အင်္ဂလိပ်လူနာ- ကိုနေ(မန်း)

( 0 မှတ်ချက်)

9000 (ကျပ်)

အင်္ဂလိပ်လူနာ စာအုပ်သည် မိုက်ကယ်အွန်ဒတ်ဂျီ၏ နာမည်ကြီးလက်ရာမွန် သုံးအုပ်ထဲက တစ်အုပ်ဖြစ်သည်။ ၁၉၉၂ခုနှစ်တွင်ထုတ်ဝေခဲ့ပြီး “The Booker Prize, The Canada Australia Prize နှင့် The Governor General’s Award” စသည့် ဆုပေါင်းများစွာရရှိခဲ့ပါသည်။ ဘာသာပေါင်း(၄၀)ကျော် ပြန်ဆိုခဲ့ပြီး အုပ်ရေသန်းကျော်ရောင်းချခဲ့ရပါသည်။

၁၉၉၆ခုနှစ်၌ဒါရိုက်တာ အန်သိုနီမင်ဂဲလား(Anthony Minghella)က ရေ့ဖ်ဖိုင်းဇ်(Ralph Fiennes) နှင့် ဂျူးလိယက်ဘီနိုးရှ် (Juliette Binoche) တို့ကိုသရုပ်ဆောင်စေကာ ရုပ်ရှင်အဖြစ် အသက်သွင်းရိုက်ကူးခဲ့ရာတွင်လည်း ဆုများစွာရရှိခဲ့ပြီး ဟိုးဟိုးကျော်ခဲ့သည့် စာအုပ်ကောင်းတစ်အုပ်ဖြစ်ပါသည်။ ထို့ပြင် Time.comက ရွေးချယ်သည့် ဖတ်ချင်စဖွယ် Top 10 Romantic Books တွင် အတင့်အတယ် နေရာယူထားနိုင်ခဲ့ပါသည်။

“အင်္ဂလိပ်လူနာ”သည် ဒုတိယကမ္ဘာစစ်နောက်ခံ ဂန္ထဝင်ဝတ္ထုရှည်တစ်ပုဒ်ဖြစ်သည်။ ဤဝတ္ထုတွင် ကွဲပြားခြားနားသည့် ဇာတ်ကောင်လေးဦး၏သရုပ်သကန်လေးမျိုးကို အွန်ဒတ်ဂျီက လှလှပပခြယ်မှုန်း ဖော်ပြထားသည်။ ဇာတ်ကောင်များတွင်အံ့ဩစရာကောင်းလောက်အောင် လှုပ်ရှားသက်ဝင်မှုတွေရှိသည်။ မမြဲသော အဖြစ်အပျက်တွေပေါ်လိုက်ပြီး စိတ်ခံစားမှုတွေ အမျိုးမျိုးပြောင်းလဲနေသည်။သဲကန္တာရ၊ လေပွေမုန်တိုင်း၊ ခရီး၊ စွန့်စားခြင်း၊ မြေမြှုပ်မိုင်း၊ စစ်၊ အချစ်၊ ဆန္ဒရမ္မက်အလိုကဲခြင်း၊ သစ္စာစည်းကျိုးပေါက်ပျက်ယွင်းခြင်း၊ လျှို့ဝှက်ကြံစည်ခြင်း၊ မျှဝေခံစား စာနာနားလည်ခြင်း၊ ကိုယ်ပိုင်ဝိသေသလက္ခဏာများရှိခြင်းစသည်တို့ကို အွန်ဒတ်ဂျီ၏ “အင်္ဂလိပ်လူနာ”တွင် ကွက်ကွက်ကွင်းကွင်း တွေ့မြင်ရသည်။

