မောင်လေးကောက်ရ

( 2 မှတ်ချက်)

3500 (ကျပ်)

.          ပြင်သစ်နိုင်ငံ ပဲရစ်မြို့အနီး၊ ရွာကလေးတစ်ရွာရှိ မိဘမဲ့မိန်းကလေးဂေဟာသို့ စွန့်ပစ်ယောက်ျားလေးတစ်ဦး ရောက်ရှိလာပုံနှင့် အစပြုကာ ကလေးများကို စောင့်ရှောက်သူတို့၏ အကြင်နာမေတ္တာ၊ ကလေးအချင်းချင်းကြားမှ ခိုင်မြဲသောသံယောဇဉ်၊ ကရုဏာသက်စရာ မိဘမဲ့လေးများ၏ဘဝကို နှစ်သက်စဖွယ် ရေးခြယ်ထားသည်။ ရယ်မောခြင်းတစ်ဝက်၊ ပြုံးစရာဖက်ကာ ရင်နင့်လှိုက်လှဲမျက်ရည်ဝဲစရာဖြစ်သော်လည်း ပေါ့ပါးသွက်လက်သော တင်ပြပုံကြောင့် ဇာတ်ကောင်တို့၏စရိုက်မှာ အံဝင်ခွင်ကျ ရုပ်လုံးကြွ၍ နေသည်။
ကျွန်မသည် ငယ်စဉ်ကပင် ပုံပြင်နှစ်သက်စွဲလမ်းသူ၊ အသက်နည်းနည်းရလာတော့ ပုံပြောချင်သူ၊ အသက်ရင့်လာတော့ ပုံပြင်ရေးသူ၊ အသက်ထောက်လာသည့် ယခုအရွယ်မှာပင် ပုံပြင်တောထဲ ဝဲလည်နေဆဲဖြစ်လေရာ ကျွန်မအကြိုက် ဤကလေးစာပေ အဖိုးတန်လေးကို ”အစားကောင်းစားရလျှင် ချစ်ခင်သူကို သတိရ”သော ထုံးစံနှင့်အညီ စာချစ်သူတို့အတွက် လက်ဆင့်ကမ်း လက်ဆောင်ပြုလိုက်ခြင်းမျှသာ ဖြစ်ပါသည်။
အိုဟောင်းနေသော မိဘမဲ့ဂေဟာ၌ ချို့တဲ့စွာနေထိုင်ရသည့်တိုင် မေတ္တာ၊ စေတနာ၊ အကြင်နာ၊ မုဒိတာတရားတို့ဖြင့် ပြိုးပြက်ဝင်းလက်နေသော လူသားဆန်သည့် လူ့အဖွဲ့အစည်းငယ်လေး၏ အနေအထားကို အသည်းကြားက နှစ်နှစ်ကာကာ ခံစား နားလည် စဉ်းငယ်မျှ ကရုဏာသက် ဖြစ်သည်ဆိုပါလျှင် … ဤစာကို ကျွန်မ ဘာသာပြန်ရကျိုးနပ်သည် ဟု ဆိုချင်ပါသည်။

စာမျက်နှာ

98

စာအုပ်အရွယ်အစား

5.4 x 0.2 x 8.2 inches

ပုံနှိပ်မှတ်တမ်း

ကိုလတ်စာပေ 2023 ဇူလိုင်လ (ပထမအကြိမ်)

