ဘဝအိုအေစစ်

( 3 မှတ်ချက်)

4500 (ကျပ်)

• ကျွန်တော်တို့ တော်တော်များများဟာ ဘဝရဲ့ အထုအထောင်းတွေကို ခံရတဲ့အခါ ပြဿနာတွေကို လျှစ်လျူရှု့ပြီး ကိုယ့်ခေါင်းထဲမှာပဲ အတွေးတွေနဲ့ တဝဲဝဲလည်နေတတ်ကြတော့တယ်။ ဒါကြောင့်ပဲ ရေရှည်မှာ စိတ်ဖိစီးမှုတွေ၊ ‌စိုးရိမ်မှုတွေ တရိပ်ရိပ် မြင့်တက်လာရော။

• တချို့ကျတော့ ဘဝက ကြမ်းလေ အလုပ်မှာပိုကြိုးစား၊ ကျောင်းစာမှာ ပိုကြိုးစားကြလေ။ ဒီလိုလုပ်ခြင်းဖြင့် သူတို့အတွက်ရော သူတို့ချစ်ခင်ရသူတွေအတွက်ပါ ရေရှည်မှာ ပျော်ရွှင်စေလိမ့်မယ်လို့ မျှော်လင့်ချက်ထားကြတယ်။

• တစ်ယောက်တည်းနေ တစ်စိတ်တည်းထားရင်ကော မကောင်းဘူးလား။ လေယာဉ်ပေါ်မှာ ကိုယ့်အောက်ဆီဂျင်ဘူးကို အရင်တပ်ပြီးမှ သူများကို ကူညီပါလို့ အကြံပေးသလို ကျွန်တော်တို့ဟာလည်း ကမ္ဘာကြီးနဲ့ အသားမကျခင် မိမိကိုယ်နဲ့စိတ်ကို အရင် အသားကျအောင် ကြိုးစားဖို့လိုပါတယ်။

• ဗုဒ္ဓဘာသာ ဘုန်းတော်ကြီး ဟေမန်ဆူနမ်က သူ့ရဲ့ ပထမဆုံးထုတ်တဲ့ရောင်းအားအကောင်းဆုံးစာအုပ်ဖြစ်တဲ့ “The Things You Can See Only When You Slow Down” “ငြိမ်းချမ်းမှုကိုရှာဖွေခြင်း” စာအုပ် နောက်ဆက်တွဲအဖြစ် ထုတ်ဝေတဲ့ ယခုစာအုပ်မှာတော့ မိမိကိုယ်ကို ဂရုစိုက်ဖို့အ‌ရေးကြီး‌ကြောင်းကို သူ့ရဲ့ မြော်မြင် ကြင်နာမှုကို အခြေခံပြီး ပြောပြထားပါတယ်။ ကိုယ့်ရဲ့ အမှားတွေကို အရှိအတိုင်း လက်ခံခြင်းဖြင့်သာ ကိုယ့်ရဲ့ မိတ်ဆွေ၊ မိသားစု၊ အိမ်ထောင်ဘက်တို့နဲ့ ကောင်းမွန်ပြည့်စုံတဲ့ ဆက်ဆံရေးတွေ တည်ဆောက်နိုင်မှာ ဖြစ်ကြောင်းလည်း တင်ပြထားပါတယ်။

စာမျက်နှာ

192

စာအုပ်အရွယ်အစား

5.5 × 0.5 × 8.2 inches

ပုံနှိပ်မှတ်တမ်း

ပန်းဆက်လမ်းစာပေ၊ 2022 မတ်လ (ဒု-ကြိမ်)

35 in stock

ဘဝအိုအေစစ် အား ဝေဖန်သုံးသပ်မှု 3 ရှိပါသည်။

  1. Hla,myo

    အရမ်းကောင်းပါတယ် တအုပ်လုံး မဖတ်ရသေးပေးမဲ့ အစပိုင်းကို နည်းနည်း လေး ဖတ်စာဖတ်ထားတော့ စိတ်ဝင်းစား ပါတယ်

  2. Sandar Tun

    ဘ၀အတွက် စိတ်အမောပြေစေနိုင်မယ်စာအုပ်လေးတစ်အုပ်ပါ။
    စိတ်တွေ ပင်ပန်းလာရင် ဖတ်ကြည့်သင့်တဲ့စာအုပ်လေးတစ်အုပ်ပါ။
    အဲဒီထဲကစာပိုဒ်တစ်ပိုဒ်ချင်းစီက မိမိစိတ်ကို သက်သာရာရောက်စေမည်။
    အဖိုးတန်သောစာအုပ်လေးကို ဘာသာပြန်ပေးသောဆရာ မောင်သန်းကို ကျေးဇူးတင်လျက်ပါ။

