အချစ်နှင့်စိတ်

( 1 မှတ်ချက်)

2500 (ကျပ်)

လူသားသဘာဝရဲ့ ခွန်အားအပြင်းဆုံး အချစ်စိတ်အကြောင်းကို စိတ်ပညာရှုထောင့်နဲ့ယှဉ်ပြီး အရိုးရှင်းဆုံးအကြောင်းအရာကို အဆန်းကျယ်ဆုံး ရှင်းပြထားတဲ့စာအုပ်ဖြစ်ပါတယ်။
-တရုတ်စိတ်ပညာစာရေးဆရာမXiao Yubing ရေးသားထားတဲ့ ”အချစ်၊ အိမ်ထောင်ရေး အမျိုးသမီးတစ်သက် သင်ယူရတဲ့အရာ” ဆိုတဲ့ စာအုပ်ကို ဘာသာပြန်ထားတာဖြစ်ပါတယ်။ ဒီစာအုပ်ထဲမှာ အချစ်နဲ့ပတ်သက်တဲ့ စိတ်ပညာရှုထောင့်တွေကို ဖတ်ရမှာပါ။ လူတိုင်းမှာ အနုစားစိတ်ဝေဒနာတစ်မျိုးစီ၊ စိတ်ခံစားချက်တစ်မျိုးစီ၊ စွဲလမ်းမှုတစ်မျိုးစီရှိတတ်ကြပါတယ်။ ကိုယ်ကိုယ်တိုင်တောင်မှမသိတဲ့စိတ်အခြေအနေများအကြောင်းကိုရေးသားထားပါတယ်။
-ဆရာမရဲ့ ပရိတ်သက်တွေ (အထူးသဖြင့် မိန်းကလေး စာဖတ်ပရိသတ်တွေ) အတွက် စောင့်မျှော်ဖတ်ရှုရကျိုးနပ်စေမယ့်စာအုပ်ကောင်းဖြစ်ကြောင်း ရိုးရိုးရှင်းရှင်းလေးသာ ညွှန်းဆိုလိုက်ပါရစေ။

စာမျက်နှာ

226

စာအုပ်အရွယ်အစား

4.9 x 0.5 x 7.2 inches

ပုံနှိပ်မှတ်တမ်း

SYNERGY Publications စာပေ၊ 2019 မတ်လ၊ (ပ-ကြိမ်)

9 in stock

အချစ်နှင့်စိတ် အား ဝေဖန်သုံးသပ်မှု 1 ရှိပါသည်။

  1. မအိမ့်အိမ့်ထူးအောင်

    #အချစ်နှင့်စိတ်
    #နိုင်းနိုင်းစနေ
    #price-2500MMK

    “အချစ် နှင့် စိတ်”တဲ့။

    အချစ်ဟာ နှလုံးသားက ဖြစ်တည်လာတယ်။
    စိတ်ဆိုတာ ဦးနှောက်က မြစ်ဖျားခံလာတယ်။
    အချစ် နဲ့ စိတ်ဟာ ဘယ်လိုဆက်စပ်မှု ရှိလေသလဲ…။

    တကယ်တော့ လူတစ်ယောက်ကို ဦးနှောက်နဲ့
    စဥ်းစားပြီး ချစ်တာ၊ လက်ထပ်တာဟာ ဂုဏ်ရွှေငွေ စည်းစိမ်ချမ်းသာကို ကြည့်ပြီး ရွေးချယ်ခိုင်းတာမျိုး မဟုတ်ပါဘူး။ ကိုယ်နဲ့ ဘဝတစ်လျှောက်လုံး အတူလက်တွဲသွားမယ့်သူဟာ လူရည်လူသန့်ဟုတ်ရဲ့လား၊ ကိုယ့်အပေါ် တစ်သက်လုံး နားလည်မှုရှိပေးနိုင်ပါ့မလား၊ သေသည်အထိ သစ္စာရှိပေးနိုင်ပါ့မလားဆိုတာတွေအတွက် ဆန်းစစ်အကဲဖြတ်တတ်ဖို့ စဥ်းစားခိုင်းတာမျိုးကို ဆိုလိုတာပါ။ ဒါဆို
    အချစ်ဆိုတာရဲ့ ဘေးချင်းကပ်ရက်မှာ ဦးနှောက်ရဲ့ မှန်ကန်တဲ့ စိတ်ပိုင်းဖြတ်မှုလေးတွေ အတူယှဥ်တွဲ ကပ်လိုက်သင့်တယ်ဆိုတာကိုရော လက်ခံရဲ့လား…။

