ကြိုးကိုချည်တဲ့ ကြိုး

ကြိုးကိုချည်တဲ့ ကြိုး အား ဝေဖန်သုံးသပ်မှု 2 ရှိပါသည်။

1. 

   Rated 5 out of 5

   Pyae Ar Kar – April 5, 2022

   ရသစာပေကို သဘောကျနှစ်ခြိုက်သူတိုင်း ဒီစာအုပ်လေးကို ကြိုက်နှစ်သက်လိမ့်မယ်လို့ ကျွန်တော်ပြောရဲတယ် ..

   ဆရာမ ဝေ(စီးပွားရေးတက္ကသိုလ်) ဟာ ၂၀၁၃ ခုနှစ်မှာ ထွက်ရှိခဲ့တဲ့ နှလုံးသားပေါ် သွေးတဲ့ဓား ၀တ္ထုတိုစုစည်းမှုနဲ့ အမျိုးသားစာပေဆု ၊ သဟာယ စာပေဆုတွေကို ရရှိခဲ့တဲ့ စာရေးကောင်းသူတစ်ဦး ဖြစ်တယ် ..

   ဒီစာအုပ်လေးကတော့ ဆုရရှိပီး ၉ နှစ်ကျော်ကြာမှ စာအုပ်အသစ်ထုတ်ဝေဖို့ ဆန္ဒတစ်ဖန် ဖြစ်လာခဲ့တဲ့ ဆရာမရဲ့ ဒုတိယမြောက် ၀တ္ထုတိုစုစည်းမှု စာအုပ်လေးပါ .. ကြားထဲမှာ စာအုပ်ထုတ်ဖို့ အကြိမ်ကြိမ် အကြောင်းပေါ်ခဲ့သော်လည်း ဘာလုပ်လုပ် စိတ်အာရုံနှစ်လိုသူမို့ လက်မခံခဲ့ခြင်းသာ ဖြစ်တယ် တဲ့ ..

   ဆရာမရဲ့ အရေးအသားတွေကို ကြည့်မယ်ဆိုရင် ၀တ္ထုတို ရေးသားနည်း ဟန်ပန်တစ်ခုကို လေ့လာနိုင်သလို ဖြစ်တာကြောင့် ၀တ္ထုတို ရေးလိုသူတွေလည်း စနည်းနာသင့်တဲ့ စာအုပ်တစ်အုပ်လည်း ဖြစ်ပါတယ် ..

   အခုနောက်ပိုင်း တချို့မိန်းကလေးတွေဟာ မိမိတို့ အိပ်မက်တွေဆီကို စပွန်ဆာယူပီး ရောက်အောင်သွားကြတယ် .. တချို့ကတော့ အိပ်မက်နဲ့ သိက္ခာမလဲဘူးပေါ့ .. ဒါ့အပြင် အမျိုးမျိုးသော အကြောင်းကြောင်းတွေလည်း ရှိနေနိုင်သေးတယ်ဆိုတာကို အိပ်မက်စရံ၀တ္ထုထဲက အမျိုးသမီးလေးတွေကို မြင်ပီး ခံစားမိတယ် ..

   သူတစ်ပါးရဲ့ ရိုးသားမှု ၊ မသိနားမလည်မှုကို အခွင့်ကောင်းယူပီး အမြတ်ထုတ်တတ်တဲ့ လူတန်းစား တစ်ရပ်လည်း ရှိတယ် .. အဲ့လိုလူတွေရဲ့ နာကျင် ခံခက်ရဆုံးအချိန်ဟာ သူတို့လုပ်သလို တစ်ပါးသူက ပြန်လုပ်တဲ့အချိန်ပဲ .. အဲ့အကြောင်းလေးကို တံလျှပ်ပေါ်က ရေအရိပ်မှာ မြင်တွေ့နိုင်တယ် ..

   မတူညီသော ညီမျှခြင်းပုစ္ဆာဆိုတဲ့ ၀တ္ထုလေးကိုလည်း ကျွန်တော် တော်တော်ကြိုက်တယ် .. လောကမှာ ကိုယ့်သားသမီး ၊ ကိုယ့်ညီမ ကောင်းစားတာကို မနာလို မရှု့စိမ်ဖြစ်တတ်တဲ့ လူစားမျိုးလည်း ရှိသေးပါလားဆိုတာကို ဒီ၀တ္ထုလေးဖတ်ပြီး ပိုသိလာတယ် ..