1 in stock

မောင်လေးကောက်ရ အား ဝေဖန်သုံးသပ်မှု 2 ရှိပါသည်။

  1. Aeri Myat

    “မောင်လေးကောက်ရ” ဆိုတဲ့စာအုပ်လေးကို နာမည်စကြားတည်းက
    စိတ်ဝင်စားခဲ့မိတာ…🥰
    အခုဖတ်ဖြစ်တော့လည်း ချစ်စရာကောင်းတဲ့စာအုပ်လေးဖြစ်နေတာရယ်။
    မိန်းကလေးတွေချည်းရှိတဲ့ မိဘမဲ့ဂေဟာလေးရှေ့က ပေါင်မုန့်ခြင်းလေးထဲ ဆံပင်ခွေလေးတွေနဲ့ ကလေးလေး တစ်ယောက်
    ရောက်လာတာကနေ ဇာတ်လမ်းလေးကို
    အစပြုထားတယ်။
    ဂေဟာရဲ့အငယ်ဆုံးလေး “ဂျိုစီ”ကတော့
    ကလေးလေးကို စမြင်ကတည်းက
    မောင်လေးအရင်းတစ်ယောက်လို
    ချစ်ခင်ကရုဏာသက်ခဲ့သူလေး။
    ဂျိုစီခေါ်ပုံလေးက မောင်လေးကောက်ကီတဲ့လေ…. ချစ်စရာကောင်းချက်ပဲ။🥰
    ကလေးလေးတွေဆိုတော့ ကလေးသာသာ အတွေးလေးတွေက ဖြူစင်ပြီး
    ရိုးသားကြတယ်။
    ယိုင်နဲ့ အိုဟောင်းနေတဲ့ ဂေဟာလေးမှာ
    နေရပေမဲ့ သူတို့ကြားက
    မေတ္တာတရားတွေကတော့
    ခမ်းနားကြီးကျယ်လွန်းပါတယ်။
    မိန်းကလေးဂေဟာမှာ မောင်လေးကောက်ကီ နေရဖို့ ဂျိုစီတစ်ယောက် ကြိုးစားအားထုတ်တဲ့အခန်းတွေမှာတော့ဖတ်ရင်း အသနားပိုရ ရယ်မောရပါပဲ။
    ချစ်စရာကောင်းတဲ့စာအုပ်လေးပါ…။
    ပုံလေးတွေလည်းပါတော့ ဖတ်ရတာ မြင်သာပြီးတော့ ပိုစိတ်ဝင်စားဖို့
    ကောင်းပါတယ်။
    ကလေးစာပေဆိုပေမဲ့ မေတ္တာတရား၊
    ကိုယ်ချင်းစာနာတတ်တဲ့ စိတ်ထားလေးတွေကိုဖြင့် လေးစားအားကျမိစေပါတယ်။🥰
    #မောင်လေးကောက်ရ
    #နတ်မောက်အနီချို
    #ရွှေခွန်းချိုစာပေ
    #reviewby하은
    #Aug3

  2. Htet Htet Tin Zar

    📚 ဆရာမနတ်မောက်အနီချို ဘာသာပြန်တဲ့ ဒီမောင်လေးကောက်ရဝတ္ထုဟာ ကလေးစာပေ အမျိုးအစားထဲမှာ ပါဝင်ပါတယ်။ ကလေးတင်မက အရွယ်ရောက်သူတွေပါ ဖတ်ရှုရ လွယ်ကူပြီး ကလေးသဘာဝ အတွေးစိတ်ကူးဆန်းကြယ်ပုံ၊ စူးစမ်းတတ်ပုံတွေကို တွေ့မြင်ရမှာဖြစ်ပါတယ်။

    📰 မူရင်းရေးသားသူ Natalie Savage Carlson ဟာ မောင်နှမများတဲ့ မိသားစုကနေ ကြီးပြင်းလာခဲ့သူဖြစ်ပြီး ပြင်သစ်စာအုပ်ဟောင်းများကို ဝါသနာအရ စုဆောင်းကာ စိတ်ကြိုက်ရွေးချယ် ဘာသာပြန်ခဲ့တယ်လို့ ဘာသာပြန်ဆိုသူ ဆရာမ နတ်မောက်အနီချိုက အမှာစာမှာ ပြောကြားထားပါတယ်။

    📖 ပဲရစ်မြို့အနီး ရွာလေးမှာ ပြိုကျပျက်စီးလုနီးပါးဖြစ်နေတဲ့ မိဘမဲ့မိန်းကလေးတွေကို စောင့်ရှောက်ထားတဲ့ ဂေဟာတစ်ခုက မိဘမဲ့မိန်းကလေးငယ် နှစ်ဆယ်ထဲမှာ ဂျိုစီက အငယ်ဆုံးဖြစ်သလို ခေါင်းအမာဆုံးလဲဖြစ်တယ်။ ဒီဂေဟာကို မဒမ်ဖလက်တော့နဲ့ ဂျိနဲဗိယက်စ်တို့က အုပ်ချုပ်ပြီး နှစ်ယောက်လုံးက သဘောကောင်းကြတယ်။

    🗞 တစ်ရက်မှာ ဂေဟာခြံတံခါးဝမှာ ချထားတဲ့ ပေါင်မုန့်ထည့်တဲ့ ခြင်းအကြီးကြီးထဲမှာ အနက်ရောင် ဆံပင်ကောက်ကောက်လေးတွေနဲ့ ကလေးလေးတစ်ယောက်ကို ဂျိုစီ စတွေ့ခဲ့တယ်။ ဂျိုစီကတော့ သူ့ထက်ငယ်တဲ့သူ ရှိလာတော့မှာမို့ ဝမ်းသာပျော်ရွှင်နေတယ်။ ဂျိုစီ အပါအဝင် ဂေဟာက မိန်းကလေးတွေအားလုံးက ကလေးကို မွေးစားဖို့ မဒမ်ကို တိုက်တွန်းကြတယ်။ ဒါပေမဲ့ ပြဿနာက ကလေးက ယောက်ျားလေးဖြစ်နေတယ်။ မိန်းကလေးဂေဟာမို့ ယောက်ျားလေးလက်ခံဖို့ မဖြစ်နိုင်ဘူးလေ။