    ကမ္ဘာပေါ်က ရှိရှိသမျှလူတွေရဲ့ ၉၉%ကတော့
    အချစ်ဆိုတဲ့အရာကို ခံစားတွေ့ကြုံဖူးမယ် ထင်ပါရဲ့နော်။ အဲ့ဒီ၉၉%သော လူအားလုံးကရော တစ်စုံတစ်ယောက်ကို ချစ်မိတဲ့အခါ အမြဲအဆင်ပြေနေတဲ့ relationship မျိုး ပိုင်ဆိုင်ကြရဲ့လား။ ဒါမှမဟုတ် လုံးဝဆက်ပြီးမဖြစ်နိုင်တော့တဲ့
    ဆက်ဆံရေးတစ်ခုကို မှန်ကန်တဲ့ ဆုံးဖြတ်ချက်တစ်ခုနဲ့ ကိုယ့်ဘက်ကနေ အရင်စပြီး ပြတ်ပြတ်သားသား လွှတ်ချနိုင်ကြရဲ့လား။ တကယ်လို့ အဆင်မပြေတာတွေကြုံနေပေမယ့် အဲ့ဒီမှန်ကန်တဲ့ ဆုံးဖြတ်ချက်တစ်ခုကို ဘယ်လိုချရမလဲ မသိတဲ့အခါ…၊ ရဲရဲဝင့်ဝင့် လွှတ်ချနိုင်ခဲ့ပေမယ့် နှလုံးသားမှာ အမာရွတ်သေးသေးလေး ကျန်ရစ်ခဲ့တဲ့အခါ…၊ ဘယ်လိုရှေ့ဆက်သွားရမလဲဆိုတာကို စိတ်ပညာရှင်တစ်‌ယောက်ရဲ့ ဆွေးနွေးကုသပေးမှုကို ခံယူနိုင်ဖို့ ဒီ “အချစ်နှင့်စိတ်” ဆိုတဲ့ စာအုပ်လေးကို ဖတ်ကြည့်ကြဖို့ တိုက်တွန်းချင်ပါတယ်။

    ဒီစာအုပ်လေးရဲ့ မူရင်းကတော့ တရုတ်စိတ်ပညာရှင် စာရေးဆရာမ Xiao Yubingက သူမဆီ လာရောက်ဆွေးနွေးကုသမှုခံယူကြတဲ့ အချစ်‌ဝေဒနာရှင် မိန်းကလေးတွေရဲ့ ကုသမှု မခံယူခင်နဲ့ ခံယူပြီးရှိနေတဲ့ အတွေ့အကြုံတွေကို အခြားအလားတူမိန်းကလေးတွေအနေနဲ့ သင်ခန်းစာရယူနိုင်ကြဖို့ ရေးသားထားတဲ့ “အချစ်၊ အိမ်ထောင်ရေး၊ အမျိုးသမီးတစ်သက် သင်ယူရတဲ့ အရာ” ဆိုတဲ့ စာအုပ်ပဲ ဖြစ်ပါတယ်။

    ဒီစာအုပ်လေးကို ဘာသာပြန်ပေးသူက ကျွန်မအမြဲအားပေးဖတ်ရှုဖြစ်တဲ့ ဆရာမ နိုင်းနိုင်းစနေပဲ ဖြစ်ပါတယ်။ ဒီစာအုပ်လေးဟာ ဆရာမရဲ့ အခြားစာအုပ်တွေနဲ့မတူဘဲ အရမ်းလေးနက်ပြီး ဖန်တီးမှုချင်းလည်းကွာတယ်လို့ ခံစားရပါတယ်။ စာအုပ်တန်ဖိုး ၂၅၀၀ထက်ပိုပြီး ကိုယ့်ရဲ့စိတ်ခံစားချက်ဝေဒနာတွေကို စိတ်ပညာရှင်ဆရာမနဲ့ အပြင်မှာဆွေးနွေးကုသမှုခံယူနေတယ်လို့ ခံစားမိလောက်အောင်
    သိပ်ကို တန်ဖိုးကြီးမားလွန်းပါတယ်။