   ကြိုးကိုချည်တဲ့ ကြိုး ကိုတော့ အကြိုက်ဆုံးပဲ .. တစ်ခါတစ်ရံမှာ အပြစ်ကျုးလွန်သူက ကိုယ်မဟုတ်ပါဘဲ အပြစ်ဒဏ်ပေးခံရတော့ ကိုယ်ဖြစ်နေတတ်တာမျိုး .. ” မိအေး အော်တာပဲ သိတယ် ၊ ကဏန်းညှပ်တာတော့ လူမသိဘူး ” ဆိုတဲ့ စကားပုံကို ဒီဝတ္ထုလေးဖတ်ရင်း ပြေးမြင်မိတယ် ..

   ဒီစာအုပ်လေးထဲမှာတော့ အထက်ပါ အကြောင်းအရာလေးတွေလို အရေးအဖွဲ့နဲ့ ဇာတ်လမ်းပုံဖော်မှု အားကောင်းတဲ့ ရသ၀တ္ထုတို ၁၅ ပုဒ်ပါ၀င်ပြီး အတွင်းသရုပ်ဖော် ၁၅ ပုံကို ပန်းချီ မမြတ်မွန်လက်ရာနဲ့ မြင်တွေ့ခံစားနိုင်မှာပဲ ဖြစ်ပါတယ် ..

   စာအုပ်အမည် #ကြိုးကိုချည်တဲ့ကြိုး မဂ္ဂဇင်း၀တ္ထုတိုများ
   စာရေးသူ #ဝေ(စီးပွားရေးတက္ကသိုလ်)
   စာအုပ်တိုက် #ပန်းဆက်လမ်း #PannSattLann
   ပုံနှိပ်မှတ်တမ်း – ၂၀၂၂ ခုနှစ် ၊ မတ်လ ၊ ပထမအကြိမ် ၊ အုပ်ရေ ၁၀၀၀
   တန်ဖိုး -၄၅၀၀ ကျပ်
   မျက်နှာဖုံးနှင့်အတွင်းသရုပ်ဖော် – #မြတ်မွန်

   #စာညွှန်းအိမ်
   #PyaeArKar

2. 

