ပေးဆပ်သူရဲ့နှလုံးသားဝိညာဉ်

( 5 မှတ်ချက်)

4000 (ကျပ်)

ဤစာအုပ်တွင် အများအလေးမထားသော ဒေါ်အောင်ဆန်းစုကြည်၏ဇနီးတစ်ယောက်အဖြစ်၊အမေတစ်ယောက်အဖြစ်၊အိမ်ထောင်ရှင်တစ်ဦး၏ အဖြစ်တို့ကိုသာမက မိုက်ကယ်အဲရစ်၏ပညာရှင်တစ်ဦးဘဝ၊ခင်ပွန်းဘဝ၊အဖေဘဝတို့ကိုလည်းကောင်း သားနှစ်ယောက်၏ခံစားချက်တို့ကိုလည်းကောင်း၊မြန်မာ့နိုင်ငံရေး
ဖြစ်စဉ်တို့နှင့်ရောယှက်လျက် အလွမ်းဇာတ်လမ်းလေးတစ်ခုအဖြစ် ပုံဖော်ထားတာဖြစ်ပါတယ်။

စာမျက်နှး

156

စာအုပ်အရွယ်အစား

5.3 x 0.4 x 8 inches

ပုံနှိပ်မှတ်တမ်း

ပန်းဆက်လမ်းစာပေ၊ 2019 စက်တင်ဘာလ (စတုတ္ထ-ကြိမ်)

ပေးဆပ်သူရဲ့နှလုံးသားဝိညာဉ် အား ဝေဖန်သုံးသပ်မှု 5 ရှိပါသည်။

  1. Kyi Lai Lai Soe

    အခုတစ်ခေါက် ညွှန်းပေးချင်တဲ့စာအုပ်ကတော့ ဆရာမ မွန်ဟော်စီရဲ့ “ပေးဆပ်သူရဲ့ နှလုံးသား ဝိညာဉ်”(The Beautiful Spirit Of A Giver)ဆိုတဲ့စာအုပ်လေးပါ။

    ဒီစာအုပ်ကတော့ နိုင်ငံတော်အတိုင်ပင်ခံဒေါ်အောင်ဆန်းစုကြည် အကြောင်းပါ။ နိုင်ငံရေးအကြောင်းမပါဘဲ Michael Arisနဲ့ဒေါ်အောင်ဆန်းစုကြည်တို့ရဲ့ချစ်စရာ‌ကောင်းတဲ့မိသားစု အကြောင်း၊အိမ်ထောင်ရေးအကြောင်းကို တမ်းတဖွယ်၊လွမ်းဆွတ်ဖွယ် ဖတ်ရှုခံစားရမှာပါ ။

    ၁၉၆၄-၁၉၆၇
    England နိုင်ငံ Oxford ရောက်တာတောင် မြန်မာဆန်ဆန်နေတတ်တဲ့သူ၊မြန်မာလုံချည်ကို ခြေမျက်စိဖုံးအောင်ဝတ်တတ်သူ၊မြန်မာဆန်သူလေး ၊သူငယ်ချင်းဖြစ်သူတွေက ချစ်စနိုးနဲ့ခေါ်ကြတာ Suu Burmeseတဲ့။

    Michaelတစ်ယောက် စုကို မြင်မြင်ချင်းမှာဘဲ ရင်ခုန်သွားခဲ့တယ် ။နောက်ပိုင်းမှာတော့Michaelရဲ့သူငယ်ချင်းဖြစ်သူ Christopher ရဲ့မိတ်ဆက်ပေးမှုကြောင့် သူ စုနဲ့ခင်မင်ခွင့်ရခဲ့တယ် ။

    ယဉ်ကျေးမှုအ‌မွေအနှစ်တွေနဲ့ဖုံးလွှမ်းနေတဲ့ ဘူတန်နိုင်ငံမှာ Michaelနဲ့စုတို့ရဲ့အိမ်ထောင်ဦးကာလကို ကုန်ဆုံးခဲ့ကြတယ်။စုက အိမ်ထောင်မှုနိုင်နင်းတဲ့ အိမ်ရှင်မတစ်ယောက်။တိဗက်အဆင်လိုက်ကာတွေ၊ကော်ဇောတွေကို နေချင်စဖွယ် ပြင်ဆင်ထားမှုတွေက စုရဲ့အိမ်ထောင်ရှင်မ ပီသမှုကိုမီးမှောင်းထိုးပြနေသရောင်…။

    အင်္ဂလန်မှာ ပျော်ရွှင်စရာကောင်းတဲ့မိသားစု ဘဝကိုဖြတ်သန်းရင်း စုရဲ့မိခင်ဖြစ်သူက မြေးနှစ်ယောက်ကို ရှင်ပြုပေးချင်ကြောင်းပြောတော့ စုတို့မြန်မာပြည်ကို ပြန်ခဲ့ကြတယ် ။သားနှစ်ယောက်ကို ဗုဒ္ဓဘာသာယဉ်ကျေးမှုအတိုင်း ရှင်ပြုပေးခဲ့ကြတယ် ။

    ၁၉၈၈ခုနှစ်မှာစုရဲ့မိခင် လေဖြတ်တဲ့အတွက် စုရန်ကုန်ကိုပြန်ခဲ့တယ်။အဲ့အချိန်ကစပြီး တစ်သက်တာဝေးကွာရမှာကို ဘယ်သူမှမသိခဲ့ကြ။သားငယ်ဖြစ်သူ Kimမှာ၁၁အရွယ်သာရှိသေးပြီး မိခင်ဖြစ်သူကိုလွမ်းဆွတ်မှုဒဏ်တွေကြောင့် ဂျစ်ကန်ကန် ကလေးတစ်ယောက်ဖြစ်လာခဲ့သလို Michaelလည်း ဆေးလိပ်‌ကိုသာအဖော်ပြုနေခဲ့တယ် ။

