခြား ကျော်လွန်စီးဆင်းနိုင်သော မြစ်ဖြစ်လေသည် ..နာကျင်ကြေကွဲဖွယ်ရာတွေကြားကနေ ယိုစိမ့်လာတဲ့မေတ္တာဟာ မိုးမှောင်ကြီးထဲ ပြက်လိုက်တဲ့လျှပ်စီးလိုဖျတ်ခနဲ တောက်ပလင်းလက်သွားတယ် ..မောင်နှမနှစ်ယောက်ရဲ့ရင်နင့်ကြေကွဲဖွယ်ရာ ဘဝဇာတ်ကြောင်းအလှည့်အပြောင်းဟာ မမျှော်လင့်တဲ့လောကဓံရဲ့ပြင်းထန်သောလှည့်ကွက်တွေအောက်မှာမျက်ကွယ်မြစ်အဖြစ် ဖြစ်တည်လာပါတယ် …..