  3. Pyae Ar Kar

    အစစအရာရာ ခက်ခဲလွန်းတဲ့ ဒီကာလကြီးမှာ ရှင်သန်နေရတာကိုက အရမ်းပင်ပန်းရပါတယ် .. သို့သော်လည်း သဲကန္တာရကြီးမှာတောင် အိုအေစစ်လေးရှိလို့ အပန်းပြေရသလို လူ့ဘ၀ကြီး ဖြတ်သန်းတဲ့အခါမှာလည်း ဒီစာအုပ်လေးလို ဘ၀အိုအေစစ်လေးတွေမှာ ခဏတဖြုတ် အနားယူပီး ရှေ့ဆက်ဖို့ ခွန်အားတွေ မွေးသင့်တယ် မဟုတ်လား ..

    ဒီစာအုပ်ထဲမှာ အခန်း (၈) ခန်းပါ၀င်ပြီး တစ်ခန်းချင်းစီမှာ ခေါင်းစဉ်ငယ်လေး ၂ ခုနဲ့ အတွေးစာစုလေးတွေကို မြင်တွေ့နိုင်ပါတယ် ..

    (၁) ‘ မိမိကိုယ်ကို ပိုချစ်ပါ .. မိမိကိုယ်ကို ကြင်နာတတ်လာမှ သူတစ်ပါးအပေါ် ကြင်နာနိုင်ပါမယ် ‘ တဲ့ ..
    ‘ လိုတာထက် ပိုမကောင်းပါနဲ့ ‘ ဆိုတဲ့ စကားလေးကလည်း သိပ်ကိုမှန်တယ် .. တစ်ခါတစ်ရံမှာ ကျွန်တော်တို့ရဲ့ ပေါပေါပဲပဲ ပေးနေမိသော မေတ္တာ စေတနာကြောင့် တန်ဖိုးထားခြင်း မခံရသော အဖြစ်မျိုးကိုတောင် ကြုံတွေရတတ်တယ်လေ ..

    (၂) အခန်း ၂ ကိုတော့ မိသားစုနဲ့ အတူနေသူတွေ သေချာဖတ်သင့်တယ် .. ဒီထဲက လူတစ်ယောက်ဟာ စာရေးသူကို သူ့မှာ ငွေရေးကြေးရေး ပိုအဆင်ပြေလာတဲ့အခါ မိသားစုနဲ့ဆက်ဆံရေးကလည်း ပိုကောင်းလာတယ် ပြောထားတယ် .. မေတ္တာလွှမ်းခြုံတဲ့ မိသားစုဟာ နွေးထွေးတယ်ဆိုပေမယ့် ငွေကြေးမပြည့်စုံမှုကလည်း မိသားစု၀င်တွေ အချင်းချင်းကို တစ်ခါတစ်ရံမှာ အနှောင့်အယှက်ဖြစ်စေတတ်တယ်ဆိုတာကို သတိချပ်မိစေတယ် ..

    (၃) အခန်း ၃ မှာ အကြိုက်ဆုံး စာစုလေးတစ်ခုရှိတယ် .. ” မင်း ပျော်ရွှင်ပါစေ ၊ ဒါပေမဲ့ သူတစ်ပါးက ဖန်တီးမှ ပျော်ရွှင်ရတဲ့အဖြစ်မျိုး မဖြစ်ပါစေနဲ့ ၊ ကိုယ့်ဘာ့သာပျော်အောင်နေပါ ၊ ကိုယ့်ရဲ့ ပျော်ရွှင်မှုကို သူတစ်ပါးလက်ထဲ ၀ကွက်ပြီး ထည့်မထားပါနဲ့ ” တဲ့ ..

    (၄) ပေါင်းသင်းဆက်ဆံရေး ကဏ္ဍကို တစ်ချက်ကြည့်ရအောင် .. ” လူတစ်ယောက်နဲ့ ဆက်ဆံရေး အဆင်မပြေတဲ့အခါ ဘာကြောင့်လဲ ဆိုတာ အသေးစိတ် လေ့လာကြည့်ပါ ၊ သင့်ဘက်က မျှော်လင့်ချက်တွေ သိပ်မြင့်နေလို့များလား ” တဲ့ .. ကိုယ့်ကိုယ်ကိုယ် ဆန်းစစ်ကြည့်တာတော့ မျှော်လင့်ချက်များမိလေ ပင်ပန်းရလေပဲဆိုတာကို သွားတွေ့တယ် ..

