ထိမ်းမြားမင်္ဂလာ

Nicholas Sparks ရဲ့ Note Book (ဆရာတင်မောင်မြင့်က အချစ်မှတ်တမ်း အမည်ဖြင့် ဘာသာပြန်ပြီး) ကိုဖတ်ဖူး၊ ရုပ်ရှင်အဖြစ်ကြည့်ဖူးသူတွေ အယ်လီနဲ့ နိုဝါတို့ကို စွဲလမ်းနေကြဦးမှာပါ။ အထူးသဖြင့် သူတို့နှစ်ယောက်ရဲ့ အင်အားကြီးတဲ့အချစ်နဲ့ လှလှပပ ကြေကြေကွဲကွဲဇာတ်သိမ်းပေါ့။ အခုစာအုပ် Wedding က Note Bookရဲ့ အဆက်လို့ မပြောနိုင်ပေမဲ့ ကျွန်တော်တို့ စွဲလမ်းခဲ့တဲ့ အချစ်ကြီးသူကြီးနိုဝါကို ဇာတ်ကောင်တစ်ယောက်အနေနဲ့ အလွမ်းပြေ ပြန်တွေ့ရမယ့် ဇာတ်လမ်းလို့ ပြောနိုင်ပါတယ်။

အခုဇာတ်လမ်းက နိုဝါရဲ့ ပထမမျိုးဆက်ဂျိန်းနဲ့ ဝီလ်ဆင်တို့ရဲ့ ခမ်းနားတဲ့အချစ်သက်သေပြပွဲလို့ ဆိုနိုင်သလို နိုဝါရဲ့ ဒုတိယမျိုးဆက် အင်နာရဲ့ အချစ်ဇာတ်လမ်းလည်းဖြစ်ပါတယ်။ နိုဝါနဲ့ အယ်လီတို့ရဲ အချစ်မှတ်တမ်းမှာ ငန်းဖြူကြီးတွေက အချစ်သင်္ကေတတစ်ခုဖြစ်ခဲ့တယ်ဆိုရင် အခုဇာတ်လမ်းမှာလည်း ရင်ဘတ်မှာအနက်ကွက်နဲ့ ငန်းဖြူကြီးတစ်ကောင်က နိုဝါရဲ့ အထီးကျန်အဖေါ်မွန်အဖြစ် ပါဝင်နေပါတယ်။ နိုဝါနဲ့ အဲ့ဒီ ငန်းဖြူကြီးရဲ့ ဆန်းကြယ်ပြီးအသိရခက်တဲ့ ဆက်သွယ်မှုက စိတ်ဝင်စားဖွယ်ကောင်းသလို ဒါကပဲ အယ်လီ့အပေါ် နိုဝါရဲ့ စွဲလမ်းမှုအချစ်သင်္ကေတလို့ ဆိုရလေမလား။ ပရိသတ်က အဖြေရှာကြည့်ဖို့ပါ။ဆရာတင်မောင်မြင့် ဘာသာပြန်တဲ့ Wedding (ထိမ်းမြားမင်္ဂလာ)ကို အဆုံးထိဖတ်ပြီးချိန်မှာ အသေအချာပြောနိုင်တာတစ်ခုကတော့ အချစ်ဆိုတာ ကျွန်တော်တို့နားလည်ထားတာထက် ပိုတဲ့ လျှို့ဝှက်မှုတွေ၊ နူးညံ့မှုတွေ၊ ခမ်းနားမှုတွေ၊စွမ်းအားကြီးမှုတွေ ရှိတယ်ဆိုတာပါပဲလေ။