လူတိုင်းအတွက် ဗုဒ္ဓစိတ်ပညာ

ခင်ဗျား ဘာလုပ်လုပ် အဆင်မပြေလို့ စိတ်ဓာတ်ကျနေပြီလား?

ဒါမှမဟုတ်

ကိုယ့်ကိုယ်ကိုယ် ယူကျုံးမရဖြစ်ပြီး အလွန်အမင်းဒေါသထွက်နေပြီလား?

ဒါမှမဟုတ်

စိတ်အလိုမကျတိုင်း ကိုယ့်ပတ်ဝန်းကျင်ကို ဆိုးဆိုးရွားရွားအပြစ်မြင်တတ်နေပြီလား ?

လူတစ်ယောက် စိတ်ရောဂါတစ်ခုခုခံစားနေရပြီဆိုရင် ဘယ်လိုကုစားကြမလဲ။ ဒီအဖြေက လွယ်ပါတယ်။ ပျက်နေတဲ့စိတ်ကိုပြုပြင်ဖို့ အကောင်းဆုံးဆေးဟာ ခင်ဗျားကိုယ်တိုင်ထားတတ်ရမယ့် စိတ်ပါပဲ။ ဒီတော့ ကိုယ့်စိတ်ဘာဖြစ်နေတယ်ဆိုတာကို အသေးစိတ်ဆန်းစစ်ဖို့ အကောင်းဆုံးအဖော်မွန်တစ်ခုခုတော့ လိုလာပါပြီ။ အဲဒီအဖော်မွန်ဟာ ဘယ်သူလဲ? ဘာလဲ? ဗုဒ္ဓရဲ့လမ်းစဉ်နဲ့အညီ အလင်းပြထားတဲ့ စိတ်ပညာကုထုံးလို့ပြောရင် မှားမယ်မထင်ပါဘူး။

စိတ်ပညာကုထုံးတွေအကြောင်းရေးသားထားတဲ့ ဒီစာအုပ်မှာ စိတ်ရောဂါဖြစ်ရခြင်းရဲ့အကြောင်း၊ စိတ်ကုထုံး(၅)မျိုး၊ အနောက်တိုင်းစိတ်ပညာသမိုင်း၊ စိတ်ကစဉ့်ကလျားရောဂါအကြောင်း၊ စိတ်ပညာသရုပ်ခွဲကုထုံးအကြောင်းတွေ ထည့်သွင်းဖော်ပြထားပါတယ်။ ဒါ့အပြင် စိတ်ရောဂါသည်တွေအတွက် ရုပ်ပိုင်းဆိုင်ရာနားလည်မှုတိုးမြှင့်ခြင်းနဲ့နာမ်ပိုင်းဆိုင်ရာသိနားလည်မှုဖွံ့ဖြိုးလာအောင်တည်ဆောက်ခြင်းလုပ်ငန်းစဉ်တွေကိုလည်း အသေးစိတ်ဖော်ပြထားပါတယ်။

စာဖတ်သူတွေ ငြီးငွေ့မှုမရှိအောင် ရဟန်းတစ်ပါးနဲ့ ဒကာတစ်ဦး မေးမြန်းလျှောက်တင်တဲ့ပုံစံ ရေးသားထားပါတယ်။ လူမျိုးဘာသာမရွေး ဖတ်ရှုနိုင်ပါတယ်။