    ၁၉၉၇မှာတော့ ဆီးကျိပ်ကင်ဆာခံစားနေရတဲ့ Michael တစ်ယောက် မြန်မာပြည်မှာရှိတဲ့ နေအိမ်အကျယ်ချုပ်ကျနေတဲ့ စုဆီကိုလာဖို့ Visa အကြိမ်ကြိမ်လျှောက်‌သော်လည်း ငြင်းပယ်ခြင်းသာခံခဲ့ရတယ်။ကုလသမဂ္ဂ အတွင်းရေးမှူးချုပ်ကိုဖီအာနန်၊ပုပ်ရဟန်းမင်းကြီးJohn Paul IIတို့ပင်Michaelဗီဇာရအောင် အရေးဆိုပေးပေမယ့် ငြင်းပယ်ခြင်းသာခံရခဲ့တယ် ။

    သားငယ်ဖြစ်သူKimကလည်း မိခင်ဖြစ်သူဆီဖုန်းအဆက်အသွယ်လုပ်ဖို့ ကြိုးစားပေမယ့် ဖုန်းလိုင်းဖြတ်တောက်ခံရခြင်းကြောင့် အဆက်အသွယ်မရခဲ့။

    Michaelရဲ့ အမွှာအစ်ကိုဖြစ်သူ Anthonyရဲ့ပြောကြားချက်ကြောင့် Michaelအသက်ရှင်ဖို့မျှော်လင့်ချက်မရှိတော့ဘူးဆိုတာ သိတဲ့အချိန်မှာ စုတစ်ယောက် သူပြောချင်တဲ့အကြောင်းတွေကိုvideoရိုက်ပြီး Michaelဆီပို့ခဲ့တယ် ။

    ၁၉၉၉ခုနှစ် မတ်လ၂၇ရက်နေ့ မြန်မာစံတော်ချိန်နေ့လည်၁နာရီခွဲမှာ Michaelလူ့လောကထဲကနေ ထွက်ခွာသွားခဲ့တယ် ။စုပို့လိုက်တဲ့ Videoက Michaelဆုံးပြီး၂ရက်ကြာမှ ‌အင်္ဂလန်ကိုရောက်တော့ Michaelတစ်ယောက် စုမှာကြားတာတွေကိုသိခွင့်မရှိခဲ့ ။

    အပေါ်ကအကြောင်းအရာတွေက စာအုပ်ထဲမှာပါတာတွေကို အကျဉ်းချုပ်တင်ပြထားခြင်းပါ။ဒေါ်အောင်ဆန်းစုကြည်ကမြန်မာပြည်သူပြည်သားတွေအတွက် သူ့မိသားစုကိုစွန့်လွှတ်ပြီး ပေးဆပ်ခဲ့ရတာ၊Michael V. Arisကလည်း သူ့ဇနီးဖြစ်သူကိုပေးဆပ်ပြီးချစ်ခဲ့တာ၊သူ့အတ္တကိုရှေ့တန်းမတင်ဘဲနဲ့ သူ့ဇနီးလုပ်ချင်တာကို လုပ်ပိုင်ခွင့်ပေးခဲ့သူ။သူလည်းဇနီးကိုလွမ်းဆွတ်တဲ့အတွက် နာကျင်ခံစားခဲ့ရတယ်၊ကျန်ရှိတဲ့သူ့ဘဝကို အဓိပ္ပာယ်မဲ့စွာ ဖြတ်သန်းခဲ့ရပေမယ့် ဇနီးဖြစ်သူကို “ပြန်လာခဲ့ပါ”လို့ပြောမထွက်ရက်ခဲ့သူ ။

    သားငယ်ဖြစ်သူKimကလည်း အမေဖြစ်သူဆီကို ဖုန်းဆက်ဖို့အမြဲကြိုးစားပေမယ့် ၊ဖုန်းလိုင်းဖြတ်တောက်ခြင်းသာခံခဲ့ရတယ်။Kimသူ့အမေဆီဖုန်းဆက်တဲ့အခန်းကို ဖတ်တော့ မျက်ရည်တွေအလိုလိုကျမိလာပြီး ငိုကြွေးခဲ့မိတယ်။ရင်ထဲဆို့နင့်အောင်ခံစားရတဲ့ အခန်းပါ။Kimပြောတဲ့”Please come home Mum.We miss you terribly.Why aren’t you here?”ဆိုတဲ့စကားလေးက ရင်ထဲဆို့နင်ပြီးဝမ်းနည်းစရာကောင်းလှတယ်။မိခင်ကိုလွမ်းနေရှာတဲ့ သားငယ်ရဲ့အဖြစ်က ကြေကွဲစရာ…။

    ပေးဆပ်ခဲ့သူတွေကတော့ သူတို့ဘဝတွေကိုရင်းပြီး ပေးဆပ်ခဲ့ရပြီးပြီ….။ကျွန်မတို့တွေကကော….။

    #Review_By_အလဲ့လေး

လူကြီးမင်း၏ ဝေဖန်သုံးသပ်ချက်ကို မျှဝေပေးပါ...

Your email address will not be published. Required fields are marked *

မွန်ဟော်စီ စာအုပ်များ