မော်တော်ကားတစ်စီး၏အတ္ထုပ္ပတ္တိ

ယနေ့ ကျွန်တော်တို့ဆီတွင် ၀တ္ထုမဟုတ်သော ၀တ္ထု ဆိုသည့် စာပေပုံသဏ္ဍာန် တစ်မျိုးအကြောင်းကို ပြောနေကြသည်။ အဂီလိပ်လိုတော့ Non-Fiction Fiction ဟုခေါ်ကြသည်။ Non-Fiction Novel ဟုလည်းခေါ်ကြသည်။ ဇာတ်လမ်းရယ်လို့မရှိ ၊ ဇာတ်ကွက်ရယ်လို့လည်း မရှိ ၀တ္ထုမဟုတ်သော ၀တ္ထု၏ အဓိက လက္ခဏာချက်မှာ စိတ်ကူးကို အခြေမခံဘဲ အချက်အလက်ကို အခြေခံထားခြင်းပင် ဖြစ်သည်။ ၁၉၆၀ ပြည့်နှစ်နောက်ပိုင်းတွင် ခေတ်စားလာသည့် အမေရိကန်စာရေးဆရာ ထရူမင်းကပေါ့၏ In Cold Blood ဆိုသည့်၀တ္ထုနှင့် အီး၊ အယ်လ် ဒေါတရိုး၏ Ragtime ၀တ္ထုတို့မှာ ၀တ္ထုမဟုတ်သော ၀တ္ထုများ ဖြစ်သည်ဟု ဆိုကြသည်။ သို့ရာတွင် စာပေသမိုင်းဆရာတို့ အဆိုအရ ကမ္ဘာတွင် ပထမဆုံးပေါ်ပေါက်ခဲ့သော ၀တ္ထုမဟုတ်သော ၀တ္ထု၏ နမူနာမှာ ယခုဖော်ပြမည့် မော်တော်ကားတစ်စင်း၏ အတ္ထုပ္ပတ္တိ ဆိုသော ၀တ္ထုဖြစ်သည်ဟုဆိုသည်။ စာရေးဆရာမှာ ဆိုဗီယက် စာရေးဆရာ အီလျာအာရင်ဘတ်ဖြစ်ပြီး ထို၀တ္ထုကို ၁၉၂၉ ခုနှစ်တွင် ရေးသားထုတ်ဝေခဲ့ရာ ယခုဆိုလျှင် အနှစ် ၆၀ ကျော်သွားလေပြီ။၀တ္ထုမဟုတ်သော ၀တ္ထုသို့မဟုတ် ဇာတ်လမ်းမပါသော ၀တ္ထုကို ရေးသားထားပါသည်။