   Rated 0.1 out of 5

   Pyae Sone (verified owner) – November 28, 2022

   ကြိုးကိုချည်တဲ့ကြိုး – ဝေ(စီးပွားရေးတက္ကသိုလ်)
   ဆရာမ ဝေ(စီးပွားရေးတက္ကသိုလ်)ရဲ့ ဝတ္ထုတိုတွေကို ရွှေချည်ထိုးသက်တံ့ ဆိုတဲ့ အမျိုးသားစာပေဆုရ စာရေးဆရာ(၇)ဦးရဲ့ ဝတ္ထုတိုစုစည်းမှုစာအုပ်လေးမှာ စပြီးဖတ်ခဲ့ဖူးတာပါ။ဆရာမရဲ့ ပထမဆုံး ဝတ္ထုတိုစုစည်းမှုစာအုပ်ကတော့ အမျိုးသားစာပေဆုနဲ့ သဟာရစာပေဆုတွေကိုရရှိခဲ့တဲ့ နှလုံံးသားပေါ် သွေးတဲ့ဓား ဆိုတဲ့ စာအုပ်ဖြစ်ပါတယ်။ကြိုးကိုချည်တဲ့ကြိုး ဝတ္ထုတိုစုစည်းမှုစာအုပ်လေးက ဆရာမရဲ့ ဒုတိယမြောက်စုစည်းမှုပဲ ဖြစ်ပါတယ်။ အမျိုးသမီးစာရေးဆရာတစ်ယောက်ရဲ့ စေ့စပ်သေချာမှုတွေနဲ့ နူးညံ့တဲ့ အရေးအသားတွေကို ထိတွေ့ခံစားရမယ့်စာအုပ်တစ်အုပ်လို့ပဲ ဆိုချင်ပါတယ်။ဝတ္ထုထဲက ဇာတ်ဆောင်တွေနဲ့အတူ စီးမျောလိုက်ပါပြီး သူတို့ရဲ့ စိတ်အားတက်ကြွမှုတွေ ကြေကွဲဝမ်းနည်းမှုတွေ နဲ့ ဘဝသင်ခန်းစာတွေကို စာဖတ်သူရဲ့ ရင်ထဲမှာ တစ်သသစွဲပြီး ကျန်ခဲ့စေနိုင်တဲ့ ဝတ္ထုတို ၁၅ပုဒ်ကို ဖတ်ရှုကြရမှာပဲ ဖြစ်ပါတယ်။
   ဝတ္ထုတိုစုစည်းမှု ဆိုတဲ့အတိုင်း မတူညီတဲ့ရည်ရွှယ်ချက်တွေ ဇတ်လမ်းတည်ဆောက်မှုတွေ သရုပ်ဖော်မှုတွေနဲ့ ဖန်တီးထားတဲ့ ဆရာမရဲ့ အရေးအသားတွေကို လေ့လာနိုင်မှာပါ။ယောကျာ်းလေးတစ်ယောက်ကို အတွေ့နဲ့ ဆွဲဆောင်သိမ်းသွင်းဖို့ ကြိုးစားခဲ့တဲ့ အမျိုးသမီးလေးရဲ့ နောင်တကို ရေးဖွဲ့ထားတဲ့ ကျန်ရစ်လေသောအရာ ၊ အိမ်ရှေ့မှာအဖီချပြီးရောင်းတဲ့ အသုပ်ဆိုင်ရှင်လေးအေးမ ကြုံတွေ့ခဲ့ရတဲ့ သင်ခန်းစာယူဖွယ်အဖြစ်အပျက်လေးကို တင်ပြထားတဲ့ တစ်ကြိုက်တည်းမော့ပစ်မယ့်ပင်လယ် ၊ သူများအပေါ်မှာ ဖျံကျပြီးကလိမ်ကကျစ်လုပ်တတ်တဲ့ ရေခဲသေတ္တာနဲ့အဲယားကွန်းပြုပြင်ရေး ဆိုင်ပိုင်ရှင် ကိုလူဇော်ရဲ့ အဖြစ်ကို သရော်ထားတဲ့ တံလျှပ်ပေါ်ကရေအရိပ် ၊ အစရှိတဲ့ ဝတ္ထုတိုတွေကနေ သင်ခန်းစာတစ်ခုခု ဒါမှမဟုတ် အတွေးအခေါ်တစ်စုံတရာ ရရှိနိုင်လိမ့်မယ်လို့ ယူဆမိပါတယ်။
   တစ်စိတ်ပဲ့အလွမ်း၊ ကြိုးကိုချည်တဲ့ကြိုး နဲ့ အလင်းထောင့်ရောင်ပြန်ဝတ္ထုလေးတွေကတော့ မေတ္တာတရားရဲ့အကြောင်းကို နူးညံ့စွာရေးဖွဲ့ထားတဲ့ ဝတ္ထုတိုလေးတွေပါ။ယုံကြည်စရာ နည်းပါးလှတဲ့လောကကြီးထဲမှာ မေတ္တာတရားဆိုတာကတော့ ကျနော်တို့ မဖြစ်မနေ ယုံကြည်ရမယ့် အရာတစ်ခုဖြစ်ကြောင်းကို ဆရာမက သူ့ဝတ္ထုတိုလေးတွေမှာ လှလှပပရေးဖွဲ့ထားပါတယ်။ဝတ္ထုတစ်ပုဒ်ချင်းအကြောင်းကို ပြောပြနေတာထက် အတိုချုပ်ပြောရရင် ဒီစာအုပ်လေးမှာပါတဲ့ ဝတ္ထုတိုအားလုံးနီးပါးကို စာဖတ်သူတွေ ကြိုက်နှစ်သက်ကြလိမ့်မယ်လို့ ယူဆမိပါတယ်။အကြည်ဓာတ်ကိန်းပြီး အပူငြိမ်းတဲ့ကာလလေးတွေမှာ ဆရာမအနေနဲ့ အသစ်အသစ်သော အနုပညာတွေကို ဖန်တီးနေလိမ့်မယ်လို့ ယုံကြည်မိပါတယ်။