    (၅) ” ပြဿနာ အခက်အခဲ ၊ လှိုင်းတံပိုးတွေ တိုက်ခတ်တဲ့အခါ ဆောက်တည်ရာမရ မဖြစ်ပါစေနဲ့ .. ငြိမ်းချမ်းတဲ့ နေရာဆီသွားပြီး ကိုယ့်ရင်ထဲက ငြိမ်သက်မှုကို ရှာပါ .. ကိုယ့်စိတ်ဟာ ရင်ထဲက ငြိမ်းချမ်းမှုကို တွေ့တဲ့အခါ သင့်မှာ အဲ့ဒီပြဿနာ ၊ အခက်အခဲတွေကို ရင်ဆိုင်ဖို့ ခွန်အား ၊ သတ္တိ ၊ ပညာတွေရှိနေတာ တွေ့ရလိမ့်မယ် ”

    (၆) ” ကျွန်တော့်ရင်ထဲမှာ အမုန်းတွေ ၊ အာဃာတတွေပဲ ရှိနေတာ မဟုတ်ပါဘူး .. ၀မ်းနည်းမှုတွေ ၊ စိုးရိမ်သောကတွေ ၊ အထီးကျန်ဆန်မှုတွေ ၊ ကြောက်ရွှံ့မှုတွေလည်း ရှိနေတာပါပဲ .. ဒါတင်မကဘဲ အဲ့ဒီစိတ်ခံစားချက်ကို ငြိမ်းချမ်းတဲ့စိတ်နဲ့ ကြည့်နေတတ်တဲ့ ကရုဏာမျက်၀န်း တစ်စုံလည်း ကျွန်တော်တို့ကိုယ်စီရဲ့ ရင်ထဲမှာ ရှိနေပြီးသားပါ ”

    (၇) ” လောကမှာ အခက်ဆုံးအရာဟာ ကိုယ်သိတဲ့အတိုင်း ကျင့်ကြံရတာပဲ ၊ တစ်နည်း ကိုယ့်စကားနဲ့ အကျင့်နဲ့ ညီတာပဲ .. ကျွန်တော့်ကိုယ် ကျွန်တော် ပြန်ကြည့်တော့ ဒီနှစ်ခုကြားက ကွာဟချက် အရမ်းကြီးနေသေးတယ်လို့ မြင်တယ် ”

    (၈) ” ဘ၀မှာ ကြုံရတဲ့ အခက်အခဲတွေကို မလွှတ်ချနိုင်တဲ့အခါ စိတ်တွေ တင်းကျပ်လာလိမ့်မယ် .. ဒီလိုဖြစ်လာတဲ့အခါ စိတ်တင်းကျပ်မှုကို ဖယ်ထုတ်ပစ်ဖို့ မကြိုးစားပါနဲ့ .. သူ့ဘာ့သာ နေခွင့်ပြုလိုက်ပါ .. စကားတစ်ခွန်းမှ မပြောဘဲ အဲ့ဒီစိတ်ခံစားချက်တွေကို ကြည့်နေလိုက်ပါ .. အဲ့ဒီအခါမှာ ကိုယ့်စိတ်က ငြိမ်သက်ပြီး လွတ်လပ်မှုကို ခံစားရလိမ့်မယ် ”

    အထက်ပါ အကြောင်းအရာလေးတွေဟာ ဒီစာအုပ်ဖတ်ပြီး သဘောကျ နှစ်ခြိုက်လို့ ပြန်ရေးထားတဲ့ စာစုလေးတွေနဲ့ အတွေးအမြင်တချို့သာ ဖြစ်လို့ ဒီပိုစ့်ကို စာအုပ် Review ဟု မခေါ်သာ .. စာအုပ်ကတော့ တကယ့်ကို ကောင်းတဲ့ စာအုပ်တစ်အုပ်ဖြစ်ကြောင်း ပြောကြားလိုပါတယ် …..

    စာအုပ်အမည် #ဘ၀အိုအေစစ် #LoveForImperfectThings
    စာရေးသူ #မောင်သန်း
    စာအုပ်တိုက် #ပန်းဆက်လမ်း #PannSattLann

    #စာညွှန်းအိမ်
    #PyaeArKar

လူကြီးမင်း၏ ဝေဖန်သုံးသပ်ချက်ကို မျှဝေပေးပါ...

Your email address will not be published.

မောင်သန်း စာအုပ်များ