    အချစ်ကို ထိတွေ့ဖူးကြသူတွေထဲမှာ ဆုံစည်းခဲ့ရတဲ့ အကြောင်းပြချက်ချင်းလည်း ကွာမယ်။ လက်ပြနှုတ်ဆက်ခဲ့ရတဲ့ ရည်ရွယ်ချက်ချင်းလည်း ကွာမယ်။ ပြဿနာရဲ့ အဓိက တရားခံချင်းလည်း ကွာနိုင်ပါသေးတယ်။ တခါတလေမှာ ကိုယ်က နာကျင်ရသူဖြစ်ပေမယ့် နာကျင်စေမယ့်အရာကို လုပ်တဲ့သူဟာလည်း ကိုယ်ပြန်ဖြစ်နေတတ်တာမျိုးပေါ့…။

    ချစ်ခြင်းမေတ္တာနဲ့ ပါတ်သတ်ပြီး မှားယွင်းတဲ့ ခံယူချက်အစွဲအလန်းတွေ၊ ယုံကြည်မှုမရှိတတ်တာနဲ့ ယုံကြည်မှု ပြင်းထန်လွန်းတာတွေ၊ ကိုယ့်ကြောင့်ပဲဖြစ်ဖြစ် တစ်ဖက်လူကြောင့်ပဲဖြစ်ဖြစ် ပြတ်စဲသွားတဲ့ ဆက်ဆံရေးတစ်ခုရှိပြီးနောက်ပိုင်း ဘယ်လိုရှေ့ဆက်သွားမလဲ မသိတာတွေ၊ ဒါတွေအတွက် ဒီစာအုပ်လေးဟာ စိတ်မှာထင်ကျန်နေခဲ့တဲ့ အမာရွတ်သေးသေးလေးကို စွဲနှုတ်ယူပေးမယ့် ကုသမှုတစ်ခု ဖြစ်စေမှာပါ။

    လောကကြီးမှာ တစ်ခါတစ်လေကျ ကျွန်မတို့ မထင်မှတ်ထားတဲ့၊ မယုံကြည်ထားတဲ့ အဖြစ်အပျက်တွေအများကြီးဟာ ကိုယ်ကိုယ်တိုင်ရဲ့ အတ္တစွဲတစ်ခုကြောင့် ဖြစ်တတ်ပါသေးလားဆိုတာကို ဒီစာအုပ်လေးဖတ်ပြီး သိလိုက်ရတယ်။ ဥပမာပြောရရင်-ကိုယ်ငယ်ငယ်က မိသားစုမေတ္တာကို လိုချင်ရင် ကိုယ့်ရဲ့ စိတ်နဲ့ခန္ဓာတစ်ခုခုမှာ ဒဏ်ရာအနာတရဖြစ်အောင် လုပ်ပြီးမှ ရရှိတတ်လို့ အသက်ကြီးသည်အထိ တစ်စုံတစ်ယောက်ရဲ့ ချစ်ခြင်းမေတ္တာကို ပိုင်ဆိုင်ခွင့်ရချင်လာရင် ကိုယ့်ကိုယ်ကိုယ် နာကျင်အောင်(တခါတရံ အသက်ဆုံးရှုံးတတ်သည်အထိဖြစ်အောင်) အမှားတွေ ခဏခဏ တမင်ပြုလုပ်မိတတ်တာမျိုးပေါ့။ ဒါပေမဲ့လည်း ဒီအပြုအမူကို ကိုယ်ကိုယ်တိုင်က အမှားတစ်ခုလို့ မသတ်မှတ်မိတဲ့အခါ ကိုယ်လိုချင်တဲ့ ချစ်ခြင်းမေတ္တာတွေနဲ့ ဂရုစိုက်ကြင်နာမှုတွေအားလုံးဟာ ကိုယ့်ရဲ့အဝေးကြီးဆီကိုပဲ ထွက်ပြေးသွားတတ်ကြတယ်။ အဲ့ဒီအခါ လိုချင်လေ မပိုင်ဆိုင်ရလေဖြစ်လာပြီး အချစ်နှင့်စိတ်ရဲ့ ပဋိပက္ခတွေကြားမှာ ကိုယ်ဟာ လမ်းပျောက်လာတတ်တယ်။ ဒီလိုအလားတူဖြစ်ရပ်မျိုးတွေ ကမ္ဘာလောကကြီးမှာ အများကြီး ရှိနေဆဲပါပဲ။ ဒါကြောင့် ဒီစာအုပ်လေးကိုသာ ဖတ်ဖူးထားရင် ဒီလိုအမှားတွေကို ထပ်မလုပ်မိအောင် သင်ခန်းစာယူနိုင်မှာပါ။