    📚 ဒီလိုနဲ့ ကလေးတစ်ဦး လာစွန့်ပစ်ကြောင်း ရဲကို အကြောင်းကြားတယ်။ ရဲနဲ့ မွန်စီယာဒီဂူးပေးလ်တို့ကို ကလေးက ယောက်ျားလေးဖြစ်ကြောင်းကိုတော့ မဒမ်နဲ့ မိန်းကလေးတွေအားလုံးက ဖွင့်မပြောဘဲ ထိမ်ချန်ခဲ့တယ်။ မွန်စီယာတို့ကလည်း မိန်းကလေးပဲ ထင်ပြီး ဂေဟာပဲ မွေးစားဖို့ ခွင့်ပြုခဲ့တယ်။ ဒီလိုနဲ့ ကလေးကို မဲခွဲ နာမည်ပေးကြတော့ ၁၁မဲနဲ့ နပိုလီယံလို့ နာမည်ပေးခဲ့ပေးမဲ့ ဂျိုစီပေးတဲ့ ကောက်ကီလို့သာ ခေါ်ကြပါတယ်။

    📰 အဲဒီနေ့ကစပြီး ဂျိုစီကတော့ ကောက်ကီကို မောင်ရင်းပမာ သဘောထားပြီး ကလေးဝေယျာဝစ္စမှန်သမျှအကုန် ကူညီပေးပါတော့တယ်။ မဒမ်ကလည်း ယောက်ျားလေးမို့ မိန်းကလေးအင်္ကျီအကျတွေ မဆင်ပေးချင်ဘူးဆိုပြီး ကလေးအတွက် အဝတ်အစားလေးတွေ ဝယ်ပေးတယ်။ ဂျိုစီလေးက ကောက်ကီကို ဘယ်လောက်တောင်ချစ်ပြီး စိတ်မချလဲဆို မိန်းကလေးတွေအားလုံးနဲ့ ရေနုတ်မြောင်း လေ့လာရေးခရီးသွားဖို့ အပြင်ထွက်ခါနီးမှ ကောက်ကီလေးက အသည်းအသန်ငိုနေလို့ စိတ်မချဖြစ်ပြီး ကောက်ကီနဲ့အတူ နေရစ်ခဲ့တယ်။

    📖 တစ်ရက်မှာ မဒမ်က ကောက်ကီဟာ ယောက်ျားလေးဖြစ်တယ်လို့ မွန်စီယာကို ပြောပြလိုက်တော့ ယောက်ျားလေးဂေဟာ ပြောင်းခိုင်းပေမဲ့ ကလေးက သွားပေါက်နေလို့ အီနေတာကြောင့် သွားပေါက်ပြီးရင် ဂေဟာပြောင်းရမယ်လို့ ပြောသွားတယ်။ ဂျိုစီလေးကတော့ ယောက်ျားလေးဂေဟာကို ထည့်မပေးလိုက်ချင်ဘူး။

    🗞 တစ်ရက်ကျတော့ ယောက်ျားလေးဂေဟာမှာနေတဲ့ ကောင်လေးတွေနဲ့ ဆုံမိရာက ဂေဟာက ကောင်လေးတွေက ဂေဟာမှာ အရိုက်ခံရကြောင်း၊ အစာငတ်ထားကြောင်း၊ ကျွဲလိုနွားလိုလည်း ခိုင်းကြောင်း ပြောလိုက်တဲ့အခါ ဂျိုစီဟာ ကောက်ကီလေးအတွက် စိတ်ပူပြီး ကောက်ကီလေး ယောက်ျားလေးဂေဟာကို အပို့မခံရရေးအတွက် ကလေးအတွေးလေးနဲ့ အမျိုးမျိုးစဉ်းစား လုပ်ဆောင်တဲ့ ချစ်စရာကောင်းတဲ့ ဇာတ်လမ်းလေးတစ်ပုဒ် ဖြစ်ပါတယ်။

    😇😇😇

လူကြီးမင်း၏ ဝေဖန်သုံးသပ်ချက်ကို မျှဝေပေးပါ...

Your email address will not be published. Required fields are marked *

နတ်မောက်အနီချို စာအုပ်များ