– အော်လ်မာရှီ၊ ဟန်နာ၊ ကာရာဗတ်ဂျီယို၊ ကစ်ပ် စသည့်အသွင်မတူသောလူလေးဦးသည် သဲကန္တာရထဲတွင်တည်ရှိသည့် အီတလီဘုန်းကြီးကျောင်းတစ်ခုတွင် ဆုံခဲ့ကြသည်။ အော်လ်မာရှီက မီးလောင်ကျွမ်းခံရသည့်လူနာ။ ဟန်ဂေရီလူမျိုးဖြစ်သော်လည်း ဟန်နာတို့အလိုအရ သူသည် အင်္ဂလိပ်လူနာ။ သမိုင်းဆရာ ဟီရိုဒိုးတပ်စ်ကို သူနှစ်သက်စွဲမက်သည်။ တစ်ကိုယ်လုံးမီးလောင်ခံထားရသည့် သူ့ကို ဟန်နာက ပြုစုပေးသည်။ ဟန်နာက ကနေဒီးယန်းလူမျိုး၊ အသက်နှစ်ဆယ့်နှစ်နှစ်ခန့်ရှိပြီဖြစ်သည့် စစ်သူနာပြု။ တည်ငြိမ်သည့်အသွင်ရှိသည်။ ဖြူစင်သူလည်းဖြစ်သည်။ ဟန်နာ့ကို ငယ်စဉ်ကတည်းက ကာရာဗတ်ဂျီယိုက ထိန်းကျောင်းခဲ့သည်ဟု ဆိုနိုင်သည်။ အီတလီပန်းချီကျော်၏နာမည်ကိုယူထားသော်ငြား ကာရာဗတ်ဂျီယိုသည်လည်း ကနေဒီးယန်းလူမျိုး။ သူခိုးငရိုးအဖြစ်အသွင်ယူထားသည့် စပိုင်တစ်ဦးဖြစ်သည်။ ကစ်ပ်ကမူ အိန္ဒိယလူမျိုး ဆစ်ခ်အင်ဂျင်နီယာတပ်သားတစ်ဦးဖြစ်ပြီး နောင်တွင် ဟန်နာနှင့် ချစ်ကြိုးနှောင်သွယ်မိကြသည်။ သူက မြေမြှုပ်မိုင်းရှင်းလင်းရေးတာဝန် ယူထားရသူဖြစ်သည်။ လူနာ(မြေပုံဆွဲကျွမ်းကျင်သူပညာရှင်)၊ စစ်မြေပြင်သူနာပြု၊ သူခိုး(စပိုင်)နှင့် စစ်မြေပြင်အင်ဂျင်နီယာတပ်သား စသူတို့ သည် တစ်နေရာတည်းတွင် စုစည်းကြရသော်လည်း သူတို့လေးဦး၏ စရိုက်လက္ခဏာတွေက လေးဘက်လေးတန်က လာကြသကဲ့သို့ ကွဲပြားခြားနားသည်။ ထိုကွဲပြားခြားနားသည့် သရုပ်သကန်များကို စွဲမက်နှစ်လိုဖွယ်ဖြစ်အောင်၊ ဆွတ်ပျံ့ဖွယ်ကောင်းအောင် မိုက်ကယ်အွန်ဒတ်ဂျီက အချိတ်အဆက်မိမိ လှလှပပရေးဖွဲ့ထားသည်။ တကယ်တမ်းအားဖြင့် “အင်္ဂလိပ်လူနာ”သည် ဆွတ်ပျံ့ ကြည်နူးဖွယ်ကောင်း သော တသသလွမ်းမောဖွယ်ဖြစ်သော ဒုတိယကမ္ဘာစစ်နောက်ခံ အချစ်ဝတ္ထုတစ်ပုဒ်ဟု ဆိုလျှင်လည်းရသည်။

– ယခုစာအုပ်ကို နွယ်နီမဂ္ဂဇင်းတွင် အပိုင်း(၁၀)ထိ ဆရာမြသန်းတင့်က ဘာသာပြန်ဆိုပြီး၊ ဘာသာပြန်ဆိုနေစဉ်မှာပင် ဆရာမြသန်းတင့် ကွယ်လွန်တိမ်းပါးသွားသည့်အတွက် ထိုဝတ္ထုကြီးကို ဆရာကိုနေ(မန်း)မှ အစကနေ အဆုံးအထိ ပြန်လည်ရေးသားထုတ်ဝေလိုက်သည့် စာအုပ်ကောင်းတစ်အုပ်ဖြစ်ပါသည်။

စာမျက်နှာ

372

စာအုပ်အရွယ်အစား

7.9×0.6×5.1 inches

ပုံနှိပ်မှတ်တမ်း

ကိုနေ(မန်း)စာပေ၊ 2022 ဖေဖော်ဝါရီလ (ပ-ကြိမ်)

7 in stock (can be backordered)

ဝေဖန်သုံးသပ်မှုများ

ဒီစာအုပ်မှာ ဝေဖန်အကြံပြုချက်များ မရှိသေးပါ

“အင်္ဂလိပ်လူနာ- ကိုနေ(မန်း)” စာအုပ်အပေါ် လူကြီးမင်း၏ အမြင်ကို ဝေဖန်သုံးသပ်နိုင်ပါသည်...

Your email address will not be published.

ကိုနေ(မန်း) စာအုပ်များ