    အချစ်နဲ့ပါတ်သတ်လာရင် မိန်းကလေးတွေက over-thinking ဖြစ်လွန်းတယ်။ ဒါကလည်း မိန်းကလေးတွေဆိုတာ တစ်ခုခုဆိုရင် အရင်ဆုံး အပြစ်တင်ခံရဆုံးလူသားတွေလိုဖြစ်နေတော့ ကျွန်မတို့မိန်းကလေးတွေ စဥ်းစားလွန်းတာကို အပြစ်တစ်ခုလို့လည်း မဆိုလိုချင်ပါဘူး။ ဒါပေမဲ့လည်း လူတိုင်း အချစ်ကို တစ်ချိန်မဟုတ်တစ်ချိန်မှာ ရှောင်တိမ်းနေနိုင်ဖို့ မသေချာဘူးဆိုရင် အချစ်ကို မတွေ့ခင် အချိန်ယူစဥ်းစားတာရယ်၊အချစ်ကိုတွေ့နေစဥ် အဆင်ပြေပြေဖြစ်အောင် ဆက်ဆံတတ်တာရယ်၊ အချစ်ကို ဘဝတစ်လျှောက်လုံး ရေရှည်တည်မြဲအောင် ထိန်းသိမ်းနိုင်တာရယ်အတွက်က အချစ်ရဲ့သဘောသဘာဝနဲ့ ကိုယ်ကိုယ်တိုင်ရဲ့ စိတ်အခြေအနေကို ဂဃနဏ အကောင်းမွန်ဆုံး သိနေဖို့က အရမ်းအရေးကြီးတယ် မဟုတ်လားလေ…။

    လောကကြီးမှာ စိတ်ပညာရှင်တွေကလွဲရင် မိန်းကလေးတွေအနေနဲ့ အဖြေရှာရခက်တဲ့
    အချစ်နဲ့စိတ်ရဲ့ ပြဿနာတွေ အများကြီး ရှိတတ်ကြတယ်…။
    အိမ်ထောင်ကျပြီးတဲ့အချိန်ထိ အချစ်ဦးကို ခဏခဏ သတိရနေတုန်းပဲလား…၊
    တစ်စုံတစ်ယောက်ကြောင့် ကျခဲ့ရတဲ့ မျက်ရည်တွေကို ခမ်းခြောက်စေဖို့ နောက်ထပ်အခြားတစ်စုံတစ်ယောက်အပေါ် ချစ်ချင်ယောင်ဆောင်ပြီး ဓားစာခံသဘောမျိုး လုပ်လိုက်မိတာလား…၊
    ရွေးချယ်ရခက်နေတဲ့ လူနှစ်ယောက်ကြောင့် ကိုယ့်တစ်ဘဝလုံးစာအတွက် ကိုက်ညီမယ့် လက်တွဲဖော်တစ်ယောက်ကို လက်လွှတ်လိုက်ရတာလား…၊
    ဒုက္ခတွင်းထဲကနေ ကယ်ဆယ်ယောင်ဆောင်ခဲ့တဲ့ အချစ်လူဆိုးတစ်ယောက်ကြောင့် အဆိုးတွေကို ဆိုးတယ်လို့ မမြင်နိုင်ဘဲ ကိုယ်ကချည်း အနစ်နာခံပေးဆပ်နေရတဲ့ အချစ်မျိုးကို ပိုင်ဆိုင်နေတာလား…၊
    ကိုယ်ဟာ ကလေးဆန်ဆန် ဆိုးနွဲ့တတ်တဲ့သူမို့ အမြဲတမ်း ကိုယ်ကချည်း အနိုင်ယူခဲ့မိလို့ တစ်ဖက်လူက သည်းမခံနိုင်တဲ့အတိုင်းအတာအထိရောက်သွားပြီး ပစ်ထားတာကို ခံခဲ့ရတာလား…၊
    လူတစ်ယောက်ကို ကိုယ်ကချည်း အရမ်း ဂရုတစိုက်နဲ့ ကြင်ကြင်နာနာ ဖေးဖေးမမ ဆက်ဆံပေး၊ ပြုစုယုယပေးနေမှ တစ်ဖက်လူက ကိုယ့်ကို အမြဲသစ္စာရှိမယ်လို့ လွဲမှားစွာ
    ထင်မှတ်မှားခဲ့ခြင်းက တစ်ဖက်လူအတွက် ဖိအားနဲ့ စိတ်ဖိစီးမှုတွေ ဖြစ်စေခဲ့လို့ သူ့ကို အဝေးကို တွန်းပို့သလိုဖြစ်သွားခဲ့တာလား…၊
    ကိုယ့်ရဲ့ သိမ်ငယ်မှုကြောင့် ဖြစ်နေတဲ့ အငုံ့စိတ်တစ်ခုနဲ့ လူတိုင်းကို သံသယအကြည့်တွေ ကြည့်တတ်တဲ့ မိန်းက‌လေးဟာ ချစ်သူအပေါ်ကိုလည်း သံသယစိတ်လွန်ကဲစွာ ဆန်းစစ်လွန်းတဲ့အခါ အဲ့ဒီအချစ်ရေးဟာ အဆင်ပြေပြေရှည်ကြာနိုင်ဦးမလား…၊
    ငယ်စဥ်အခါက လိင်ပိုင်းဆိုင်ရာ နှောင့်ယှက်ခံရမှုတစ်ခုကြောင့် လိင်ကွဲကြောက်စိတ်ဖြစ်နေတဲ့ ကောင်မလေးတစ်ယောက်အနေနဲ့ အရွယ်ရောက်လာတဲ့အခါ ကောင်လေးတစ်ယောက်ကို ချစ်တဲ့စိတ်ဖြစ်လာရင်တောင် လက်ထပ်နိုင်ဦးမယ်လို့ တစ်ထစ်ချပြောရဲပါသလား…၊
    အလုပ်အကိုင်နဲ့ နေ့စဥ်ဘဝမှာ အောင်မြင်ပျော်ရွှင်နေပေမယ့် အချစ်ရေးမှာတော့ တစ်ကြိမ်တစ်ခါ အသည်းကွဲခဲ့ဖူးရုံနဲ့ ထပ်ကျရှုံးမှာကြောက်လို့ အချစ်ကိုအမြဲလျစ်လျူရှုထားမိခဲ့တဲ့ မိန်းကလေးတစ်ယောက်ဖြစ်နေပြီလား…၊
    ဒါတွေအားလုံးဟာ မိန်းကလေးတွေ တစ်ယောက်မဟုတ်တစ်ယောက် ကြုံတွေ့ခံစားဖူးခဲ့တဲ့ အချစ်နဲ့သက်ဆိုင်တဲ့ ပြဿနာတွေပါ။
    ဒါတွေကို ဖြေရှင်းနိုင်ဖို့အတွက်က စိတ်ပိုင်းဆိုင်ရာအခြေအနေကို အလုံးစုံ နားလည်မှုရှိပေးနိုင်တဲ့ စိတ်ပညာရှင်တွေနဲ့ ဆွေးနွေးအဖြေရှာကြည့်မှ ဖြစ်မှာပါ။ ဒါပေမဲ့လည်း အချစ်ကြောင့် စိတ်ဝေဒနာအနည်းအကျဥ်းရခဲ့သူဖြစ်နေရင်တောင် အခြေအနေအရ စိတ်ပိုင်းဆိုင်ရာပြန်လည်ကုသမှုခံယူတာမျိုး မလုပ်နိုင်ဘူးဆိုရင် ဒီစာအုပ်လေးကို ဖတ်ကြည့်ပါ….၊ ဒီစာအုပ်လေးက တစ်ထောင့်တစ်နေရာကနေ ဆေးတစ်ခွက်လို အထောက်အပံ့တစ်ခုဖြစ်စေမယ်လို့ ယုံကြည်စွာ ပြောရဲပါတယ်။

    ဒါ့အပြင် ဒီစာအုပ်လေးဖတ်ပြီး သိလိုက်ရတာက…
    မိန်းကလေးတွေအနေနဲ့ တစ်ယောက်ယောက်ကိုဆိုရင် သေချာဆန်းစစ်ယုံစားပြီးမှ သနားကြဖို့၊
    အချစ်အတွက်နဲ့ ကိုယ့်ကိုယ်ကိုယ်တောင် ပျောက်ဆုံးစေပြီး အရာရာပေးဆပ်ကြတာမျိုး မလုပ်ကြဖို့၊ ကိုယ့်ကိုယ်ကိုယ် ပြီးပြည့်စုံအောင် စိတ်ပင်ပန်းခံပြီး ကြိုးစားရုံတင်မက ကိုယ့်လက်တွဲဖော်ကိုပါ အတင်းတိုက်တွန်းကြတာမျိုး မဖြစ်စေဖို့ သတိထားပြုမူသင့်တယ်ဆိုတာတွေ သိလိုက်ရပါတယ်။

    မိန်းကလေးတွေအတွက် အဓိကအနေနဲ့ အရေးကြီးဆုံးကတော့ ကိုယ့်ကိုယ်ကိုယ် လေးစားမှုရှိအောင် ကိုယ့်တန်ဖိုးကိုယ် အမြင့်ဆုံးသတ်မှတ်ပြီး ယုံယုံကြည်ကြည်ရဲရဲဝင့်ဝင့်နဲ့ ကိုယ့်ဘဝကို အကောင်းဆုံးတည်ဆောက်ပါ။ ကိုယ့်ကိုယ်ကိုယ် လေးစားအထင်ကြီးမှုနဲ့ ကျေနပ်အားရမှုလို့ခေါ်တဲ့ self-esteem သာ ကိုယ့်ရင်ထဲမှာ ကိန်းအောင်းနေအောင် လုပ်ဆောင်နိုင်ပြီဆိုရင် ကိုယ့်ကိုယ်ကိုယ်သိမ်ငယ်ပြီး သူတစ်ပါးကိုအထင်သေးတာမျိုး၊ သံသယဝင်တာမျိုး ဖြစ်ဖို့ဆိုတာလည်း အတော့်ကို ခဲယဥ်းသွားမှာပါ။ ကိုယ်ကိုယ်တိုင်ကသာ ကိုယ်ဘာလိုချင်သလဲ၊ ဘာဖြစ်ချင်သလဲဆိုတာကို တိတိကျကျနားလည်ပြီး ကိုယ့်စိတ်နေသဘောထားကို ထိန်းညှိနိုင်ရင် (အသည်းကွဲခဲ့ဖူးရင်လည်း ဘာကြောင့်အသည်းကွဲတယ်ဆိုပြီး သင်ခန်းစာယူနိုင်ရင်) ကိုယ့်အတွေးနဲ့သင့်တော်မယ့်၊ ထပ်တူကျမယ့် အချစ်မျိုးကို ပိုင်ဆိုင်ရမယ့်အပြင် ကိုယ်ရည်မှန်းထားတဲ့ အနာဂတ်ဘဝလမ်းကိုလည်း သာယာဖြောင့်ဖြူးစွာ လျှောက်လှမ်းသွားနိုင်မှာ အသေအချာပါပဲ…။

    ဒါကြောင့် ပြောချင်တာကတော့ အချစ်ရဲ့ အသီးအပွင့်ကို ခံစားချင်ရင်၊ ချစ်ရမယ့် အခွင့်အရေးရှိရင် ချစ်ရမှာကို မကြောက်ရွံ့မိဖို့ ဒီစာအုပ်လေးကို ဖတ်ကြည့်ကြပါလို့ တိုက်တွန်းချင်ပါတယ်။ တစ်ခုပြောစရာရှိတာကတော့ စာအုပ်ပါအကြောင်းအရာတွေဟာ ဖြစ်ရပ်မှန်တွေကို အခြေခံထားတဲ့အတွက်ရော၊ မိန်းကလေးတွေတစ်သက်တာ သင်ယူရမယ့်အရာဆိုပြီး ရည်ညွှန်းထားတဲ့အတွက်ရောမို့ မိန်းကလေးတွေအတွက် ဖတ်ဖို့ပိုပြီးသင့်တော်ပေမယ့် ယောကျ်ားလေးတွေလည်း
    ကိုယ့်ချစ်သူကို နားလည်မှုနဲ့ သစ္စာရှိမှုတွေ အချိန်အကြာကြီးပေးနိုင်သူတွေဖြစ်အောင် ကြိုးစားကြည့်ချင်ရင်‌တော့ စိတ်ဝင်စားရင် ဖတ်ကြည့်ပါလို့ တိုက်တွန်းချင်ပါတယ်ရှင်။
    .
    .
    .
    #ချစ်ခင်လေးစားစွာဖြင့်
    #အိမ့်
    Mon, Aug 31, 2020

လူကြီးမင်း၏ ဝေဖန်သုံးသပ်ချက်ကို မျှဝေပေးပါ...

Your email address will not be published.

နိုင်းနိုင်းစနေ စာအုပ်များ